Jahon miqyosida har bir klub o'ziga yarasha muxlislariga ega. Millionlar o'yinining yanada maftunkorlik kasb etishida stadionni to'ldirib, sevimli jamoasini qo'llab-quvvatlovchi ishqibozlarning hissasi katta. Zero, tomoshabin bo'lmasa, futbol uchrashuvi o'z jozibasini yo'qotishi tayin.
Yurtimizda muxlislik madaniyatini yuksaltirish maqsadida ham ko'plab ishlar amalga oshirildi. Jamoalarimizda hamjihat fan-klublarga asos solindi. Umuman, bu masala bugungi kunda 200dan ziyod mamlakat federatsiyalarini birlashtirgan FIFAda ham dolzarblik kasb etgan. Chunki futbol jahon bo'ylab keng rivojlangani sari insoniylikka zid salbiy illatlarning ildiz otayotgani sir emas. Biz ayni mavzuda O'zbekiston futbol muxlislari klubi raisi Abdurahmon Fozilov bilan suhbatda bo'ldik.
- Abdurahmon aka, suhbatimiz avvalida O'zbekiston muxlislar klubining tashkil etilishi va uning bugungi kundagi faoliyati haqida ma'lumot bersangiz.
- O'zbekiston muxlislar klubi 2007 yilda O'FF prezidenti Mirabror Usmonovning tashabbus va taklifi bilan tashkil etilgan. Bundan ko'zlangan asosiy maqsad - butun o'zbek ishqibozlarini bir maqsad yo'lida birlashtirish, o'z navbatida, muxlislik madaniyatini yo'lga qo'yish, stadionlarda uchrab turadigan, millatimizga xos bo'lmagan ko'ngilsiz holatlar, hakamlar va futbolchilarga nisbatan aytiladigan nojo'ya gap-so'zlar, hayqiriqlarni bartaraf etishdan iborat edi. O'ylashimcha, biz o'z maqsadimizga erishdik. Futbolchi va murabbiylar bilan do'stona aloqa o'rnatganmiz. Muvaffaqiyatni birgalikda nishonlab, mag'lubiyatga uchralgan o'yinlarda yigitlarning ruhini ko'tarishga urinamiz.
Bunga javoban futbolchilarimiz chiroyli o'yin ko'rsatib, muxlislarni xushnud etishga intilishadi. Jamoasining faqat g'alabasidan quvonib, omadsizlikka uchragan paytlarda uni tashlab qo'yish, futbolchilarni haqoratlash, nojo'ya so'zlarni ishlatish madaniyatsizlikdir. Bu bilan hech narsaga erishib bo'lmaydi. O'zbekiston futbol muxlislari klubining ichki nizomiga ko'ra, unga a'zo har bir ishqiboz raqib jamoa futbolchilari, murabbiylari va ishqibozlari, uchrashuv hakamlarini haqorat qilmasligi, stadionga spirtli ichimliklar olib kirmasligi va iste'mol qilmasligi, muxlislar klubi bilan kelishmagan holda biror banner yoki plakatlarni ko'tarmasligi kerak. Xorijiy mamlakatlardagi safar uchrashuvlari chog'ida esa o'sha davlat qonun-qoidalari va tartib-intizomiga to'liq rioya qilishlari shart.
Globallashuv jarayonlari hayotimizga juda tez va chuqur kirib borayotgan hozirgi zamonda dunyoning turli burchaklarida yuz berayotgan noxush va jirkanch voqea-hodisalar, xar xil xurujlardan yosh avlodni himoyalashning eng samarali usuli ularning ongi va qalbida kuchli ma'naviy immunitetni hosil qilishdir. Buning uchun yoshlarga muxlislik madaniyatini o'rgatish, bag'rikeng­lik, hamjihatlik, sabr-toqat, do'stlik, mardlik kabi xal-qimizga xos fazilatlarni shakllantirish juda muhim hisoblanadi. Muxlislarimiz ezgu qadriyatlarga ega xalq farzandi ekanliklarini anglashsa, jamoat tartibiga rioya qilib, odamlar orasida o'zini qanday tutishni yaxshi bilishsa, bu mamlakatimizda sportni, jumladan, futbolni rivojlantirishga xizmat qiladi. Biz aynan shu tamoyillarni o'zimizga ustuvor vazifa sifatida belgilab, faoliyatimizni yildan-yilga takomillashtirib boryapmiz.
- Shaxsan o'zingizning O'zbekiston futbol muxlislari klubidagi faoliyatingiz qanday boshlandi?
- 2007 yili klubga asos solingach, uning a'zosiga aylandim. Meni klub raisining o'rinbosari etib tayinlashdi. Taxminan bir yil ishlaganimdan keyin o'sha paytdagi klub raisi nafaqaga chiqdilar va bu mas'uliyatli vazifani menga ishonib topshirishdi. Shu kungacha o'z oldimga qo'yilgan vazifa va majburiyatlarni sidqidildan bajarib kelyapman. Kimgadir bu engil ishdek tuyulishi mumkin. Aslida esa minglab muxlislarni yagona maqsad yo'lida birlashtirib, ularni ortingizdan ergashtirish oson emas.
- Klub a'zolari o'rtasida qandaydir tarbiyaviy soatlar, tashviqot ishlari olib boriladimi?
- Muxlislar klubi tashkil etilgach, dastlab safimizga hamma xohlovchilarni qabul qilaverardik. Keyin o'ylab ko'rsak, biroz noto'g'ri yo'lni tanlagan ekanmiz. Bugungi kunda vaziyat biroz o'zgacha. Har bir jamoaning muxlislar klubi safiga qo'shilayotganlar avtomatik ravishda O'zbekiston futbol muxlislari klubiga ham a'zo bo'lishadi. Ya'ni, ularning hujjatlari bizgacha etib keladi. Bu ishqibozlarga terma jamoaning barcha muxlislari kabi bir xil imkoniyat yaratib beriladi, shuning barobarida, doimiy nazoratda bo'lishadi. Albatta, ma'naviy-ma'rifiy soatlar o'tkazamiz. Qolaversa, har bir klubda shunday tadbirlar alohida tashkil etilmoqda. Bundan tashqari, joriy yil deyarli barcha viloyatlarga borib, o'sha erdagi jamoa­larning muxlislar klubi a'zolari bilan uchrashib, suhbatlar o'tkazdik.
Mavjud muammolarni aniqlab, ularni kerak bo'lsa, O'FF darajasida ko'rib chiqyapmiz. Zero, stadionga keladigan boshqa tomoshabinlar ulardan o'rnak olishadi. Fan-klub a'zolari o'z jamoalarini qo'llab-quvvatlashda madaniyatga urg'u berishsa, qolganlar ham ularga ergashishadi. Muxlislar madadi futbolchilarga kuch-g'ayrat bag'ishlaydi, g'alabaga undaydi. Lekin bunda ham me'yor, madaniyat bo'lishi, boshqa jamoa a'zolarining nafsoniyatiga tegmaslik lozim. Bugun zamonaviy stadionlarimizda har bir muxlisning madaniy hordiq chiqarishi, dam olishi, chiroyli o'yindan bahramand bo'lishi uchun barcha sharoitlar muhayyo. Mamlakatimizning yirik shaharlarida zamon talablariga to'la javob beradigan arenalar barpo etilmoqda. Terma jamoalarimiz, oliy va birinchi liga klublari ishtirokidagi uchrashuvlarda fanatizm bilan bog'liq muammoalar kuzatilgani yo'q. Ammo bundan xotirjamlikka berilish, beparvo bo'lish mumkin emas.
- Bir necha yildirki, O'zbekiston muxlislar klubi a'zolari ham klublarimiz, ham terma jamoa­larimizni FIFA va OFK bayrog'i ostida o'tkazib kelinayotgan nufuzli musobaqalarda yolg'izlatib qo'­yishmayapti. Fevral oyida poytaxtimizda futzal bo'yicha Jahon chempionati yo'llanmalari o'ynaladigan Osiyo chempionati o'tkaziladi. Futzalchilarimizni qo'llab-quvvatlash maqsadida qanday tayyorgarlik ishlari olib borilyapti?
- Darhaqiqat, muxlislar klubi tashkil etilganidan buyon barcha Osiyo chempionatlarida termamizni muntazam ravishda qo'llab-quvvatlab kel­yapmiz. Vetnamda bo'lib o'tgan oxirgi qit'a chempionatida ham bosh jamoamiz muxlislari juda chiroyli tarzda ko'rinish berishdi. O'z o'rnida, OFK ham buni nazardan chetda qoldirmadi va O'FFga tashakkurnoma yo'lladi. Bundan juda xursand bo'ldik. Tabiiyki, bu safargi Osiyo chempionatida ham an'anani davom ettiramiz. Rosti, bu galgi musobaqaga o'zgacha tayyorgarlik ko'ryapmiz. Sakkiz yillik tajribamizni aynan yurtimiz mezbonlik qiladigan Osiyo chempionatida qo'llamoqchimiz. Futzal beshga-besh o'ynaladi. Shundan kelib chiqib, oltinchi o'yinchi sifatida termamizni qo'llab-quvvatlamoqchimiz. O'rtaga jahon chempionati yo'llanmasi qo'yilgan musobaqada hamyurtlarimizning g'alabalariga o'z hissamizni albatta, qo'shamiz.
- Shu yili Yangi Zelandiyada o'tgan yoshlar (U-20) o'rtasidagi jahon chempionatida buyuk bobokalonimiz Amir Temur qiyofasida namoyon bo'ldingiz. Bu kimning g'oyasi edi?
- Albatta, o'zimniki. Dizaynerlar bilan hamkorlikda ushbu qiyofani yaratdik. Stadionda Amir Temur bobomizning siymolarida ko'rinish berishni anchadan beri dilimga tugib yurgandim. Bilasiz, yunonlar Spartak, ruslar ayiq timsolida ishqibozlik qilishadi. Biz ham bu borada yangilik qilishimiz kerak edi. O'ylashimcha, rejamiz ish berdi. Yangi Zelandiyadagi jahon chempionatining har bir uchrashuvidan keyin stadionda bir soatlab qolib ketdik. Muxlislar kelib suratga tushishdi. Stadion chiroqlari o'chirilgunga qadar fotosessiyada ishtirok etdik (kuladi). Albatta, juda ham yoqimli holat. Bu bilan to'xtab qolish niyatida emasmiz. Futzal bo'yicha o'tkaziladigan Osiyo chempionatida ham yangiliklar guvohiga aylanasizlar. Hattoki, o'yin­larni televizor orqali tomosha qiladigan muxlislar ham arenada yuzaga keladigan chiroyli manzaradan bahra olishadi.
- Boshqa mamlakatlardagi muxlislar klublari bilan aloqa o'rnatilganmi?
- Albatta, ular bilan hamkorlik qilyapmiz. Axir ilm o'rganishdan hech qachon to'xtab qolmaslik kerak. Terma jamoalar va klublarimizga hamroh sifatida qaysi davlatga borgan bo'lsam, har safar o'sha mamlakatning muxlislar klubi raislari va sardorlari bilan uchrashishga harakat qilaman. Yaqinda Madridda «Real» - «Barselona» uchrashuvini bevosita stadionda ko'rib qaytdim. U erda ham har ikki klub muxlislari etakchilari bilan uchrashib, o'zaro fikr almashdik. Ularni ham markaziy o'yinlarimizni tomosha qilish uchun taklif qildim. Men uchrashgan xorijlik muxlislar orasida eng mashhuri bu - braziliyalik Klaudio Fernandes. U shu yil vafot etdi. Braziliyada o'tgan jahon chempionatidan keyin yanada ko'proq shuhrat qozondi. Jahon kubogini quchoqlab tushgan surati uning dovrug'ini dunyo­ga yoygandi. Garchi bu inson muxlislar klubi raisi yoki sardori hisoblanmasada, undan shaxsan men juda ko'p narsa o'rgandim. Bunday muxlis bo'lish uchun bilmadim yana qancha ko'ylak yirtishim kerak? To'g'risi, hozir shu insonni eslab, ko'nglim biroz g'ash tortdi. Jahon chempionati uchrashuvlarini tomosha qilish maqsadida Braziliyaga borganimda, Klaudio bilan ko'rishdik.
Final o'yiniga kirib ketayotganda ham stadion oldida uchrashgandik. Braziliya termasi musobaqani tark etgani uchun ko'zi jiqqa yosh edi. O'shanda Germaniya bayrog'ini ko'tarib olgandi. Ehtimol, Argentina termasi hamisha Braziliyaning azaliy raqibi bo'lgani uchun shunday yo'l tutgandir. Bu muxlis bilan dunyoning ko'plab firma va kompaniyalari shartnoma imzolashga harakat qilardi. Homiylari juda ko'p bo'lgan. U Braziliya milliy jamoasining 150dan ziyod o'yinini bevosita stadionda tomosha qilgan. Bu - rekord natija. Mening yo'nalishim esa biroz boshqacha. Klubimizga a'zo boshqa muxlislarni ham termamizning xorijdagi o'yinlariga olib borishga harakat qilaman. Buning uchun homiylar topib, sayyohlik firmalari bilan gaplashgach, chegirmalar asosida safarlarni tashkil etib kelyapmiz.
Davomi InterFUTBOL gazetasi blogida.
— deya xabar beradi uff.uz nashri.