Dunyoda sport turlari judayam ko'p. Lekin, futbolning o'rni va ahamiyati boshqalaridan ancha yuqori hisoblanishi hech kimga sir emas. Futbol bu shunday o'yinki, uni nafaqat ko'rish balki undan rohat olish ham mumkin. Bunda esa birinchi navbatda o'yinni teleekran qarshisida o'tirgan millionlab odamlarga to'la-to'kis va bekamu-ko'st qilib etkazib beradigan insonlarning o'rni beqiyos albatta. Chunki o'yinni tomosha qilayotgan muhlis o'zini go'yoki stadionda o'tirgandek his qilishi kerak. Ayni masalada esa qobiliyati sharhlovchi hammasini uddalashi mumkin.
Yuqoridagi fikrlarimdan bilib oldingizki bugun aynan futbol sharhlovchilari haqida fikr yuritmoqchiman. Mamlakatimizda bunday kasb egalari etarlicha topiladi, lekin, hamma narsa soni emas sifati bilan o'lchanganidek, futbolni sharhlaydigan insonlarni ham sifati bilan ajratib olish mumkin. Aynan sifatli degan jumlaga e'tibor qaratishingizni so'rardim. Chunki, muhlisni ko'nglidagi so'zni topib, bilib gapirish ham bir mahorat, bir iste'dod hisoblanadi. Afsuski, bunday iste'dodli sharhlovchilarimiz barmoq bilan sanoqli.
O'tgan davr mobaynida “Sport” telekanali sharhlovchilari orasida ham avlodlar almashinuvi yuz berdi. Boy tajribaga ega ustozlar o'rnini munosib shogirdlar egalladi.Hozirgi vaqtda O'zbekistondagi eng yaxshi sport sharhlovchilari orasida bir insonni alohida ko'rsatish mumkin. O'zMTRK “Sport” telekanali sharhlovchisi Davron Fayziev.
Ha bu inson shu qadar serqirra ijodkorki, sharh davomida tomoshabinni umuman zeriktirmaydi. Xox u o'zimizning Oliy liga bo'lsin, xox xalqaro o'yin buning u insonga umuman ahamiyati yo'q. Hammasini birdek qiziqarli va profissional tarizda sharhlab bera oladi. Bir so'z bilan ayganda Davron akaning sharhlarini tinglab shunchaki zavq olish mumkin. (Shahsan men uchun Paxtakor – Bunyodkor o'yinini sharhlasa ham huddi El klassikoni sharhlayotgandek tuyuladi. Yana bir hil sharhlovchilar borki ular Braziliya – Argentina o'yininida ham “uhlab” qolishadi.)
Bu ijodkorning samimiyligi, kutilmagan fikrlari va emotsiyalari teleekran qarshisida o'tirgan har bir tomoshobinni o'ziga ipsiz bog'lab qo'yadi. Sharh davomidagi hazilomus gaplari esa barchamizning yuzimizga be ixtiyor tabassum olib kelishi ham rost.
Yuqoridagi maqtovlar aslo noo'rin emas, balki qilgan mehnatlarining samarasidir. Yangi – 2016 yil ostonasida turganimizdan foydalanib, butun o'zbek futbol muhlislari nomidan Davron akaning ijodiga omad va zafarlar yor bo'lishini va yangi yilda faqat futbol sharhlash bilangiga cheklanib qolmasdan, o'zining mualliflik dasturini ham tayyorlashiga umid qilib qolamiz.
Baxtiyor TOShTEMIROV

— deya xabar beradi uff.uz nashri.