Garchi turkiyalik yarim himoyachi Arda Turon joriy yilning iyul oyi boshlarida rasman «Barselona» a'zosiga aylangan bo'lsada, UEFA joriy etgan sanktsiyalar tufayli kataloniyaliklar safida maydonga tusholmadi.
Unga ijara asosida «Galatasaroy»da o'ynash imkoniyati taqdim etildi, lekin futbolchi Ispaniyada qolishni ma'qul ko'rdi. Tinmay shug'ullanib, shu tariqa sheriklari bilan o'zaro til topishib olishni maqsad qildi. Xo'sh, iqtidorli o'yinchi futbolsiz o'tgan yarim yil davomida nimalar bilan shug'ullandi? Quyidagi maqola orqali ushbu savolga javob topishga urinamiz.
UEFAdan marhamat kutdi
«Barselona» turli yo'llar bilan UEFA taqiqidan qochishga urindi. Alkantaraning og'ir jarohatidan so'ng kataloniyaliklar Turonni «zayavka»ga kiritish uchun ruxsat so'rashdi. Bu ishga Turkiya futbol federatsiyasini aralashtirishga intilishdi, ammo bu urinishlar besamar yakunlandi: Ardaning iltimosi rad etildi.
«10»dan voz kechdi
«Turkiya termasida 14-raqamda o'ynayman, chunki otam Kroyfning ashaddiy muxlisi edi. «Atletiko»da esa «10»ni berishdi. «Barselona» bilan shartnoma imzolaganimdan so'ng, Messi agar xohlasam, ushbu raqamni menga berishi mumkinligini aytdi», - dedi Turon. Argentinalik yulduzning hamon 10-raqam ostida maydonga tushayotganidan mazkur masala qanday hal etilganini anglash qiyin emas.
Superkubokni ushlab ko'rdi
«Barselona» Turonsiz Evropa superkubogini qo'lga kiritdi. «Sevilya»­ni 5:4 hisobida taslim etilgan bahsda Arda o'ynash huquqiga ega emasdi. Shunga qaramay, kubok va medal bilan suratga tushishga ulgurdi.
Yurtida yil kishisiga aylandi
O'yin amaliyotisiz qolishi Turonning Turkiyada 2015 yilning eng e'tiborga loyiq kishisi nomiga sazovor bo'lishiga to'sqinlik qilmadi. Unga mukofotni turkiyalik mashhur basketbolchi Hidoyat Turkoglu topshirdi.
GQ muqovasida paydo bo'ldi
Yil kishisining nomi aynan shu nomdagi jurnal o'tkazgan so'rovdan so'ng aniqlandi. Demak, muqovadan «Barselona» xavbekining surati o'rin olganini to'g'ri tushunish mumkin. 2014 yilda Turon ushbu nashrning birinchi sahifasini eng yaxshi sportchi sifatida bezagandi.
Ahil jamoaga qo'shildi
Turon «Barselona» futbolchilari bilan tezda chiqishib ketdi. Xususan, Neymar va Dani Alves turkiyalik futbolchi hamrohligida tez-tez suratga tushishadi.
Maxsus turnirda ishtirok etdi
Sir emaski, Play Station sport simulyatorlari aksariyat futbolchilarning hayotida alohida ahamiyat kasb etadi. Xususan, «Barselona»da bu borada maxsus turnir o'tkazilib, unda Turon, Alves hamda Bravo uchligi Neymar, Ter Shtegen va Alba triosiga qarshi bahs o'tkazishdi. Unda Ardaning jamoasi 0:4 hisobida yutqazdi.
BATEning ustidan kuldi
Turonga o'ynash mumkin emas, ammo stadionga kirishiga hech kim qarshilik qilolmaydi. «Kamp Nou»da turkiyalik futbolchining rafiqasi va do'stlarini tez-tez uchratishdi. BATE bilan o'yinni esa u Messi hamrohligida kuzatdi.
Bir talay intervyu berdi
Jurnalistlar Ardadan tez-tez fikr so'rashadi. Turon maydonga chiqmadi, ammo ekspert sifatida ko'plab intervyularni berdi.
Reklama roligida qatnashdi
Shina ishlab chiqaruvchi Lassa Tyres kompaniyasi «Barselona»ning rasmiy hamkorlaridan biri sanaladi. Ushbu firma Turon ishtirokida bir nechta reklama roliklarini ishladi.
Davomi InterFUTBOL gazetasi blogida.
— deya xabar beradi uff.uz nashri.