Tan olish lozim, dekabr - futbolimizdagi eng osuda davrlardan biri. Chunki bu paytga kelib, klublarimiz qishki ta'tilga chiqishadi. Shuning uchun dekabr oyidagi laureatlarni aniqlashda asosan, xorij chempionatlarida to'p surayotgan legioner futbolchilarimizning ko'rsatkichlariga tayanishga to'g'ri keldi. Afsuski, ayni paytda biror-bir xorij ligasida murabbiylarimiz faoliyat olib bormayapti. Boshqacha aytganda, mutaxassislarimiz ham xuddi futbolchilarimiz singari, vaqtinchalik ta'tilga chiqishgan. Demak, dekabr oyidagi hisob-kitoblarni murabbiylarsiz o'tkazsak, xato bo'lmaydi.
Yuqorida ta'kidlaganimizdek, 2015 yilning so'nggi oyida faqatgina legionerlarimiz rasmiy uchrashuvlarda maydonda tushishdi. Ular orasida biz ayniqsa, Qatarning «Al-Jaish» klubi vakili Sardor Rashidovning natijalarini katta qiziqish bilan kuzatib bordik. Zero, Sardor va uning jamoadoshlarini dekabrda ajoyib o'yin - Xavini o'z tarkibiga qo'shib olgan «Al-Saad»ga qarshi o'tadigan uchrashuv kutib turgandi. Bunga qadar «Al-Jaish» dekabrning 4-sanasida «Qatar» klubiga qarshi o'yin o'tkazdi. Aslida, bu raqib Sardor va uning jamoasi uchun unchalik xavfli tuyulmagandi. Ammo futbolda taxminlar har doim ham o'zini oqlayvermasligi yana bir karra o'z isbotini topib, «Al-Jaish» mazkur bellashuvda raqibga minimal hisobda mag'lub bo'ldi.
Rashidov 90 daqiqa to'p surdi. Keyin esa «Al-Jaish» o'z maydonida «Um Salal» bilan kuch sinashdi va bu o'yinda ham engildi. - 2:3. Lekin biz uchun muhimi, Sardor maydonda deyarli 70 daqiqa to'p surib, jamoasiga gol bilan yordam berishga intildi. U 74 daqiqada o'sha golni urdi ham. Lekin Sardorning goli o'yinni qutqarib qolish uchun kamlik qildi. Nihoyat, 14 dekabr kuni «Al Jaish» chempionatdagi eng printsipial raqiblaridan biri - «Al-Saad»ga to'qnash keldi. Ketma-ket ikki turdagi omadsizlikdan to'g'ri xulosa chiqargan mezbonlar bu gal raqibni ayab o'tirishmadi - 4:2. O'yinda 83 daqiqa harakat qilgan Sardor 51-daqiqada gol urib, jamoasining g'alabasiga munosib ulush qo'shdi. Qolaversa, u bitta golga hammualliflik qilganini ham alohida ta'kidlash o'rinli. Shu tariqa, «Al-Jaish» «Al-Ahli»ga qarshi o'tadigan yilning so'nggi o'yiniga yuqori kayfiyat bilan etib kelib, bu o'yinda ham g'alaba nashidasini surdi. Rashidov o'yinda 65 daqiqa davomida to'p surib, murabbiy tomonidan olqish olishga ham ulgurdi. Yagona gol esa uning to'purar jamoadoshi - Hamidallah hisobiga yozildi.
Demak, dekabrda maydonda eng ko'p to'p surgan futbolchi Sardor ekani oydinlashdi va uning jamoasi ikki marta mag'lubiyatga uchragan bo'lsada, hamyurtimiz boshqalarga ibrat bo'lsa-bo'ldiki, aslo ulardan kam harakat qilmadi. Shu bois, mazkur oyning eng yaxshi futbolchisi deb aynan Rashidovni tanlasak, hech kim norozi bo'lmasa kerak.
Tanlovimizdagi ikkinchi o'ringa esa Odil Ahmedovni munosib topdik. Chunki ushbu futbolchi terma jamoa uchun katta kuch sarflagan bo'lsada, «Krasnodar»da ham «yo'qolib» qolmayapti. Jumladan, u 4 dekabr kuni «Kuban»ga qarshi safarda o'tgan o'yinda 59 daqiqa harakat qildi va g'alabaga katta hissa qo'shdi - 3:2. Keyin esa nufuzli Evropa Ligasi doirasidagi o'yinda «Gabala»ning mag'lub etilishida shaxsan qatnashdi. Odil mazkur uchrashuvda to'liq harakat qilganini ham alohida ta'kidlash lozim. To'g'ri, bu o'yinlarda Ahmedov gol urmadi. Ammo uning o'z klubidagi vazifasi asosan, himoyani mustahkamlashga qaratilganini inobatga olsak, futbolchimizning bu g'alabalardagi o'rni juda yuqori ekani oydinlashadi.
Uchinchi o'ringa esa Serbiyaning «Yavor» klubi sharafini himoya qilayotgan Husniddin G'ofurov loyiq ko'rildi. O'yinlari ochilib borayotgan legionerimiz dekabrda o'z klubi uchun o'ta muhim golni urib, jamoasining g'alaba qozonishiga munosib hissa qo'shdi. Shuningdek, samarali harakatlari tufayli O'zbekiston olimpiya termasi ustozlari nazariga tushdi. Ushbu jamoadan chaqiruv olgan G'ofurov hozirda Babayan boshchiligida qit'a chempionatiga taraddud ko'rmoqda. Ayniqsa, uning Shimoliy koreyalik tengdoshlariga qarshi o'yindagi harakatlari ko'pchilikda iliq taassurot qoldirdi. Raqiblar darvozasiga kiritilgan bir-biridan chiroyli gollarning biri aynan Husniddinning hisobiga yozildi. O'z-o'zidan ko'rinib turibdiki, Samvel Vyacheslavovich ushbu futbolchini termaga chaqirib xato qilmagan.
So'rovimizning doimiy a'zosi Igor Sergeev esa bu safar da'vogarlar orasidan joy egalladi. To'p-urar hujumchimiz ham hozirda olimpiyachilarimiz bilan birgalikda Osiyo kubogi-2016ga astoydil tayyorlanmoqda. Mazkur musobaqaga shay holda etib borishni maqsad qilgan yoshlarimiz shu kungacha bir nechta o'rtoqlik o'yinlarini o'tkazishdi. Tabiiyki, unda Sergeev har doimgidek jamoamizning hujumda qanday kuchga ega ekanini namoyish etmoqda. Xususan, «Paxtakor» forvardi ushbu o'yin-lar doirasida KXDR darvozasiga ikkita gol urdi. Tan olish kerak, boshqa o'rtoqlik bahslarida Igorning unchalik ham omadi chopmayapti. Lekin ishonamizki, u mazkur kamchilikni tez orada boshlanadigan rasmiy uchrashuvlarda to'la bartaraf etadi.
Xullas, turli-tuman voqealarga boy o'tgan 2015 yilda murabbiylar orasida Samvel Babayan 25 ochko to'plab, hamkasblaridan ancha o'zib ketdi va yaqqol peshqadamlik qilib, g'oliblikni qo'lga kiritdi. Ikkinchi va uchinchi o'rinlar mos ravishda Sergey Lushan va Ro'ziqul Berdievga nasib etdi.
Davomi InterFUTBOL gazetasi blogida.
— deya xabar beradi uff.uz nashri.