Ayni paytda mamlakatimiz Oliy ligasida ishtirok etadigan klublar yangi mavsum taraddud ishlariga zo'r berishgan. Boshlanajak chempionat oldidan “Andijon” jamoasida ham bir qator o'zgarishlar ro'y berdi. Bundan buyon klub rahbari lavozimida shu kungacha viloyat futbol federatsiyasi birinchi vitse-prezidenti sifatida muvaffaqiyatli faoliyat yuritgan yosh mutaxassis -Bekzodbek Karimov ish olib boradi.
Blits-ma'lumot:
Bekzodbek Karimov, 29 yosh. Andijon futboli tarbiyalanuvchisi. Futboldagi ilk saboqlarini Andijon bolalar va o'smirlar futbol maktabida olgan. Himoyachi sifatida “Andijon”(2003-yil),“Shaxrixon” (2004), “Paxtakor”(2005), “Buxoro”(2007-2008), “Andijon”(2009-2011) hamda mamlakatimiz Olimpiya terma jamoasi safida to'p surgan. 2011 yilda og'ir jarohat tufayli futbolchilik faoliyatini yakunlagan.      
   
Biz UFF.uz internet nashri uchun Bekzodbek Karimov bilan mo''jaz suhbat qurdik:
- Avvalo,  ma'suliyatli vazifadagi ishlaringizda omad tilaymiz
- Rahmat. Darhaqiqat, oxirgi yillarda klubimiz ko'rsatayotgan natijalarga qarab baho beradigan bo'lsak, jamoani ayni paytdagi holatidan olib chiqib ketish uchun bildirilgan ishonch menga juda katta ma'suliyat yuklaydi. Ma'lumki, Andijonda futbolning sodiq muxlislari ko'p. Ming afsuski, oliy ligada to'p suradigan “Andijon” futbol klubi muxlislar ishonchini to'la oqlay olmayotir. Aslida, ko'p ming sonli muxlislar ega jamoaning natijalari ham ishqibozlar mehriga yarasha bo'lishi kerak, deb o'ylayman.  
- Oxirgi yillarda klubda murabbiy va mutasaddilar juda ko'p almashdi, lekin samaradan darak yo'q...      
- O'zimdan oldin faoliyat yuritgan mutasaddilarni ishlariga baho berishdan yiroqman. Chunki, har kim o'z saviya va salohiyatidan kelib chiqib ish olib boradi. Men yoshligimdan “futbol qozonida” qaynab tajriba to'pladim. Bir jamoaning ma'lum yutuqlarga erishishi uchun avvalo klubda xuddi  qadrdon oiladagidek ijobiy muhit bo'lishi darkor. O'zingizga ma'lum, klub muvaffaqiyatida istak-hohishning o'zigina etarli emas, balki boshqa ko'plab omillar ham muhim o'rin tutadi. Rahbariyat omilkorlik bilan ish tutib, klub infratuzilmasini oqilona nazorat ostiga olsa, taraqqiy etish ham shunga yarasha bo'ladi, deb o'ylayman. Hozir klubda ba'zi muammolar mavjud va ular tez kunlarda bartaraf etiladi.
Biz jamoa mutaxassislari bilan bir mavsumni emas, balki ko'p yillarni o'z ichiga olgan aniq rivojlanish rejasini tuzib chiqdik. Xususan, federatsiyadagi faoliyatim mobaynida viloyatimiz futboli katta potentsialga ega ekanligiga amin bo'ldim. Afsuski, oxirgi payt viloyatda voyaga etayotgan yosh iqtidorlar o'z kelajagini boshqa klublarda ko'ra boshlashdi. Axir futbol maktablarida tarbiyalanib, ikkinchi va birinchi ligada to'p surayotgan futbolchilar viloyatimizning asosiy jamoasida joy olish uchun harakat qilishlari lozim emasmi? Buning uchun esa “Andijon” klubining oliy ligada o'ziga yarasha o'rni bo'lishi kerak. Endi  viloyatimiz futbol mutaxassislari bilan kelishgan holda talantli yoshlarimizni yuzaga chiqarish bo'yicha alohida tizim asosida ish olib borishni rejalashtirdik.  Klub asosiy tarkibini bosqichma-bosqich viloyatda etishib chiqayotgan mahalliy iqtidor egalari hamda yurtimizning malakali futbolchilari bilan shakllantirib boramiz.  Ishqibozlar doim o'z jamoasini g'alaba qozonishi hohlashadi. Jamoani tizim bilan shakllantirib olsak, bir oz vaqtdan so'ng albatta yutuqlar davri ham etib keladi. “Andijon” klubi muxlislarini mana shu jihatga e'tibor qaratishlarini hohlardim.
- Jamoa murabbiylar shtabi va tarkibda qanday o'zgarishlar kutilmoqda?
- Viloyatimiz futboli mutasaddilari bilan kelishgan holda jamoani yangi mavsumga tayyorlashni tajribali murabbiy - Sergey Kovshovga ishonib topshirishga qaror qildik. Unga mahalliy murabbiylarimizdan Nozim Mullaoxunov yordam beradi. Klub shartnoma muddati tugaganligi sabab, o'tgan yili to'p surgan bir qator futbolchilar bilan hayrlashdi. Hozir selektsiya ishlarini keng ko'lamda olib boryapmiz. Yuqorida aytganimizdek, asosiy tarkibga nomzod sifatida viloyatimizning bir qator futbolchilari sinovdan o'tkaziladi.
Bu holat - klub faqat mahalliy va yosh o'yinchilardan iborat bo'ladi, degani emas... Murabbiylar bilan maslahatlashib, tarkibning eng og'riqli nuqtalariga bir qator “oliy liga havosidan nafas olgan” tajribali futbolchilarni jalb qilmoqchimiz. Jamoaning kutilayotgan ikkinchi yig'ini 5 yanvardan Andijondagi klub bazasida tashkil etilib, unda yangi o'yinchilar ko'rikdan o'tkaziladi. Shundan so'ng murabbiylar shtabining ish rejasiga asosan navbatdagi mashg'ulot-yig'iniga to'planamiz. Mavsumoldi tashkil etiladigan turnirlarda tarkib yana shakllanadi. Yanvar, fevral va mart oylaridagi   jarayon davomida o'zini ko'rsata olgan futbolchilar asosiy tarkibdan joy oladilar. Shunday ekan  - jamoaga mana bu o'yinchilarni oldik, deb gapirishga hali erta. Klubga sinov maqsadida chaqirilgan futbolchilar bilan  esa 5 dekabr kuni boshlanadigan mashg'ulotlarga kelib tanishishingiz mumkin.
- Eslasangiz, o'tgan yili mavsum oldidan o'sha paytdagi jamoa murabbiyi –“Andijon”ning bu yilgi vazifasi oliy ligada qolish, degan edi...
- Aytib o'tdim, klubda o'zimdan oldin ish olib borgan mutaxassislar to'g'risida hech qanday fikr bildira olmayman. Chunki, ular ham jamoa rivoji uchun qo'ldan kelganicha mehnat qilishgan. Lekin,  xalqimizning “Yaxshi niyat – yarim davlat” degan ajib hikmati bor. Agar oldimizga qo'ygan rejalarimizni amalga oshirish uchun ma'lum imkoniyatlarimiz etarli darajada bo'lsa “Andijon” faqat yuqori o'rinlar uchun harakat qiladi. Bu borada viloyatimiz rahbarlari yaqindan ko'mak berishlarini bildirishdi. Ularning ishonchi va yordami biz uchun juda kerakli omildir.
- Suhbat uchun tashakkur.   Elmurod Ermatov suhbatlashdi
Andijondan, UFF.uz internet nashri uchun
— deya xabar beradi uff.uz nashri.