Polsha termasi va «Fiorentina» yarim himoyachisi Yakub Blashikovski yaqinda FourFourTwo nashriga intervyu berdi. Quyida ana shu suhbatni o'qishingiz mumkin.
- «Borussiya»dan «Fiorentina»ga o'tganingizdan so'ng La Gazzetta dello Sport nashri sizni «A» seriya­ning yozgi transfer bozoridagi eng yaxshi xaridi, deb aytdi. «Fiorentina» sizga yoqyaptimi?
- Hozircha bu jamoaga o'tish borasidagi qarorimdan mamnunman. Men uchun har uch-to'rt kunda o'ynash muhim. So'nggi yillarda «Borussiya»da bunday bo'lmayotgandi. Chunki jarohatlar tufayli me'yorni topa olmayotgandim. Yashirmayman, Dormunddan ketishim og'ir bo'ldi. Bu klub hamisha qalbimda qoladi. U erda xursandchiligimda ham, qayg'umda ham birga bo'lgan do'stlarim qoldi. Hozir ham ular bilan tez-tez muloqot qilib turaman. Lekin futbol borasida nimanidir o'zgartirishim kerak edi. Shu bois ham yangi chaqiruvlarga tayyor edim. Hozircha hammasi yaxshi ketmoqda. Umuman olganda, florentsiyaliklar taklifini qabul qilib, tavakkalga qo'l urdim. Ammo ayni paytda yangi sharoitlarga moslashuvim yaxshi ketmoqda.
- «Fiorentina»dagi ustozingiz Paulo Souza o'z vaqtida «Benfika», «Yuventus», «Borussiya» Dortmund va «Inter»da yaxshi o'yin namoyish qilgan. U bilan ishlash qanday ketyapti?
- Paulo nafaqat yaxshi futbolchi bo'lgan, balki murabbiy sifatida o'zi ishlagan klublarda ham muvaffaqiyat qozongan. Eng muhimi, u menga ishonch bildirmoqda. Buni har bir futbolchi xohlaydi. Shunda maydonga ishonch bilan tushishingiz mumkin. Qolaversa, jamoadoshlarim bilan ham munosabatlarim ajoyib. Biz Dortmundda Yurgen Klopp qo'l ostida 4-4-2 sxemasi bo'yicha o'ynardik. Bu erda 3-5-2 taktik uslubidan foydalanamiz. Shu bois ham maydondagi vazifam biroz boshqacharoq.
- Yurgen Kloppni esga oldingiz. U haqda qanday fikr bildirasiz?
- Bu mutaxassis meni nafaqat futbolchi, balki inson sifatida ham o'zgartira olgan. Hech kim Klopp singari o'yin borasida menga ta'sir o'tkaza olmagandi. U hamisha har qanday raqobat insoniylik oldida hech nima emasligini aytardi. Yurgen aqlli va xushchaqchaq. «Liverpul» undan yaxshi murabbiy topa olmasdi. Klopp bilan shartnoma imzolash - bu g'alaba.
- Sizningcha, u «Liverpul»da muvaffaqiyat qozona oladimi?
- Bunga ishonchim komil. Asosiysi, futbolchilar uning falsafasini tushunishlari lozim. «Borussiya»da biz buni uddalaganmiz. Natija ham uzoq kuttirib qo'ymagan. «Liverpul» futbolchilari unga ishonishlari va aytganlarini bajarishsa bas. Yurgen maydonda ham, uning tashqarisida ham nima qilayotganini yaxshi biladi. Ko'p mehnat qildi. Natijada «Borussiya» bilan muvaffaqiyat qozondi. Menga imkoniyat bergani uchun undan minnatdorman.
Davomi InterFUTBOL gazetasi blogida.
— deya xabar beradi uff.uz nashri.