Kecha xabar qilganimizdek jamoamiz futbolchi qizlari klub qarorgohida to'liq yig'ilishdi va mavsumoldi tayyorgarliklarini davom ettirishmoqda.
Bugun ertalabdan V.Xan boshchiligidagi murabbiylar guruhi futbolchilarning jismoniy holatini nazoratdan o'tkazishdi.
Futbolchi qizlarimiz 50, 100 metrga yugurish, uzoqlikka sakrash va uzoq masofaga yugurish kabi jismoniy holatlari bo'yicha test sinovlarini topshirishdi. Murabbiylar ushbu test sinovlari natijalariga ko'ra, tayyorgarlik rejasini ishlab chiqishadi va futbolchi qizlarimizning jismoniy holatlarini hisobga olgan holda tayyorgarliklarini olib borishadi.
Jamoamiz tarkibida ko'plab yosh futbolchi qizlar sinovdan o'tkazilmoqda. Shuningdek o'tgan mavsumda Navoiyning “Guli”, Muborakning “Mash'al” jamoasiga ijaraga berilgan o'yinchilarimiz ham endi safimizga qo'shilishmoqda. Asosiy tarkib bo'yicha jamoamiz murabbiylari keyinroq bir to'xtamga kelishlari mumkin.
Avval xabar berganimizdek, jamoamiz bu yilgi mavsumning ilk musobaqasi – mini futbol bo'yicha XXII O'zbekiston chempionatida ishtirok etishadi. Mazkur chempionatga 24 yanvar kuni start beriladi va dastlabki tur uchrashuvlari 24-30 yanvar kunlari Toshkent shahrida bo'lib o'tadi.
Manba: pfcsevinch.uz, voha.uz
— deya xabar beradi uff.uz nashri.