"Navbahor" a'zolari bugunga belgilangan mashg'ulotlarni yakunlashdi.
Kecha bir mahallik mashg'ulot bilan cheklangan futbolchilarimiz bugun ikki mahal shug'ullanishdi. Mashg'ulotlar davomida asosiy urg'u futbolchilarning jismoniy holatini yaxshilashga qaratilgan mashqlarga berilmoqda. Shu o'rinda tarkibda ham bir qator o'zgarishlar ro'y berganligini aytib o'tish joiz. Bugungi mashg'ulotlarga jamoa sardori Dilshod Jabborov qo'shildi. O'tgan mavsumni “Andijon”da o'tkazgan namanganlik yarim himoyachi Sanjar Asqaraliev ham jamoamiz yig'iniga qo'shildi. 2015 yilgi chempionat ikkinchi yarmini “Metallurg”da o'tkazgan mahalliy futbolchi Akbarsho Rashidxanov ham ayni paytda jamoamiz bilan birga shug'ullanmoqda. Bundan tashqari, oldingi mavsumni Uychining “Xotira-79” jamoasida o'tkazgan Jamol Abdujabborov, Mirzohid Sobirov, Botir Karimjonovlar bilan birgalikda Bilol Sharofiddinov, Islom Jo'raev kabi futbolchilar ham ko'rikdan o'tishmoqda. Dastlabki kungi mashg'ulotda qatnashgan Sardor Asqarov mashg'ulotlarda ishtirok etmadi. Shuningdek, hujumchi Mo'ydin Mamazulumov ham jamoa safida ko'rinish bermadi.
— deya xabar beradi uff.uz nashri.