Qisqa fursatda yulduzlar safidan joy olgan togolezlik forvard, «Tottenxem» va Togo milliy terma jamoasining sobiq futbolchisi bugunga kelib «keraksiz matoh»ga aylangan. Quyida ushbu xavbek fojiasi tarixi haqida hikoya qilinadi
Chindan ham bir paytlar himoyachilarning ofati sanalgan Emmanuel Adebayor uchun hozir yumshoqroq qilib ayt­ganda yorug' kunlar emas. Yaqindagina «Tottenxem» Emmanuel bilan o'rtadagi shartnomani bekor qildi va bu futbolchi endi erkin agent. Forvard kelajagini sobiq murabbiyi - hozirda «Aston Villa»ni boshqarayotgan Tim Shervud bilan bog'layotganlar ham topilsa-da, Emmanuel endi yosh emasligi bu gaplar faqat mish-mish ekanligidan va chindan ham uning ertasi katta so'roq ostidaligidan darakdir.
Eng hayratlanarlisi, Emmanuel erishgan muvaffaqiyatlarda ham emas, aksincha, u yana qancha yutuqlarni qo'ldan chiqarganida. Futbolning haqiqiy ixlosmandlari bu futbolchini sirliligi va o'z etukligiga erishmagani uchun ham sevishardi, ammo aynan shu kamchiliklar futbolchini «sindirgani» ham aniq. Darvoqe, ayrimlargina Emmanuelning haqiqiy tarixidan xabardor va shu bois uning atrofida turli mish-mishlar uya qurgan.
Zero, ingliz jamiyati unga spektakl sahnasidan o'rin berarkan, kostyum kiydirdi va ajratilgan rolga to'g'ri kelish-kelmasligini ham so'ramasdan sahnaga haydadi. Emmanuelning maqsadi esa faqat ko'proq pul topish edi. Vatansiz odam esa har doim aniq maqsadsiz yollangan shaxsligicha qoladi.
Vaqt o'tgani sayin bu qo'rqinchli kartinaga oydinlik kirib boraveradi. Adebayorning katta-katta shartnomalarga mukkasidan ketganligi uni boshqa hamkasblaridan ajratib ko'rsatmas ham: o'z davrining mahsuloti, yuzlab futbolchilardan ayro joyi ham yo'q. Unga esa tashlandiq, dahshat - postanovkada jamiyat sarqitini o'zida aks ettiradigan markaziy rolni berishdi. Emmanuel to'g'risidagi haqiqat esa qayta ishlangan holda kimlarningdir foydasiga o'zgartirildi. Aslida esa hech kim u haqdagi asl haqiqat bilan qiziqmadi, o'zligini o'rganmadi.
Bu esa juda g'alati, ayniqsa Emmanuelning futbol cho'qqisini zabt etishi naqadar og'ir va o'ziga xos bo'lganini e'tiborga olsak. Zero, futbol uning hayotiga aylangandi. 4 yoshigacha u normal holda yura olmasdi va bolaligi onasi bag'rida o'tdi. Bechora volida o'g'ilchasini bag'riga bosgancha davo izlab butun qit'ani aylanib chiqdi va alal-oqibat mo''jiza yuz berdi, bola yugurib ketdi.
Adebayorning o'smirlik payti ham juda og'ir, aytish mumkinki hayratlanarli tarzda kechdi. U 15 yoshida mamlakatni tashlab chiqdi va «Metts» akademiya­siga yo'l oldi. Emmanuelning o'sha payt­dagi do'stlari uni juda oriq, afrikalik xalqlarning an'anaviy kiyimlarida eslab qolishgan. Adebayor atrofini o'rab turgan dunyo to'g'risida juda kam narsani bilar, shu bois akademiyadagi hayotga, og'ir bosimga moslashishi ham oson kechmaganini ta'kidlash zarur. Shu bois u yo oila, yo shon-shuhrat degan og'ir savolga javob izlashga majbur edi va hech kim bu yoshda bunday ahvolga tushmasligi kerak. «15 yoshimgacha men shuhrat uchun emas, oilam uchun to'p tepdim», - deydi Adebayorning o'zi...
Kelajak uchun boshqa barcha narsadan voz kechgan kishini tushunish har doim ham oson kechmaydi. Adebayor «Tottenxem»­daligida atrofini o'zaro ishonchsizlik ruhi o'rab olgandi. Andre Villash-Boash bilan kelisholmagach, u Maurisio Pochettinoni almashtirgan Tim Shervud «qanoti osti»da o'ziga joy topdi. Shundan keyin va nihoyat, u yangi murabbiy boshchiligida o'ynab ketadiganday tuyuldi ham, ammo uning karerasi yana yolg'on mish-mishlar va ayblovlar ostida boshi berk ko'chaga kirib qoldi. Yo'q, afrikalik futbolchi qobiliyatiga bo'lgan ishonch hech qayoqqa yo'qolmagandi, ammo Adeba­yorni dangasalikda, zahira o'rindig'ida o'tirgancha katta-katta pul olishga tayyorlikda ayblashdi. Bunday mish-mishlar qaerdan oyoq olishi esa - qora tarix.
Zamonaviy futbol shu darajaga etib keldiki, undagi mashhurlar xuddi Gollivuddagi yulduzlar kabi ko'zimizga buyuk insonlarday ko'rinmoqda, ularning hech birida dard ham, g'am-tashvish ham yo'qday. Aslida esa bunday emas, Adebayor buning yana bir yorqin namunasi. 2010 yilda Togo milliy terma jamoasi a'zolari tushgan avtobusga hujum uyushtirilganda, bu haqiqiy fojia bo'lgan va voqea jabrlanganlarning dunyoqarashiga ta'sir ko'rsatmay qolmagandi. O'shanda Emmanuel jismoniy emas, ruhiy jihatdan katta talofat ko'rgani aniq. U qonga botgan avtobusdan o'rtoqlarini birma-bir olib chiqarkan boshidan nimalarni o'tkazgani esa hali-hanuz noma'lum.
Bu voqea hasadchilarni to'xtata olmadi. Emmanuel Adebayor milliy terma jamoa safidan ketarkan, buning asosiy sababi sifatida o'sha mash'um voqealarni unuta olmayotganini ko'rsatdi. Ko'pchilik esa buning boisini boshqacha tarzda eshitdi: Emmanuel Adebayor terma jamoadagi maoshlar bonuslaridan noroziligi bois vatanini sotganmish. Asl haqiqatni soyada qoldirgan yana bir yolg'on. 2013 yili Emmanuening inisi Piterning o'limi esa oilani parchalab yubordi.
Tushunilmagan va tuhmatlar ostida qolgan Adebayor ijtimoiy tarmoqda o'zi, onasi, akasi Kolo va singlisi Yabo haqidagi bor haqiqatni hujjatlashtirib qo'yishga qaror qildi.
Bu tarix - his-hayajonlar urushi, jodugarlik, suitsid va jismoniy azoblar haqida. Do'zaxdagiday bu balolardan o'tmagan odamgina futbolni faqat ish deb atashi mumkin. Shaxsiy hayot doimo chang-to'zon ostida, ruhiyat esa og'ir o'tmishning o'ta og'ir fojialari bilan jarohatlangan.
Inson hayotiga aslo mish-mishlarga asoslangan yolg'onu tuhmatlar bilan bilan baho bermaslik kerak. Emmanuel Adebayorning futboldagi faoliyati bilan tanisharkanmiz yulduzlar darajasida qolishiga unga ruhiy jarohatlar to'siq bo'lganini ko'ramiz. Bu salbiy illat ko'pchilik futbolchilarni erta kunda «sindirgani» bo'lsa hech kimga sir emas.
Emmanuel Adebayor esa faqatgina inson, ammo ayrimlar buni unutib qo'yishdi. Bu futbolchi kimlarningdir hurmatiga sazovor bo'lmagandir ham, biroq buning sababini biz ham tushunishimiz kerak. Internet xabarlari asosida I.Murodov tayyorladi Manba: "InterSPORT" gazetasi
— deya xabar beradi uff.uz nashri.