Ortda qolgan 2015 yilgi mavsumni Toshkentning “Lokomotiv” jamoasi tarkibida o'tkazgan Shavkat Mullajonov ayni paytda o'ziga yangi jamoa qidirmoqda. 29 yoshli tajribali himoyachi “Loko”da so'nggi paytlarda kam o'yin amaliyotiga ega bo'lgani sabab shartnomani uzaytirmadi va “temiryo'lchilar” safini tark etishga qaror qilgandi. Ayni paytda futbolchi bir qator jamoalar bilan muzokaralar olib bormoqda. Mahoratli futbolchini poytaxtning boshqa bir jamoasi – “Paxtakor” ham o'z safida ko'rishni istayotgani haqida ma'lumotlar paydo bo'lgan edi. Futbolchining o'zi ham faoliyatini xorijda emas, katta ehtimol bilan yurtimizda davom ettirishini ta'kidladi. Yaqin kunlarda Mullajonovning yangi mavsumda qaysi jamoa sharafini himoya qilishi aniq bo'ladi. Ta'kidlab o'tamiz, Shavkat Mullajonov o'tgan mavsumda “Lokomotiv” tarkibida Oliy Liga doirasida 14 ta bellashuvda maydonga chiqdi va ikki bor hakamlar tomonidan ogohlantirildi.
— deya xabar beradi uff.uz nashri.