Yoki Jahon klublari kino janrlariga qiyos... 2015 yil yakunida doimgidek, xalqaro kino kuni nishonlandi. Championat.com sayti shu bahona ayrim klublarni kartinalar yo'nalishi, ya'ni janrlariga taqqoslab ko'rdi. Qiyosiy o'xshatishlar nechog'li asosli ekanligini maqolani o'qib chiqib, o'zingiz baholashingiz mumkin.
Artxaus
Keng auditoriyaga mo'ljallanmagan filmlar ham o'z muxlislariga ega, albatta. Ko'pchilikka ko'zga tashlanmaydigan jihatlar va qahramonlarning faylasuflashtirilganiga e'tibor qaratish yoqadi. Lekin aksariyat tomoshabinlarga artxaus janridagi 3 soatli kartinalar ma'qul. Ulardagi eng qiziqarli voqealar yakuniy titrlar hisoblanadi. Lui van Gal davridagi «MYu»ning maydonga tushgan futbolchilari ro'yxatini o'qish ularning harakatlarini kuzatishdan qiziqroq tuyulyapti. Garchi murabbiyning g'oyasi aniq-tiniq bo'lsada (raqibning xato qilishigacha qisqa uzatmalar hisobiga to'pni nazorat qilish), «Yunayted» ijrosidagi o'yinni kuzatish azobning o'zginasiga aylandi. Xayriyatki, bu «rejissyor»da xronometraj vaqti ancha cheklangan - 90 daqiqa, xolos.
Bayopik
Bayopik janridagi film muayyan mashhur shaxsga bag'ishlanadi va uning butun hayot yo'lini qamrab oladi. Lekin bunday kartinada ham o'zining yakuniy kulminatsion lavhasi bo'lishi shart. Agar bosh qahramon hayotining shu kulminatsion nuqtasi rejissyorga to'g'ri kelmasa, bundan yomoni yo'q. Ser Aleks Fergyusonning nafaqaga chiqishidan so'ng zamonaviy futbolda o'z murabbiyi qadrini to'la-to'kis aks ettiradigan birgina klub qoldi. Bu - «Arsenal». Arsen Venger hamon transferlarga pul sarflashda ziqnalik qilyapti (raqobatchilari bilan taqqoslaganda, umuman sarflamayapti), shuning barobarida romantik hujumkor futboldan ham voz kechishni istamayapti. Gohida shu tufayli natija qurbon bo'lyapti.
Umuman, «Arsenal» 2000-yillar boshida chempionatda xavfli kuch sanalardi, biroq oxirgi mavsumlarda ko'pincha 4-o'rin sohibi va jarohatlanganlar makoni sifatida gavdalanmoqda. To'g'ri, ayni payt Venger jamoasi yana ko'tarilish jarayonida. Har holda, «kanonirlar» top-klublarga qarshi o'yinlarda o'z ustunliklarini namoyish etyaptilar, o'rtamiyonalarni saviya bo'yicha xotirjam engmoqdalar. Xullas, hozirda jarohatlar tug'yoni klub o'yiniga deyarli ta'sir qilayotgani yo'q. «Manchester Yunayted» oldidagi qiyinchiliklar va «Chelsi»ning inqirozini hisobga olsak. «Arsenal»ning nihoyat, yana chempionlik sururidan bahra olishiga imkoniyati chakki emas. Xullas, hozirgi «Arsenal»ni Arsen Venger bayopikiga qiyoslash qiyin emas. Boz ustiga, uning kulminatsion nuqtasi tobora yaqinlashayotgandek.
Davomi InterFUTBOL gazetasi blogida.
— deya xabar beradi uff.uz nashri.