Ispaniya prokuraturasi "Barselona" hujumchisi Neymarga nisbatan ayblov e'lon qildi.
Unga ko'ra Braziliya terma jamoasi futbolchisi firibgarlik va korruptsiyada ayblanmoqda. Xuddi shunday ayblov uning otasi va "Barselona" prezidenti Xosep Mariya Bartomeuga ham qo'yilgan. Shuningdek klubning sobiq prezidenti Sandro Rosel va "Santos" klubi sobiq prezidenti Odilio Rodriges va Luis Alvaro de Oliveyralar ham ayblanmoqda.
Ushbu ayblovga asos sifatida DIS sarmoya fondi tomonidan bildirilgan da'vo ko'rsatilgan. Unga ko'ra, DIS vakillari Neymarning transferidan 40 foiz mablag' olishlari lozimligini bildirgan. Sarmoya fondi tomonidan bildirilishicha, Neymarning "Barselona"ga qilingan transferidan faqat 17,1 million evro olingan, chunki uning transfer qiymati aslidagidan kamroq qilib ko'rsatilgan. Aslida esa hujumchi 83,3 million evr evaziga sotilgan edi.
DIS shuningdek Neymarni fond bilan kelishuvni buzishda ham ayblamoqda.
— deya xabar beradi uff.uz nashri.