Yangi mavsumga tayyorgarlik jarayonini Toshkent viloyatining Chirchiq shahrida o'tkazayotgan bekobodliklar ayni paytda har kuni ikki mahaldan mashg'ulotlarda qatnashishyapti.
O'z navbatida bu haftaning shanba kuni jamoa a'zolari ikki tarkibga bo'lingan holda o'yin o'tkazishni rejalashtirgan. Klubni tark etgan o'yinchilar haqida ilgari ma'lumot bergandik. Asosiy tarkibning to'rt nafar o'yinchisi – Shahzodbek Nurmatov, Shohnazar Norbekov, Alisher Ziyovuddinov hamda Mirto'ra Akbarovlar kuchlarini boshqa jamoalarda sinab ko'rishga ahd qilishdi. Klub rahbariyati ularning barchasiga “Metallurg”dagi faoliyati uchun minnatdorchilik bildiradi va ularning kelgusi faoliyatlariga omad tilaydi.
Ushbu futbolchilar to'p surgan chiziqlardagi bo'shliqlarni to'ldirish maqsadida esa jamoaga bir qator yangi o'yinchilar taklif etilgan. Ammo ulardan kimlar jamoa bilan shartnoma imzolaydi, bu ko'rik o'yinlaridan keyin ma'lum bo'ladi. “Metallurg” keyingi haftada 3 ta o'rtoqlik o'yinini o'tkazishga kelishib oldi. Dastlabki nazorat uchrashuvi 14 yanvar kuni “Qo'qon 1912” jamoasi bilan bo'ladi. Bu o'yin poytaxtimizdagi “Chilonzor” futbol maydonida o'tkazilishi kutilyapti. 16 yanvarda esa bekobodliklar “Bunyodkor-2” jamoasiga qarshi maydonga chiqishadi. Uchinchi raqib esa “Buxoro”. Bu jamoa bilan uchrashuv qachon va qaerda o'tkazilishi shu kunlarda aniqlanadi.
— deya xabar beradi uff.uz nashri.