"Navbahor"ning bugungi mashg'uloti “Navbahor-Umid” futbol maktabidagi sun'iy qoplamali maydonida bo'lib o'tdi.
Ayni paytda murabbiylar mashg'ulotlarni reja asosida olib borishmoqda. Jamoa ixtiyoriga etib kelgan yarim himoyachi Obid Jo'raboev kecha yakka tartibda shug'ullangandi. Bugun esa Jo'raboev umumiy guruhda shug'ullandi.
Murabbiylar shtabi ko'plab futbolchilarni ko'zdan kechirishda davom etishmoqda. Aynan shu sababli, bugungi mashg'ulotlarda ham ayrim futbolchilar qatnashishdi. Ular orasida muxlislarimizga tanish bo'lgan Dilshod Nazirovni e'tirof etish joiz. O'zlaridan yaxshi taassurot qoldira olgan va “Navbahor”da o'ynashga loyiq ekanliklarini amalda isbotlay olgan futbolchilargina yangi mavsumda jamoa sharafini himoya qilish imkoniga ega bo'lishadi. Ishonchni oqlay olmaganlarga esa javob beriladi.
Jamoamizning Namanganda davom etayotgan ushbu yig'ini 15 yanvarga qadar davom etadi. Shundan so'ng futbolchilarimiz mavsumga tayyorgarlik ko'rish maqsadida Toshkentga yo'l olishadi. Tabiiyki, poytaxt yig'inida nazorat uchrashuvlari ham tashkil etiladi.
— deya xabar beradi uff.uz nashri.