Ertaga jahon futbolidagi eng muhim voqealardan biri bo'lib o'tadi. Ya'ni FIFA 2015 yilning eng yaxshilarini aniqlaydi. Tabiiyki ko'pchilikni mazkur marosimning eng asosiy sovrini “Oltin to'p”ni kim olishi qiziqtirmoqda. Shu bois oltindan bo'lgan to'pni kim qo'lga kiritishi haqida biroz mulohaza yuritishiga qaror qildim.
Lionel Messi
“+” tomonlari: “Barselona” bilan 5 ta sovringa ega chiqdi, Chempionlar ligasi to'purari bo'ldi, Argentina termasi bilan Janubiy Amerika chempionati finaliga chiqdi.
“-“ tomonlari: Ispaniya chempionati to'purari bo'la olmadi, ikki oy jarohat oldi
“Oltin to'p”ni olish imkoniyati: 50 %
Ko'pchilik bu yil “Oltin to'p”ni “Barselona” hujumchisi Lionel Messi qo'lga kiritishiga shubha qilmayapti. Buning o'ziga hos sabablari bor albatta. Leo o'tgan yil davomida klubi bilan birgalikda 5 ta musobaqada zafar quchdi, terma jamoasi safida qit'a chempionati finaliga qadar etib bordi. Uning ikki oy davomida futboldan tashqarida yurgani ham bu sovrinni olishiga halaqit qila olmaydi. Zero, argentinalik jarohat olgan payti, uning raqobatchisi bo'lgan Ronaldu o'zini ko'rsata olgani yo'q. Shaxsiy fikrimcha sovrin Messiga nasib etadi.
Neymar
“+” tomonlari: “Barselona” bilan 5 ta sovringa ega chiqdi, Chempionlar ligasi to'purari bo'ldi, bu yil La ligada to'purarlik qilmoqda
“-“ tomonlari: Terma jamoasi bilan qit'a chempionatida omadsizlikka uchradi, o'tgan mavsumda la Ligada ko'p gol ura olmadi
“Oltin to'p”ni olish imkoniyati: 20 %
Messi yo'q paytida “Barselona”da Neymar katta sahnaga chiqdi. Biroq “Oltin to'p”ni qo'lga kiritish uchun ikki oy super o'yin namoyish etish kamlik qiladi. Neymar o'tgan mavsumda baribir Leoning soyasida qolib ketdi. Braziliya termasi bilan qit'a chempionatidagi muvaffaqiyatsizligi ham sovrinni qo'lga kiritishi uchun halaqit beradi. Agar ushbu mavsumni Neymar bir tekisda davom ettirsa, 2016 yilning “oltin to'p”i braziliyalikka nasib etishi mumkin. Hozircha esa u 3-o'rin bilan kifoyalanib, sabr qilishiga to'g'ri keladi.
Krishtianu Ronaldu
“+” tomonlari: Ispaniya chempionati to'purari bo'ldi, Chempionlar ligasi to'purari bo'ldi, “Oltin butsa”ni qo'lga kiritdi, Chempionlar ligasida guruh bosqichida gol urish bo'yicha rekord o'rnatdi, 2 marta “penta-trik”ka erishdi, hammadan ko'p gol urdi.
“-“ tomonlari: Jamoasi bilan sovrinsiz qolib ketdi, muhim o'yinlarda gol ura olmadi.
“ Oltin to'p ” ni olish imkoniyati : 30 %
2015 yil Ronaldu hammadan ko'p gol urdi. U 57 uchrashuvda shuncha gol kiritishga erishdi. O'zi ishtirok etgan musobaqalarda bosh to'purarga aylandi, yil davomida ikki o'yinda beshtadan gol ham urdi. Biroq “Real” bilan sovrinlarga ega chiqa olmagani unga pand berdi. Beshtadan turnirda zafar quchgan ikki futbolchi qolib ketib, sovrin ololmagan futbolchi “Oltin to'p”ni qo'lga kiritsa adolatdan bo'lmas.
Bu sovrin shaxsiy natijalariga qarab beriladi, shuning uchun ham Ronaldu “oltin to'p”ga loyiq deb o'ylarsiz balki, biroq portugaliyalik muhim o'yinlarda gol ura olmadi. Shuning uchun ham uning imkoniyatlari pasayib ketdi. Ronaldu katta ehtimol bilan so'rovnomada 2-o'rinni qo'lga kiritadi.
Davomi Furqat Yusupov blogida.
— deya xabar beradi uff.uz nashri.