Ko'hna qit'ada nufuz borasida ikkinchi o'rinda turuvchi Evropa Ligasi musobaqasida o'rtamiyona jamoalarning ishtirokiga ko'nikkanmiz. Lekin shunday holatlar ham uchraydiki, ushbu turnirga EChLda g'oliblikka asosiy da'vogarlardan biri sifatida qaralgan grand klublar ham qo'shilib qolishadi. Xususan, 2015|2016 yillar mavsumini omadsiz o'tkazayotgan «MYu» shular jumlasidan. Buni qarangki, kuchlilarning ELda qatnashishi avvallari ham uchragan ekan. FootballHD.ru xuddi shu mavzuda so'z yuritadi.
«Arsenal» (1999|2000)
Joriy mavsum Afinada «Olimpiakos» ustidan qozonilgan g'alaba (3:0) «to'pchilar»ni Evropa Ligasiga tushib ketishdan saqladi. Ammo 15 yil avval «Fiorentina»dan qabul qilingan mag'lubiyat ularni UEFA kubogiga «haydagandi».
O'shanda Arsen Venger shogirdlari finalgacha o'tkazilgan o'yinlarda yomon ko'rinishmadi: «Nant», «Deportivo», «Verder» hamda «Lans» taslim etildi. Biroq golsiz o'tgan finalning penaltilar seriyasida omad Turkiyaning «Galatasaroy» jamoasiga kulib boqdi.
«Barselona» (2000|2001)
«Barselona» Evropa Ligasida? Tasavvur qilish qiyin, ammo 2000|2001 yillar mavsumida «Milan» va «Lids» (yo'q, xato yozilmagan) kataloniyaliklarning guruhdan chiqishlariga yo'l qo'yishmadi. Natijada, «Barsa» o'z kuchini UEFA kubogida sinashga majbur bo'ldi.
Luis Enrikening gollari evaziga «Bryugge» va AEK taslim etildi, keyinchalik esa chorak finalda «Selta» mag'lubiyatga uchratildi. Lekin finalga chiqish yo'lida ularga «Liverpul» to'g'anoq bo'ldi: Gari Makallisterning penaltidan urgan goli kataloniyaliklarni musobaqadan chiqarib yubordi.
«Liverpul» (2002|2003)
Chempionlar Ligasi guruh bosqichi. Raqiblar - «Valensiya», «Bazel» va «Spartak». 6ta o'yinda 2ta g'alaba. Bu esa liverpulliklarning UEFA kubogida qatnashishlarini anglatardi.
Jerar Ule shogirdlari «Vitess» hamda «Oser» ustidan qozonilgan g'alabalar evaziga chorak final yo'llanmasini qo'lga kiritishdi. Biroq «Seltik»ka qarshi o'yinda «qizillar»dan omad yuz o'girdi. Go'yoki, o'sha bahsda «Liverpul»ning zafar quchishi aniqdek edi, ammo shotlandlar ikkinchi bo'limni yuqori kayfiyatda o'tkazib, yakunda niyatlariga etishdi. So'nggi daqiqalarda Alan Tompson hamda Jon Xartson tomonidan urilgan gollar afsonaviy Xenrik Larsson o'ynagan jamoani keyingi bosqichga olib chiqdi.
«Inter» (2003|2004)
Balki «Arsenal»dan keyin ikkinchi bo'lish sharmandali emasdir, ammo Moskvaning «Lokomotiv» klubini mag'lubiyatga uchratolmaslik - ko'pchilik uchun kutilmagan holga aylandi. «Neradzurri»ga ishonch etishmadi, go'yoki karaxt holatdan hamon chiqa olmagandek edilar. «Sosho»ga qarshi bahsdagi bo'sh o'yindan so'ng «Benfika»ning taslim etilishi italiyaliklarning asabini biroz tinchlantirgandek tuyulgandi. Ammo Dide Drogba boshchiligidagi «Marsel» «Inter»ning barcha umidlarini chippakka chiqardi. O'z navbatida, Frantsiya klubi finalda «Valensiya»ga imkoniyatni boy bergandi.
Davomi InterFUTBOL gazetasi blogida.
— deya xabar beradi uff.uz nashri.