23 yoshgacha bo'lgan futbolchilar o'rtasidagi Osiyo chempionati starti oldidan O'zbekiston Futbol Federatsiyasi matbuot xizmati O'zbekiston olimpiya terma jamoasi hujumchisi Igor Sergeev bilan intervyu uyushtirdi.
Sergeev suhbat davomida jamoa oldidagi vazifalar, raqiblar va jamoaning tayyorgarligi borasida to'xtalib o'tdi.
“Osiyo chempionatidaga eng asosiy maqsadimiz — Olimpiyada o'yinlariga yo'llanmani qo'lga kiritish. Shu bilan birgalikda, albatta, birinchi o'rin uchun ham kurashamiz. Raqiblarimiz juda kuchli. Yaman terma jamoasi Osiyo chempionatlarining doimiy ishtirokchisi emasligiga qaramay, men bu jamoaga qarshi o'ynaganman va ularning qanday kuchga ega ekanini yaxshi bilaman. Umuman olganda, chempionatda kuchsiz jamoaning o'zi yo'q”.
“Musobaqadagi ilk raqibimiz — Janubiy Koreya turnirdagi eng kuchli jamoalardan biri. Ammo har qanday kuchli raqibning ham ojiz tomonlari bo'ladi. O'ylaymanki, biz ularning mavjud kamchiliklaridan unumli foydalana olamiz. Umid qilamanki, g'alaba biz tomonda bo'ladi. Iroqliklarga keladigan bo'lsak, bu jamoaning kuchli jihati — ular uzoq yillardan beri birga o'ynab kelishadi. O'smirlar, yoshlar o'rtasidagi chempionatlarda ham bu jamoaning tarkibi deyarli hozir olimpiya terma jamoasiga a'zo bo'gan futbolchilardan iborat edi. Ammo biz ularning ham o'yinlarini juda yaxshi o'rganib chiqqanmiz. Kuchli va kuchsiz jihatlarini bilamiz. Eng asosiysi — har bir o'yinda yakkakurashlarda ustunlik qilish, bor kuchimizni ishga solish va murabbiy ko'rsatmalarini bajarish, deb hisoblayman”.
“Katta musobaqalarda qatnashish tajribasi, albatta, yordam beradi. Lekin bu hal qiluvchi ahamiyatga ega emas, baribir. Jamoada bu tajribaga ega bo'lmagan yigitlar ham bor va men bu narsa ularga halal beradi, deb o'ylamayman. Tajriba o'yindagi ayrim epizodlarda, tezda qaror qabul qilish lozim bo'lgan vaziyatlarda qo'l keladi. Eng muhim pallada vaziyatlarni sovuqqonlik bilan hal qilishda tajriba namoyon bo'ladi. Boshqa tomondan, olimpiya terma jamoasi safida Osiyo chempionatida qatnashish ham men uchun yangi bir tajriba. Bu erda ham nimadir o'rganishim va keyin bu milliy terma jamoa safidagi o'yinlarda ham qo'l kelishi mumkin”.
“Jamoaga to'liq ishonaman. Bu yigitlar ushbu yoshdagi futbolchilar orasida O'zbekistonda eng kuchlilaridir. Agar yigitlar bor imkoniyatlarini ishga solsa, chempionlik — orzu emas, erishsa bo'ladigan maqsad biz uchun”.
— deya xabar beradi uff.uz nashri.