Barchangizga ma'lumki, ertaga Qatar poytaxti Doxa shahrida 23 yoshgacha bo'lgan futbolchilar o'rtasida Osiyo chempionati boshlanadi. Mazkur musobaqa 12-30 yanvar kunlari bo'lib o'tishi rejalashtirilgan. O'zbekiston olimpiya terma jamoasi ushbu musobaqada vatanimiz sharafini himoya qiladi.
Samvel Babayan shogirdlari oldiga Rio-de-Janeyro shahrida bo'lib o'tadigan yozgi Olimpiya o'yinlariga yo'llanmani qo'lga kiritish vazifasi qo'yilgan. Bo'lajak musobaqada O'zbekiston U-23 terma jamoasi oldiga qo'yilgan vazifani bajara olarmikan? Bir vaqtning o'zida Milliy terma jamoani boshqarayotgan Samvel Babayan buning uddasidan chiqadimi?  Bugun, olimpiya termasining Osiyo chempionatidagi imkoniyatlari haqida qisqacha to'xtalib o'tamiz.
Kuchli raqiblar
Qur'a natijalariga ko'ra, O'zbekiston olimpiya terma jamoasi “S” guruhidan joy olib, Janubiy Koreya, Iroq hamda Yaman terma jamoalari bilan bahs olib boradigan bo'ldi. Olimpiyachilarimiz guruh bosqichida dastlab, 13-yanvar kuni Janubiy Koreya bilan bahs olib borsa, navbatdagi o'yinlar Iroq (16-yanvar) va Yaman (19-yanvar) olimpiya termalariga qarshi bo'lib o'tadi.
Guruhdagi asosiy raqibimiz, shubhasiz, Janubiy Koreya hisoblanadi. Umuman olganda, janubiy koreyaliklar barcha davrlarda bizga noqulay raqib bo'lib kelgan. Musobaqa miqyosida esa Avstraliya, KXDR, Xitoy va Eron yo'limizga to'g'anoq bo'lishi mumkin bo'lgan kuchli raqiblardandir. Mazkur chempionat Qatarda o'tayotganini inobatga olsak, arab jamoalari boshqalarga nisbatan qo'proq dalda va muxlislar qo'llab-quvvatlashishiga ega bo'ladi. Bu holat esa yoshlarimizga qarshi xizmat qilishi mumkin.  
Kuchli tarkib
Olimpiya terma jamoamiz tarkibida kuchli o'yinchilar borligi bilan doimo ajralib turgan. Igor Sergeev, Jamshid Iskanderov, Eldor Shomurodov kabi yosh va iqtidorli futbolchilar milliy terma jamoa darajasiga etib ulgurgan bo'lsa, Jaloliddin Masharipov, Dostonbek Hamdamov, Javohir Sohibov kabi o'yinchilar allaqachon Oliy Ligada etarlicha tajriba to'plashga ulgurishdi va endi ulardan xalqaro maydonda ham o'zlarini ko'rsatish talab etiladi.
Shuningdek, Serbiya Superligasida faoliyat olib borayotgan Husniddin G'ofurov ham o'zining faolligi, tezkor o'yini va kiritayotgan gollari tufayli Samvel Babayanning e'tiborini jalb qildi va olimpiya terma jamoasiga chaqirildi.
Olimpiya terma jamoasi shu darajada kuchli va etuk futbolchilar bilan to'lgan-ki, Rustam Ashurmatov, Diyor Turopov, Zabihillo O'rinboev va Shoxnazar Norbekov kabi yosh va mahoratli futbolchilar Samvel Babayanning kengaygan tarkibidan chetda qolib ketishdi.
Olimpiya terma jamoasi darajasida o'ynay oladigan Odil Hamrobekov va Bobur Yo'ldoshev esa, afsuski, tibbiy ko'rikdan o'ta olmagani uchun Doxaga bora olmaydigan bo'lishdi. Tarkib borasida muammolar umuman yo'q, demak, belgilangan vazifani qiyinchiliksiz uddalasa bo'ladi.
Ikki termani bir vaqtda boshqarish. Bu to'g'rimi?
Shu kunga qadar Olimpiadaning futbol bo'yicha musobaqalariga chiqish uchun terma jamoamizning barcha urinishlari muvaffaqiyatsiz yakunlangan. Eng qizig'i, har safar Olimpiada yo'llanmasi uchun kurashda olimpiya terma jamoasiga Milliy terma jamoaning bosh murabbiylari tayinlangan edi. Ikki qayiqni bir vaqtda boshqarmoqchi bo'lgan murabbiylar esa har safar dengiz tubiga "g'arq bo'lishgan".
Davomi Zohid Akramov blogida.
— deya xabar beradi uff.uz nashri.