Mahoratli hujumchi Stiven Neysmit Shotlandiyadan Angliyaga ko'chib o'tgach, gazetalarning muqovasida kam ko'rinish berdi: sermahsullik bobida «Everton» muxlislarini xursand qilolmadi, bunga asosiy sabab esa uning universal ekanida. Gol urish Stiven uchun birinchi o'rinda turmaydi, mojarolardan yiroq yurdi. Yaqinda «Chelsi» darvozasiga uchta gol urgan Neysmitda Britaniya futboli ixlosmandlariga o'zini eslatib qo'yish imkoniyati tug'ildi. Ammo bu safar ham yakuniy xulosada uning nomi chetda qoldi: barchasiga London jamoasidagi inqiroz bosh sabab vazifasini o'tagani ilgari surildi. Shunga qaramay, shotlandiyalik forvardning futbol maydonidan chetdagi ishlari tahsinga sazovor.
«Everton» va Shotlandiya termasi a'zosi dovruq qozonish yo'lida yana bir ibratli ishga qo'l urdi: 2015 yili Glazgodagi boshpanasiz faqirlar uchun uyushtirilgan rojdestvo dasturxoniga homiylik qildi. Mazkur tadbirni Loaves and Fishes deb nomlanuvchi milliy xayriya kompaniyasi o'tkazdi. E'tiborlisi, Stiven ofitsiant vazifasini bajarishga rozi bo'lib, mehmonlar bilan mazmunli suhbat qurdi.
- «Reynjers» safida o'ynagan paytimda jarohatlar menga tinchlik bermay qo'ygandi. Uzoq vaqt mobaynida maydonga chiqolmadim. Shunda bo'sh vaqtimdan unumli foydalanishga qaror qildim: Denis Kyorran, uning rafiqasi Keti hamda bir guruh ko'ngillilar bilan gaplashib, ularga o'z yordamimni taklif etdim. Ko'makka muhtoj odamlarni qo'llab-quvvatlashga hamisha tayyorman. Glazgodagi boshpanasizlarni topib, tansiq taomlar bilan siyladik, zarur buyumlar va kiyim-kechak bilan ta'minladik. Ular o'z navbatida, iliq munosabat uchun bizga minnatdorchilik bildirishdi. Menimcha, bu kabi kamtarona xatti-harakatlar ham ko'pchilikni ezguliklar sari undashi, shubhasiz, - dedi Neysmit Liverpool Echoga bergan intervyusida.
- Biz Stivenning ibratli ishlarini yuksak baholaymiz. Gap uning fond uchun ajratgan pullarida emas, aksincha, e'tiborning o'zi tahsinga loyiq. U benazir inson, bizni aslo unutmayapti. Neysmitning hayot tarzi boshpanasiz kimsalarnikidan tubdan farqlanadi, lekin ularni rag'batlantirishdan aslo charchamaydi, - dedi Denis Kyorran futbolchini e'tirof etarkan.
Bu Stivenning ijtimoiy jihatdan zaiflarga berayotgan birinchi yordami emas. O'tgan yilning avgustida shotlandiyalik hujumchi Toks­tetdagi bandlikka ko'maklashish markaziga tashrif buyurib, ishsizlarga «Everton»ning premer-ligadagi o'yinlariga kirish uchun chiptalar tarqatdi. Shu tariqa ularga ruhiy tetiklik baxsh etishni maqsad qildi. Tokstet - mashhur The Beatles guruhi vakillarining ulg'ayishiga guvoh bo'lgan maskan. Bugun esa u Liverpulning eng qashshoq hududlaridan biriga aylangan. Avvallari bu erdagi aholi (30 mingga yaqin kishi) janubdagi doklarda mehnat qilishgan, ayni paytda esa port ularning atigi 15 foizigagina ish taklif eta oladi, xolos. Ommaviy ishsizlik jinoyatlarning ortishiga sabab bo'lmoqda: o'g'rilik Tokstetga xos illatlardan biriga aylangan. Mahalliy aholi mazkur holat «Liverpul to'rtligi»ga kiruvchi shaharning obro'siga putur etkazayotgani, ammo muammoni bartaraf etish oson emasligini ta'kidlashmoqda.
- Men Ayrshirda tug'ilganman. Shotlandiyaning janubi-g'arbida joylashgan ushbu maskanda ham ishsizlik avj olgandi. Liverpulda shunga o'xshash holat guvohiga aylandim. O'tgan yillardagi xayriya aktsiyalari ko'plab ijobiy holatlarga sabab bo'ldi. Yigitlar nihoyat, ish topishgani, yana ko'ngildagidek hayot kechirishayotgani uchun menga minnatdorchilik bildirishdi. Shu bois, 2015 yilda ularni yanada rivojlanishga undashga qaror qildim, - dedi Neysmit.
Davomi InterFUTBOL gazetasi blogida.
— deya xabar beradi uff.uz nashri.