Gollandiya hamisha iqtidorlarga boy bo'lgan. Mark van Bommel ulardan biridir. Ushbu futbolchi 1992-2013 yillar mavsumidagi faoliyati davomida faqat etakchi klublarda to'p surdi.
Faoliyatini PSVda boshlagan Bommel keyinchalik «Barselona», «Bavariya» va «Milan» klublari sharafini himoya qildi. Shuningdek, Gollandiya terma jamoasi safida 79ta o'yin o'tkazib, raqiblar darvozasini 10 marta ishg'ol qildi. Ayni paytda faoliyatini yakunlagan 38 yoshli van Bommel yaqinda FIFA.com saytiga intervyu berdi.
- Mark, ayni paytda nimalar bilan mashg'ulsiz?
- Garchi faoliyatimni yakunlagan bo'lsamda, bo'sh emasman. Aksariyat muxlislar futbolchi butsasini mixga ilganidan so'ng bemalol hordiq chiqarishi mumkin, deb o'ylashadi. Aslida, unday emas. Tez orada murabbiylik kurslarini yakunlayman. Ayni paytda Saudiya Arabistoni terma jamoasida bosh murabbiy yordamchisiman. Farzandlarim futbol va tennis o'ynashadi. Ko'p vaqtimni ularga sarflayapman.
- Sizni qachon bosh murabbiy sifatida ko'rishimiz mumkin?
- Bir nechta takliflar oldim. Lekin eng avvalo, murabbiy sifatida o'sishim kerak.
- Sobiq jamoangiz «Bavariya» Karlo Anchelotti bilan shartnoma imzolashdan oldin murabbiy qidirdi. Endi italiyalik mutaxassis yozda jamoani qabul qilib oladi. Nima deb o'ylaysiz, myunxenliklar sizdan oldin uni ta­yinlab shoshilishmadimi?
- (Kuladi) albatta shoshilishdi.
- «Bavariya»ning hozirgi ustozi Pep Gvardiola jamoa uchun qanchalik muhim?
- Undan oldin ishlagan Xaynkes va boshqalar o'z ishlarini qoyilmaqom bajarishgan. Masalan Yupp bilan «Bavariya» yuqori marralarni zabt etdi. Biroq  Gvardiola o'ziga xos murabbiy, jamoa uchun alohida ahamiyat kasb etadi.
- Anchelotti haqida qanday fikr bildirasiz?
- Murabbiy sifatida Karlo yaxshi mutaxassis. Shuningdek, u nomdor futbolchilar bilan til topisha olishini isbotladi. Yana bir e'tiborli jihati, Anchelotti futbolchilik paytida ham yuqori natijalarga erishgan. Bu jihat ham murabbiylik faoliyatini tanlaganidan so'ng qo'l keladi.
- Neymar, Krishtianu Ronaldu yoki Lionel Messi: ulardan qay biri «Oltin to'p»ni yutadi?
- Menimcha, Messi yoki Neymar. Chunki «Barselona» o'tgan yili barcha turnirlarda g'olib chiqdi.
- Gollandiya terma jamoasining Evro-2016 yo'llanmasini qo'lga kirita olmaganidan qanchalik qayg'urdingiz?
- Albatta, achindim. Agar Islandiya, Turkiya va Chexiya bilan bir guruhdan joy olib, uchinchi o'rinni egallay olmasangiz, Evropa chempionatiga borishingizga hojat yo'q. Umuman olganda, jamoa yosh. Shakllanish uchun esa vaqt kerak. Biroq Gollandiyada har qanday nufuzli turnirga chiqish shart qilib belgilangan.
- Mamlakat futbolining bugungi kundagi muammosi nimadan iborat?
- So'nggi paytlarda jamoa 4-3-3, 3-4-3, 5-3-2 va 4-4-2 sxemalaridan foydalandi. Menimcha, jamoaning bir xil uslubda o'ynashini ta'minlash lozim. Chunki terma jamoaga futbolchilar qisqa muddatga kelishadi. Aniq bir usuldan foydalanilsa, ularning moslashishlari osonroq kechadi.
- Sizningcha, Evro-2016da kim g'olib chiqadi?
- Germaniya, hamisha favoritlar safida. Frantsiya va Ispaniyani ham da'vogarlar qatoriga kiritish mumkin. Shuningdek, bu musobaqada Belgiyadan ko'p narsa kutsa bo'ladi.
Davomi InterFUTBOL gazetasi blogida.
— deya xabar beradi uff.uz nashri.