Sport muxlislari uchun yangi “Debat” deb nomlanuvchi loyihani boshladik. Loyihada sport jurnalistlari Elmurod Ermatov va Sherzod Sodiqov o'zbek sportining og'riqlari nuqtalari borasida munozara yuritadi. Ilk tahliliy materialimiz mamlakatimiz futbol bo'yicha Oliy ligasida echimini kutib turgan mavjud muammolar haqida.   
 
E. E. : - Oliy ligamiz hozirgi holatida hech kimga yoqmayotgani bor gap. Kunda-kun ora tanqid. Lekin har qancha tanqid qilingani bilan aytarli o'zgarishlar yo'q, to'g'rimi?
Sh. S. : - Ha, hozir quruq tanqid bilan ish bitmaydi. Chunki muammolar barcha yo'nalishlarda to'lib yotibdi.
E. E: -  Ayniqsa, OFK vakillari klublarimizni o'rganish uchun kelgan paytda mavjud muammolar yaqqol ko'rinib qolmoqda. Ayrim klublar vaziyatdan chiqish uchun nomigagina u-bu ishni qilgan bo'lyapti-yu, keyin hammasi avvalgi holiga tashlab qo'yilyapti. Holbuki, milliy chempionat saviyasini oshirish uchun jiddiy harakatlarni boshlaydigan payt keldi.
Sh. S. : - Avvalo, hozirgi ahvol haqida to'liq tasavvurga ega bo'lish uchun O'FF keng qamrovli monitoring o'tkazishi kerak. Chunki futbolni ommalashtirish, jamoalarni mablag' bilan ta'minlash, ularga etarlicha sharoit yaratish borasidagi ishlar hamma erda har xil. Qaerda qanday muammo borligini aniqlab olmasdan turib, kamchiliklarni yoppasiga bartaraf etib bo'lmaydi.
E. E. : - Hozirgi vaziyatda hamma narsa muhim. Aytaylik, birorta yosh o'yinchi bugun terma safida to'p surib, ertasiga g'oyib bo'lib qolsa, mutasaddilardan hech kim uning taqdiri bilan qiziqib ko'rmayapti. Ehtimol u ruhiy daldaga yoki moddiy yordamga muhtojdir? Vaqtida ko'ngil so'ramaslik, yordam bermaslik oqibatida qanchadan-qancha iste'dodlar chetga chiqib qolayotganini avvalo joylardagi federatsiyalar va klublarning rahbarlari o'ylab ko'rishlari zarur.
Sh. S. – Murabbiylar saviyasi-chi? Bu masala ham ko'pincha e'tibordan chetda qolyapti. To'g'ri, ular uchun o'quv kurslari, seminarlar tashkil etilmoqda. Mashg'ulotlarga tajribali mutaxassislar va instruktorlar taklif qilinyapti. Bunisiga rahmat. Biroq litsenziyani qo'lga kiritgan aksariyat murabbiylarda zamonaviy ruhda ishlash salohiyati ham, yangi g'oyalar ham yo'q. Ularning deyarli barchasi ilgari o'zlari ko'rgan usullardan foydalanish bilan cheklanib qolyapti. Masalan, jamoa mashg'ulotiga keladi-da, eski uslubda bir nechta mashqlarni bajartiradi, tamom-vassalom. O'yinda ham bir xil taktika. Tabiiyki, bir xillik futbolchilarni zeriktirib yuboradi.
E. E.: - Bilimga chanqoq, ishtiyoqmand murabbiylar ham bor-ku!
Sh. S. : Borlikka bor, biroq ularni chet elda o'qitib, malakasini oshirmaydigan bo'lsak, xalqaro maydonda oqsab yuraveramiz. Oliy ligamiz ham qotib turaveradi. Shu bois Evropa klublari bilan aloqa o'rnatib, murabbiylarni malaka oshirish uchun yuborgan ma'qul.
E. E. : - Men ham shu haqda ko'p o'ylayman. Lekin ularni chet elga yuborish uchun pul kerak. Klublarimiz moliyaviy muammolarga o'ralashib yurgan paytda ortiqcha harajatning nima keragi bor?
Sh. S. : - U holda O'FF mavjud muammolarga echim topish uchun maxsus loyiha tayyorlashi lozim. Loyihada oliy liga saviyasini oshirish masalasiga kengroq o'rin ajratilishi darkor. Uni bajarish mas'uliyati esa, tabiiyki, PFL zimmasiga tushadi.
E. E. : - PFL buni eplay olarmikan? Axir shundoq ham bu tashkilot kalavaning uchini topa olmay hammaning xunobini oshirib yuboryapti.
Sh. S. : Eplaydi, eplamay qayga borardi? Agar O'FF rahbariyati maxsus rejani o'rtaga tashlasa, PFL ahvolni o'nglash uchun ishga kirishadi. Chunki bu tashkilotda tashabbuskorlikdan ko'ra ijro intizomi kuchli. Reja qo'liga berib qo'yilsa, uni bajarish yo'llarini izlaydi.
E. E. : - Baribir bunga ishonish qiyin. Axir oddiygina taqvim masalasi bir necha yillardan beri pala-partish. Ayting-chi, mavsum davomida o'yinlar sanasining tez-tez o'zgartirilishi kimga yoqyapti? Masalan, O'zbekiston Kubogi finalini hali u, hali bu sanaga ko'chirish bilan nimaga erishildi? Aytarli hech narsaga. Toqayta muxlislarning PFL rahbariyatiga  ishonchi yanada pasaydi xolos. Aslida final har yili bitta sanada o'tkazilsa yaxshi emasmi? Shunda ishqibozlar o'sha kunni orziqib kutishga odatlanib qolishadi.
Sh. S. : Nimasini kutadi? Kim g'olib chiqishi oldindan sezilib turadigan o'yinlarning kimga qizig'i bor? Muxlislarga yashil maydonda haqiqiy “jang” kerak. Ularni “spektakllar” bilan aldamaylik.
E. E. : “Spektakllar” borligini inkor etmaymiz. Hattoki, bu yil bitta kelishilgan o'yin to'g'risida baralla aytildi. Bunday o'yinlarning ildiziga bolta urish uchun O'FF birinchi qadamni ham tashladi.
Sh. S. : - Ikkinchi qadamni qachon tashlaydi? Agar va'dalar og'izda qolib ketsa, O'FF ham xuddi PFL kabi obro'sini yo'qotadi.
E. E. : - Ehtimol shundaydir, lekin xulosa chiqarishga shoshilmaslik kerak. Darvoqe, “Paxtakor” klubining PFL tomonidan ogohlantirilganini ko'pchilik ikkinchi qadam, deb o'yladi-ku?
Sh. S. : - Yo'q, bular tamoman boshqa-boshqa narsalar. Axir, klub qarzdorligining kelishilgan o'yinlarga nima aloqasi bor?
E. E. : - Men ham shu fikrdaman, lekin ozgina sabr qilaylik-chi, balki ko'pchilik kutayotgan voqea ro'y berib qolar?
Sh. S. : - Umidvorlik yaxshi albatta, biroq muxlislar kutaverib charchashdi. Bu kutish kelishilgan o'yinlar bilangina bog'liq emas. Masalan, oliy ligada kim o'ynaydi – “Obod”mi yoki “Dinamo”mi? Bu savol ochiq turibdi.  Buning ustiga nega endi “Dinamo” degan savol ham bor. “Oqtepa”-chi? Axir birinchi ligada 2-o'rinni olgan shu jamoa emasmi?
E. E. : - Menimcha, “Obod” chetga chiqqan taqdirda ham aynan “Oqtepa” uning o'rnini egallashi kerak. Chunki birinchi liganing ikkala peshqadami haqli edi elitada o'ynashga.
Sh. S. : - Mabodo “Obod” joyni bo'shatadigan bo'lsa, hech yo'g'i “Dinamo” bilan “Oqtepa” o'rtasida o'yin o'tkazilishi lozim. Kim yutsa, o'sha jamoa o'ynasin oliy ligada! Shunda sport tamoyillariga putur etmaydi, hammasi haqqoniy bo'ladi.
E. E.: - Bu yog'i endi PFL qaroriga bog'liq. Hozir uning oldida boshqa muammolar ham ko'p. Masalan, maydonlar sifati, hakamlar saviyasi, legionerlar keldi-ketdisi... Birinchi navbatda reglamentga qat'iy rioya etilishini nazorat qilish kerak. Hakamlar ishini ham xolisona baholash zarur. Chunki o'yinni xatolar bilan boshqargan hakamlarga yuqoriroq ball qo'yilganini ko'rgan muxlislar doim jig'ibiyron. PFL rahbariyati masalaning shu tomonlarini qachon o'ylab ko'radi? Mabodo ahvolni o'nglay olmasa, joyni bo'shatib qo'ygani ma'qul.
Sh. S. : - Joyni-ku, osonlikcha bo'shatmaydi, lekin topshiriq berilsa, bajaradi. Hozirgi vaziyatni ko'rib turibsiz: barcha klublarimiz zarar bilan ishlaydi, futbolchilarni sotib pul topay desa, ko'rikka borgan o'yinchilarimizni Evropa klublari nafsoniyatimizga tegmaydigan qilib, ya'ni “keyinroq yana bir ko'rikdan o'tkazamiz”, deb qaytarib yuborishmoqda. Chet eldan kuchli o'yinchilarni olib kelishga esa katta miqdorda pul kerak. Menejment, marketing yo'nalishlarini kuchaytirib pul topsa bo'ladi, ammo klublarimiz buning mohiyatini anglab etishmagani bois hamma ishlar chala yotibdi.
E. E. : - Lekin ishlash uchun sharoitlar bor-ku! Ilgari elitamizdagi ayrim jamoalar tuzukroq stadion va bazaga ham ega emas edi. Endi qaysi shaharga bormang, ko'rkam va barcha qulayliklarga ega bo'lgan stadionlar-u bazalarga ko'zingiz tushadi. Moliyaviy ta'minot ham chakki emas.
Sh. S. : - Biroq aksariyat jamoalar pulni tejamasdan, “ertaga bir gap bo'lar” qabilida ish tutib, o'zlarini boshi berk ko'chaga kiritib qo'yishyapti. Shu bois jamoatchilik nazorati o'rnatilsa maqsadga muvofiq bo'lardi.
E. E. : - Bunday nazorat naf berarmikan?
Sh. S. : - O'zingizga ma'lum, jamoatchilik nazorati jamiyatda ildiz otgan illatlarni, ularning kelib chiqish sabablarini bartaraf etishda muhim o'rin tutadi, to'rachilik va korruptsiyaga qarshi kurashning samarali vositasi hisoblanadi. Uni fuqarolar, ommaviy axborot vositalari, siyosiy partiyalar, jamoat birlashmalari, kasaba uyushmalari singari fuqarolik jamiyati institutlari amalga oshirishadi. Shundan kelib chiqsak, klublarning rahbarlari muayyan davr ichida amalga oshirilgan ishlar hamda sarf-harajatlar haqida homiylar, jamoa muxlislari va OAV oldida hisobot berib turishlari kerak. Axir klub ishlatayotgan pullar ko'chadan supurib olinayotgani yo'q!
E. E. : - Shunday bo'lgani yaxshi albatta, ammo klublar rahbariyati oshkoralik tamoyiliga amal qilishiga ishonish qiyin. Chunki ular oddiy narsalarni ham sir tutishga odatlanib qolishgan. Hatto, u yoki bu futbolchi qancha maosh olishini yashirishadi. Aslida klublar oldiga qo'yiladigan talablar ko'p: moliyaviy holatni barqarorlashtirish, maoshlarning uzluksiz to'lanishini ta'minlash, futbolchilar keldi-ketdisini iloji boricha kamaytirish, murabbiylarni qo'lqopdek almashtiravermasdan, bir joyda uch-to'rt yil ishlashiga imkon berish, imkon berilganidan keyin raqobatbardosh jamoa shakllantirilishi uchun etarli sharoitlarni yaratish...
Sh. S. : - Bular ijobiy hal etilishini muxlislar qancha kutishlari kerak? Axir futbol ular uchun o'ynaladi.
E. E. : - Hozircha kutishga majburmiz. Ehtimol, tez orada jiddiy o'zgarishlarga guvoh bo'larmiz?.. “Sport yangiliklari” gazetasi va
UFF.uz internet nashri uchun tayyorlandi
— deya xabar beradi uff.uz nashri.