Ma'lumki, 2015 yilning 14 iyul kuni RFI mamlakat terma jamoasi ustozi Fabio Kapelloni rasman iste'foga chiqarib, ushbu vazifani Leonid Slutskiyga ishonib topshirgandi. Xo'sh, Rossiyada ishlari qovushmagan murabbiy keyinchalik qaerlarga bordi, nimalar bilan shug'ullandi? «SE» mazkur savolga javob berish maqsadida italiyalik mutaxassisning hayot tarziga nazar tashladi.
O'YINChILAR BILAN XAYRLAShDI
Fabio Kapello hamkorlik uchun futbolchilarga minnatdorchilik bildirish maqsadida 50 kishilik marosimlar zaliga buyurtma berdi. Xayrlashuv dasturxoniga 40 nafar o'yinchi taklif qilinganiga qaramay, faqat to'rt kishi - Samedov, Kokorin, Kerjakov hamda Vasiliy Berezutskiy tashrif buyurishdi, xolos. Ziyofat 4 soat davom etdi. Kerjakovning sobiq ustoziga sovg'a berishi kechaning eng esda qolarli voqeasiga aylandi. Kapelloning rafiqasi - Lauraga esa katta guldasta nasib etdi. «Insoniylik nuqtai nazaridan murabbiy bilan xayrlashish, uning taklifiga «Labbay», deb javob berish lozim edi. Milliy termamizdagi boshqa futbolchilarning nima sababdan kelmaganliklaridan bexabarman. Kimdir bazada, qolganlar esa boshqa shaharlarda. Umuman, hammaning nomidan gapirishni xohlamayman», - dedi Vasiliy Berezutskiy.
MADANIY HORDIQ ChIQARDI
Moskvadagi Qizil maydon italiyalik mutaxassisning sevimli maskaniga aylandi. Shuningdek, u rus rassomi Andrey Sharovning ijod namunalari bilan tanishib, san'at shaydosi ekanini ham yashirmadi. Yana bir gap - Kapello bejiz restoranlarning doimiy mijozi hisoblanmaslini ham isbotladi. Bu borada uni hamyurti - Luchano Spallettiga o'xshatishadi.
XOKKEY TOMOShA QILDI
Oktyabrning ikkinchi yarmida Kapello mehmon sifatida xokkey o'yiniga tashrif buyurdi. Unda «Dinamo» klubi «Lokomotiv»ga 2:4 hisobida yutqazdi, Fabio esa ushbu sport turini yaxshi ko'rishini alohida ta'kidladi.
ARMANISTONGA BORIB KELDI
Sentyabr oyi boshlarida Kapello «Spartak» klubining sobiq bosh direktori Roman Asxabadzening taklifiga ko'ra, Armanistonga bordi. Ushbu tashrifdan 3 xil xulosa kelib chiqdi. Birinchisi - italiyalik murabbiy hamkorlik uchun bormagan. Ikkinchisi - Asxabadze hozirgi ish joyi - Erevanning «Banants» klubini rivojlantirish bo'yicha Fabiodan maslahat so'ragan. Uchinchisi - ushbu jamoadagi infratuzilma mehmonni qoyil qoldirgan. Ma'lum bo'lishicha, Kapello «Bunday shart-sharoit Rossiyaning 80-90 foiz jamoasida yo'q» qabilida fikr bildirgan.
JURNALISTLIKNI SINAB KO'RDI
Armanistonda Fabiodan «Endi murabbiylik qilmaysizmi?» deb so'rashdi. Kapello esa «Vaqt ko'rsatadi», dedi-yu, hozirda jurnalistika bilan shug'ullanayotganini qo'shib qo'ydi. Aftidan, yoqimsiz iste'folar  (1998 yili - «Milan», 2007 yili - «Real»)dan bezigan murabbiy beixtiyor mikrofon qarshisiga o'tirishni ma'qul ko'rgan, chog'i. Aytishlaricha, Kapello endi biror milliy termani boshqarmas ekan, u klublardan taklif tushishini kutmoqda. Ungacha esa Italiya televideniesi orqali tomoshabinlarni futbol olamidagi yorqin voqealardan voqif etib turishni ixtiyor qildi. Umuman, uning har bir chiqishi jamoatchilik diqqat markazida bo'ldi. Kapelloning fikricha, Aguero va Suares sayyoramizning eng yaxshi markaziy hujumchilaridir. Qolaversa, u «Real»ning jahondagi eng kuchli klub ekanligini, «Barselona» va «Bavariya»da ko'p narsa muayyan ijrochilarga bog'liqligini bildirdi. Eng e'tiborlisi, «Inter»ni o'zi boshqargan 90-yillardagi «Milan»ga qiyoslashlaridan ranjishini yashirmadi. Italiyalik mutaxassis jumladan, «rossonerlar» hattoki, Marko van Basten jarohatlangan kezlari ham sovrinlarni qo'lga kiritishgani, hozirgi «Inter» esa endi shakllanayotganini ta'kidlab, bunday solishtirish asosli emasligini alohida uqtirdi.
MOURIN'O BILAN janjallashdi
Kapello sentyabrda o'ziga yoqqan 3 nafar murabbiy nomini e'lon qildi. Eng avvalo, Roberto Manchinini maqtab, uning nafaqat rahbariyatni yangi o'yinchilar sotib olishga ko'ndira olishi, balki ixtiyoridagi ijrochilardan ham unumli foydalana bilishini e'tirof etdi. So'ngra Joze Mourinoni samarali g'oyalari uchun maqtadi. Rossiya termasining sobiq ustozi gapining oxirida Sinisha Mixaylovichni ham eslab o'tdi: «U bilan gaplashdim, aqliy salohiyati yaxshi, fikrlash doirasi keng ekaniga guvoh bo'ldim».
Oradan ikki hafta o'tib, italiyalik murabbiy Mourino haqida umuman boshqacha fikr yuritdi: «U - ajoyib strateg, lekin yarim yil ichida o'yinchilarni «sindiradi». Harqalay, futbolchilar ruhiy tomondan uning talabini qondirishga qodir emaslar». «Benazir» esa bunga o'z uslubida javob qaytarar ekan, Fabioning Angliya va Rossiya termalarida qanday muvaffaqiyatsiz faoliyat yuritgani haqida umuman gapirmaganini eslatdi. Shunda Kapello so'z o'yinini to'xtatib, sukut saqlashni joiz bildi. Noyabr oyi boshlarida esa Italiya matbuotida Mourinoning «Chelsi»dagi o'rnini aynan italiyalik mutaxassis egallashi haqida xabar chop etildi.
Davomi InterFUTBOL gazetasi blogida.
— deya xabar beradi uff.uz nashri.