Farg'ona shahrida 5 oktyabr kuni boshlangan O'zbekiston futbol federatsiyasining 2003 yilda tug'ilgan bolalar o'rtasidagi O'zbekiston chempionati o'z yakuniga etdi.
Respublikamiz viloyatlarining mana shu yosh toifasidagi terma jamoalari birinchiligining yarim finalida  Andijon jamoasi Buxorodan tashrif buyurgan tengqurlari ustidan 5:1 hisobida g'alaba qozongan bo'lsa, Farg'ona viloyatida etishib chiqayotgan yosh futbolchilar Navoiy jamoasini 4:2 hisobida engdilar.
10 oktyabr kuni Farg'ona Davlat Universiteti stadionida   musobaqaning final o'yini o'tkazilib, unda  ikki vodiy jamoalari: Farg'ona va Andijon yosh futbolchilari ro'baro' kelishdi. Qiziqarli o'tgan bahsda mezbonlar o'z raqibi darvozasiga uchta javobsiz to'p kiritib,  respublika chempionligini qo'lga kiritdi.
Turnirning tantanali yopilish marosimida so'z olgan Farg'ona viloyati futbol federatsiyasi vitse-prezidenti Salimjon Zokirov , “Neftchi” jamoasi boshlig'i Tohir Kopadze va Andijon viloyat futbol federatsiyasi vitse-prezidenti Bekzodbek Karimovlar g'olib jamoalarni ajoyib ishtiroki uchun qutladilar. So'ng musobaqada birinchi, ikkinchi va uchinchi o'rinni egallagan g'oliblar medallar bilan taqdirlanib, ularga esdalik sovg'alari topshirildi. Elmurod ERMATOV, Andijon - Farg'ona
— deya xabar beradi uff.uz nashri.