Tarjimon - har qanday guruh yoki muassasadagi muhim xizmatchi. Ayniqsa, futbol klublarida. Xorijdan kelgan legionerlarning eng yaxshi sirdoshi, deyarli o'ng qo'li. Hatto futbol yulduzlari ham uning ko'magiga muhtojlar. Quyidagi maqola Rossiya RFPLdagi xorijlik futbolchilar va ularning tilmochlari ishtirokida yuz bergan qiziqarli voqealar haqida.
Yan M~Vila: Tilmochning tortishuvi, «ta'magirlik» va bolta
25 yillik hayoti davomida bu futbolchi bir necha marta goh murabbiylar, goh jamoadoshlari bilan janjallashish orqali turli jamoalarda ishtirok etgandi. Bahorda u «Dinamo» safida mashg'ulotlarga kirishgan bo'lsada, yozda boshqa klubga o'tishni mo'ljallayotgandi. Biroq jamoa rahbariyatidagi o'zgarishlar tufayli direktorlar kengashi frantsiyalik futbolchi bilan tuzilgan shart­nomani vizasiz qoldirdi.
Shuningdek, frantsuz tili bo'yicha tarjimonlik qilgan Igor Tsarushni ham «Dinamo»ning avvalgi mutasaddilari ishga olishgandi. U jamoada tobora ko'payib borayotgan frantsuz tilida so'zlashuvchi legionerlarga yordam berishi zarur edi. Aytish mumkinki, Igor o'ziga yuklangan vazifani ado etayotgandi. Lekin ma'lum o'zgarishlardan so'ng avvalgi kelishuvlar o'z kuchini yo'qotdi, yangi rahbariyatga Tsarushning keragi bo'lmay qoldi. Mutasaddilar M~Vila xususida biroz tin olgan bo'lsalar, tilmochga chiqish eshiklarini ko'rsatib qo'ydilar.
Uning e'tiroficha, o'ta qo'pol holatda. Nashrlardan biriga bergan intervyusida Tsarush o'zining «Dinamo» xavfsizlik xizmati boshlig'i Pavel Konovalov tomonidan kaltaklanganini ma'lum qildi. Boshqa bir nashr vakiliga esa yanada ochiqroq ko'rsatmalar berib, Konovalovning to'g'ridan yo'llagan zarbalariga qo'llarini «blok» qilgan holda himoyalanganini gapirib berdi. Aytishicha, yoshligida boks bilan shug'ullangan Igorga qo'l kelgan ekan. Lekin yakunda Tsarush hech narsaga erisholmadi - jamoaning yangi bosh murabbiyi Andrey Kobelev tilmoch xizmatiga muhtoj emasligini rasman tasdiqladi. Ammo ish shu bilan yakunlanib qolmadi, aksincha yirik mojaroga aylandi. Tsarushning aytishicha, Konovalov jamoa ma'muri Viktor Kuzmin bilan birgalikda xorijlik futbolchilarga bosim o'tkazib, ulardan jarimalar va turar-joy ijarasi uchun pul talab qilishgan ekan.
Jarimalar to'g'risida hammasi tushunarli - o'yinchilar klub avtomobillarida harakatlanadilar, yo'l harakati xavfsizligi qoidalarini buzgan haydovchilarga belgilangan jarimalar esa jamoa manziliga keladi. Vaholanki, ularni qoidabuzar o'yinchilar to'lashlari kerak. Xullas, ana shu tushunmovchiliklar oqibatida ayrim gazetalarda «Dinamo»da legionerlardan pul talab qilishmoqda» qabilidagi jarangdor sahifalar paydo bo'ldi. Yan M~Vilaning xonadon ijarasi uchun pul talab qilganlar ustidan shikoyati esa yong'inga moy quydi. Boz ustiga, yashirin kamera yordamida yozib olingan intervyuning sifati ham, tarjimasi ham talab darajasida emasdi. M~Vilaning xonadoniga oid mojaro «Dinamo»dagi boshqa legionerlarnikidan farq qilmaydi. Turar-joyga ehtiyoji bo'lgan o'yinchilarga klub rieltorlarni tavsiya etadi. Bu mutaxassislar o'z mijozlariga turli variantlarni taklif qiladilar. Chunki ijara haqini futbolchilar to'lashadi, klub faqat ularning bazadagi yotoqxonalariga haq to'laydi.
Frantsiyalik mijozidan pul undirolmagan rieltor klubga murojaat qilgan. Mutasaddilar M~Vilaga ijara haqini o'z vaqtida va aynan rieltorga berish kerakligini eslatib qo'yishdi. Yan va uning ustomon tarjimoni esa «pashshadan fil yasab», chinakam blokbaster yaratishdi. Futbolchi o'zining krovati yonidagi stol ustida ulkan oyboltani saqlashi har qanday kishini dahshatga soladi. Yan uni o'zini himoya qilish uchun saqlar ekan. Xullas, ikki haftadan keyin frantsiyalik yarim himoyachi ham, tarjimon ham «Dinamo»dan chetlatildi. 10 yildan buyon klubdagi legionerlarga ham ota, ham ona sifatida tayanch bo'lib kelayotgan Viktor Kuzminning iztiroblariga boshqa legionerlarning samimiy e'tiroflari malham bo'lsa, ajabmas. «Dinamo»dagi 5 yillik faoliyati davomida Viktor Kuzminning biror-bir salbiy harakatiga guvoh bo'lmadim. Futbolchilardan u haqda yomon gap eshitmadim. Unga tuhmat toshini otganlar meni hayron qoldirishdi. Jamoadagi ta'magirliklar xususida gap bo'lishi mumkin emas. 5 yil ichida bunday holatga duch kelish u yoqda tursin, hatto tasavvur ham qilolmayman. Aksincha, klub ma'muriyati, ayniqsa, Viktor turli hayotiy va maishiy muammolarimni hal qilishda doimo yordam berishgan. Buning uchun ulardan bir umrga minnatdorman», - degandi «Dinamo»ning sobiq o'yinchisi Kevin Kurani.
NDoye: Tilmochning soch turmagi uchun urilgan gol
«Lokomotiv» tarjimoni Stepan Levin shunday hikoya qiladi: «Dinamo»ga qarshi kechgan uy uchrashuvimiz arafasida men N~Doye va Tarasov bilan bazada o'tirardim. O'sha uchrashuvdagi g'alaba biz uchun juda muhim bo'lgani uchun Dimani ruhlantirish yo'llarini izlardik. To'satdan xayolimga bahs boylash fikri keldi. Aynan «Dinamo»ga qarshi bahsda, g'alaba keltiruvchi gol uchun. Agar golni Dame N~Doye ursa, men soch turmagimni uniki kabi o'zgartiraman. Kulisha-kulisha qo'l tashladik. Dima Tarasov qo'llarimizni «kesib» kelishuvni rasmiylashtirdi. O'sha o'yinda «Loko» 1:0 hisobida zafar kuchdi, golni N~Doye urdi. Uchrashuvdan so'ng senegallik futbolchining sartaroshi turmagimni o'zgartirdi».
Mario Fernandes: Xotirasi zaif soqchi
Bu ajoyib voqeani yoritish uchun TsSKA tarjimoni Maksim Golovlyovga murojaat qilishga ham hojat qolmadi - «armiyachilar» himoyachisi mustaqil ravishda hammasini gapirib berdi: «Moskvaga eson-omon qaytib keldimu, xonadonimga kirishning iloji bo'lmadi. Boisi - uy qo'riqchisi meni taniy olmadi. Vaholanki, men bor-yo'g'i ta'til paytida bu erda bo'lmagandim. Soqchi bilan tortishib o'tirmadim-da, Golovyovga qo'ng'iroq qildim. Uning og'zaki kafolatidan keyingina soqchi eshikni ochdi. Lekin shu voqeadan keyin meni esidan chiqarmaydigan bo'ldi».
Karvalyu: Moskvada tuxumni qanday xarid qilishgani haqida
Fernandes hikoyasiga umuman ko'maklashmagan Golovlyov TsSKAning sobiq yulduzi - Daniel Karvalyu haqida ajo­yib hikoyani aytib berdi: «Moskvadagi ilk kunlarining birida Danielda do'konga borib kelish ehtiyoji tug'ildi. Do'konga ikki braziliyalik og'aynilar yo'l olishdi. Aksiga olib, ulfatlarning ikkisi ham rus tilini bilishmasdi. Shu sababli nima olmoqchi ekanliklarini sotuvchiga turli harakatlar bilan tushuntirishga urinishdi: goh xo'roz bo'lib qichqirishdi, goh tuxum qo'ymoqchi bo'lgan tovuq kabi tipirchilashdi. Tabiiyki, do'kondagi ish jarayoni bir necha daqiqaga izdan chiqdi. Tekin tomoshaga do'kon xodimlari, xaridorlar to'planishdi. Nihoyat, sotuvchilardan biri Karval nima xarid qilmoqchi ekanligini tushunib etdi. Jamoamizning hozirgi legionerlari - Pontus Vernblum va Ahmad Muso braziliyaliklar kabi quv emaslar - bunaqa holatga tushganlari yo'q. Qolaversa, men muntazam ravishda barcha yumushlarida ko'maklashib turaman».
Davomi InterFUTBOL gazetasi blogida.
— deya xabar beradi uff.uz nashri.