2015 yilgi mavsumni muvaffaqiyatli o'tkazgan Taekvondo (WTF) bo'yicha O'zbekiston terma jamoasi a'zolari yangi mavsumda ham ko'plab nufuzli musobaqalarda Vatanimiz sharafini himoya qiladilar.
Ular orasida eng mas'uliyatli musobaqa aprel oyida Filippin poytaxti Manila shahrida o'tkaziladi. XXXI yozgi Olimpiada o'yinlarining yo'llanmalari o'ynaladigan mazkur musobaqada o'z vazn toifalarida 1-2 o'rinlarni band etgan sportchilar “Rio-2016” Olimpiada o'yinlarining yo'llanmalariga ega bo'ladilar.
Ushbu litsenzion musobaqa oldidan Manila shahrida Osiyo chempionati bahslari ham bo'lib o'tadi.
Har ikki nufuzli musobaqaga yanada puxta hozirlik ko'rish maqsadida Aleksandr Kim boshchiligidagi erkaklar terma jamoamiz 14-28 yanvar kunlari Bangkok shahrida Tailand terma jamoasi a'zolari bilan hamkorlikda o'quv-mashg'ulot yig'inini o'tkazadi.
Tailandga yo'l oladigan terma jamoamiz tarkibidan Dmitriy Shokin, Jasur Boyqo'ziev, Maksim va Nikita Rafalovich, Valentin Xegay, Temur O'rolov, Mirzanozim Sharopov o'rin egallashgan.
Eslatib o'tamiz, ayni paytga kelib yurtimiz taekvondochilari hisobida “Rio-2016” Olimpiada o'yinlarining bitta yo'llanmasi bor.
Umid qilamizki, o'z oldiga doimo yuqori maqsadlarni qo'yadigan taekvondochilarimiz Filippin poytaxtida o'tkaziladigan navbatdagi litsenzion musobaqada ham Vatanimiz sharafini munosib himoya qiladilar va XXXI yozgi Olimpiada o'yinlariga yo'l oladigan terma jamoamiz tarkibi yanada kengayadi.
Ma'lumot uchun. 2015 yilgi mavsumda Taekvondo (WTF) bo'yicha terma jamoamiz a'zolari 20 ga yaqin xalqaro musobaqada ishtirok etib, 46 oltin, 37 kumush va 35 bronza, jami 118 medalni qo'lga kiritdilar. Shavkat Jalilov O'zbekiston Milliy Olimpiya qo'mitasi
matbuot xizmat
— deya xabar beradi uff.uz nashri.