Bir necha yillar mobaynida Namanganning «Navbahor» jamoasi sharafini himoya qilib kelgan Azim Ahmedov yangi mavsumni «Paxtakor» safida boshlaydi. Ushbu futbolchiga oliy liganing bir nechta klublari, xususan, «Neftchi»dan jiddiy takliflar bo'ldi.
Lekin Ahmedovlar sulolasining kenja vakili akasi Odilning sobiq jamoasida o'ynashni ma'qul ko'rdi. Kaxi Maxaradze «Lokomotiv»ga o'tib ketgach, «Paxtakor» yarim himoyasida kemtiklik yuzaga keldi. Ahmedovdan aynan shu bo'shliqni to'ldirish talab etiladi. Biz nav-batdagi kungi mashg'ulotlardan so'ng u bilan suhbatlashdik.
- Azim, aynan «Paxtakor»ni tanlashingizda qaysi omil muhim rol o'ynadi?
- Birinchi galda jamoaning shonli tarixga ega ekanligi. «Paxtakor» sharafini turli davrlarda o'zbek futbolining yulduzlari himoya qilishgan. Qolaversa, klub 11 karra mamlakat chempioni hisoblanadi, har qanday holatda ham faqat oliy maqsad sari intilgan. Muntazam ravishda OChLda ishtirok etib kelmoqda. Bu klub akamni tarbiyaladi. Shu jihatlarni inobatga olib, «Paxtakor»dan tushgan taklifni qabul qildim. Ha, bir nechta jamoalar meni o'z saflarida ko'rishni istashgandi. «Navbahor» rahbariyati va oila a'zolarim bilan maslahatlashgach, yakuniy qarorga keldim. Bu erda meni juda iliq tarzda kutib olishdi. Hamma bir oiladek bo'lib qolgan. Ochig'i, o'zimni umuman begonadek his qilmayapman. «Paxtakor»ga yaxshi niyatlar bilan o'tdim. Orzu va maqsadlarim bisyor: O'zbekiston chempioniga aylanish va OChLda zafar quchishni xohlayman.
- Mavsumga tayyorgarlik qanday ketyapti?
- Mashg'ulotlar kuniga ikki mahaldan olib borilyapti. Kunning birinchi yarmida asosiy e'tibor jismoniy tayyorgarlikka qaratilyapti, so'ngra ko'proq to'p bilan ishlayapmiz.
- «Navbahorchilar» sizni osonlikcha qo'yib yuborishmagandir?
- Yuqorida aytganimdek, klub rahbariyati bilan kelishgan holda yakuniy qarorga keldim. Fursatdan foydalanib, ko'p yillik hamkorlik uchun barchaga minnatdorchilik bidiraman.
- «Navbahor»ning o'tgan mavsumdagi ishtiroki haqida qanday fikrdasiz?
- Mavsum boshida jamoa oldiga yuqori vazifalar qo'yilgan edi. To'g'ri, moliyaviy qiyinchiliklar yuzaga keldi. Menimcha, hozir bu muammo aksariyat klublarni qiynayapti. Shunga qaramay, stadionga tashrif buyurgan ko'p ming sonli muxlislar uchun o'ynadik. Turnir jadvalidagi o'rnimiz havas qiladigan darajada emasdir, lekin mavjud vaziyatdan kelib chiqsak, yomon ham deb bo'lmaydi.
Davomi InterFUTBOL gazetasi blogida.
— deya xabar beradi uff.uz nashri.