Olimpiya terma jamoalari o'rtasida o'tkazilayotgan Osiyo chempionatida nima uchundir tashkilotchilar o'yin oldi matbuot anjumanlarini o'tkazishni shart deb topishmadi. Ammo O'zbekiston olimpiya terma jamoasi bosh murabbiyi Samvel Babayan Iroqqa qarshi kechadigan o'yin oldidan Uff.uz saytiga intervyu berishga rozi bo'ldi va buning uchun muxlislar nomidan murabbiyga minnatdorchilik bildiramiz. Samvel Vyachaslavovich suhbat oldidan eng avvalo Janubiy Koreyaga qarshi kechgan uchrashuvni yana bir bor esladi.
- O'tgan o'yindan so'ng o'tkazilgan matbuot anjumanida markaziy himoyachilar haqida savol berdingiz. Bu borada bir narsani aniqlab olishni istagan bo'lardim - garchi savolda Kozak va Fomin markaziy yarim himoyachi emasligi aytilgan bo'lsada, har ikkisi ham bu chiziqda avvaldan o'ynab kelgani, o'ynaganda ham ko'ngildagidek harakat qilganini aytishim lozim. To'g'ri, ular har doim ham bu chiziqda o'ynashmagan, ammo biz majburlikdan bu qarorni qabul qildik. Agarda Odil Hamrobekov va Bobur Yo'ldoshevlar borasida muammo paydo bo'lmaganda, himoyadagi muammolar bu qadar og'riqli bo'lmas edi.
- Fominning o'yinidan qay darajada ko'nglingiz to'ldi?
- Ko'nglim to'lmadi, albatta. Ammo ayni vaqtda yuzaga kelgan holatdan chiqib ketish uchun boshqa yo'l ham yo'q edi.
- O'sha uchrashuvda Janubiy Koreya terma jamoasi hujumdagi o'yinimizni yaxshi o'rgangani ko'rinib qoldi. Bunga qarshi keyingi o'yinlarda qanday tadbir qo'llaysiz?
- Janubiy Koreyaga qarshi kechgan uchrashuv faqat natija tomonlama ko'ngilsiz bo'ldi, ammo futbolchilarim namoyish etgan o'yinga aslo e'tiroz bildira olmayman. Biz kuchli raqibga qarshi o'ynadik, ammo o'z vaqtida pressing qo'lladik va ular avvaldan o'ylab qo'ygan rejalarini amalga oshira olmadilar. Ular o'zlari odatlangani singari 10 daqiqalab to'pni nazorat qila olmadilar. Agar hakamning o'ta qo'pol xatolari bo'lmaganda bu o'yin qanday natija bilan yakunlanishi bahsli masala edi. To'g'ri, mag'lubiyatda hakamni ayblash to'g'ri emas, ammo uning xatolari bevosita o'yin natijasiga ta'sir o'tkazsachi? O'zingiz ham ko'rdingiz, o'yindan keyin o'tkazilgan matbuot anjumanida men o'zimni arang bosib turdim. Murabbiy sifatida hissiyotlarimni jilovlab olmasam bo'lmas edi.
- Shu o'rinda bir savol. tokaygacha hakamlardan jabr ko'rish mumkin? Qachon biz ham rasman e'tiroz bildirishni o'rganamiz?
- Bu borada ko'nglingizni to'q qilishingiz mumkin. Biz ham vaziyatni tushunib turibmiz va ishlamoqdamiz. Hakam borasida OFKga murojaat qilindi. Nasib qilsa hammasi yaxshi bo'ladi.
- Ertaga bo'ladigan o'yin haqida nima deya olasiz?
- Bu o'yinda yutishimiz shart. To'g'ri, raqib kuchli, ammo biz qanday bo'lmasin yaxshi natijaga erishish shartligini hammamiz yaxshi tushunib turibmiz. Jamoadagi har bir futbolchi bunga tayyor.
Z.Qosimov suhbatlashdi
Dohadan, Uff.uz sayti uchun maxsus

— deya xabar beradi uff.uz nashri.