Barchaga ma'lumki, futbol o'ta jozibali sport turi bo'lgani uchun ham juda ko'p sonli muxlislarga ega. Ammo fintlar, driblinglar, chiroyli aldab o'tishlar, takrorlanmas gollarga boy ushbu sport turida ba'zida qing'irliklar ham uchrab turadi. Quyida ana shular haqida hikoya qilamiz.
Chiken-geyt
2011 yili Meksika terma jamoasining bir yo'la besh futbolchisi, shu jumladan, Gilermo Ochoa ham navbatdagi doping-nazoratdan o'ta olishmadi. Chunki ularning qonidan taqiqlangan klenbuterol unsuri topilgandi. Ma'lumki, bu unsur mushaklar faoliyatini kuchaytirishga xizmat qiladi. E'tiborlisi shundaki, bu mojaro KONKAKAFning «Oltin kubogi» rosa avjiga chiqqan iyun oyida ro'y bergandi. Shunda Meksika futbol federatsiyasi vakillari o'rtaga chiqib, bu modda futbolchilar tanasiga muddati o'tib qolgan tovuq go'shti orqali tushib qolganini bahona qilishdi. Shunisi qiziqki, raddiya qanchalik g'ayritabiiy bo'lmasin, futbolchilar jazodan qutilib qolishdi. Meksika terma jamoasi esa o'sha turnirda bosh mukofotga ega chiqdi.
Hushtakli poraxo'rlar
Braziliya futbolidagi eng yirik futbol mojarosi 2005 yilda kuzatilgan. O'shanda mamlakat chempionatida faoliyat yurituvchi ikki hakam - Edilson Pereyra di Karvalo va Paulu Joze Danelonlar tergov uchun politsiya mahkamasiga olib kelinadi. Ularga qarshi to'plangan dalillar shu qadar asosli ediki, ikkala hakam ham chor-nochor mamlakat oliy divizionidagi bir qator o'yinlar natijasiga ta'sir ko'rsatish uchun katta miqdorda pora olishganiga iqror bo'lishadi. Ma'lum bo'lishicha, bu «olg'ir» hakamlarni totalizatordan pul ishlashni maqsad qilgan mahalliy bir «tadbirkor» yollagan ekan. Buning natijasida shubha ostida qolgan bir necha o'yinlar hisobi yo'qqa chiqarildi.
Kalchioskomesse
Evro-2012 bahslari boshlanishi arafasida Italiya politsiyasi ketma-ket hibsga olishlarni amalga oshira boshladi. Zero, mamlakat futbolida shubhali o'yinlar soni haddan ortiq ko'payib ketgandi. Xullas, gumon ostida qo'lga olinganlar orasida «Atalanta» sardori Kristiano Doni va Italiya terma jamoasining sobiq a'zosi Juzeppe Sinorilar ham bor edi. Aytgancha, tergovlar oqibatida «Atalanta» va «Siena» singari klublar jarimaga tortilib, muhim ochkolardan mahrum bo'lishdi.
Chempionlik uchun konvert
1993 yilning may oyida «Marsel» klubi navbatdagi chempionlik unvoniga juda yaqin turgandi. Buning uchun jamoa a'zolari «Valansen»ni mag'lub etishsa, bas edi. Kutilganidek, uchrashuvda «Marsel»ning qo'li baland keldi. Ammo keyinroq ma'lum bo'lishicha, marselliklar g'alabaga g'ayriqonuniy yo'l bilan erishishgan ekan. Gap shundaki, natijadan shubhalangan frantsuz politsiyasi Kristof Roberning o'yini tintuv qilib, pul solib qappaytirilgan kattagina konvert topib oladi. «Valansen» sardori harchand urinmasin, oxir-oqibat, bu pullar «Marsel»dan olingan pora ekaniga iqror bo'ldi. Unga esa pullarni «Marsel» prezidenti Bernar Tapi bergan ekan. Xullas, sirning oshkor bo'lishi natijasida «Marsel» evrokuboklarda bir yilgacha qatnashish huquqidan mahrum bo'ldi. Shuningdek, klub UEFA superkubogi va qit'alararo kubokdan ham chetlatildi.
Panjara ortidagi «masxaraboz»
Qizig'i shundaki, hatto mahalliy futboli u qadar ommaviy bo'lmagan Avstraliya ham totalizatorlar «hujumi»ga duchor bo'lgan. Aniqrog'i, 2013 yili kelishilgan o'yinlarni tashkil qilishda ayblanib, yarimprofessional hisoblangan «Sautern Starz» klubining besh nafar a'zosi qo'lga olinadi. Ma'lum bo'lishicha, ularni Segaran Subramani ismli masxaraboz bo'lib ishlovchi kimsa yo'ldan urgan ekan. Tergov-surishtiruv ishlari yakunida masxaraboz bir yillik qamoqqa hukm qilindi. Ammo u «o'tirib chiqib» bo'lsa-da, baribir, 2 millionlik yutuqni qo'lga kiritdi.
Buyuk juma mojarosi
Ishonish qiyin-u, ammo «Manchester Yunayted» va «Liverpul» kabi klublar ham o'zaro kelishilgan o'yin o'tkazishgan. Bu voqea olis 1915 yilda bo'lib o'tgandi. O'shanda mankunianliklar quyi divizionga tushib ketish xavfi ostida qolishadi va ularga ochko suv va havodek zarur edi. Mersisaydliklar esa bu vaqtda jadval o'rtasida mustahkam turishgandi. Shunda «MYu»ning etakchi o'yinchilari raqiblardan yordam so'rashadi va ustiga-ustak, bukmekerlik idoralariga pul ham tikishadi. O'yin futbolchilar kelishganidek, 2:0 hisobida «MYu»ning foydasiga hal bo'ladi. Ammo futbolchilar maydonda shunday harakat qilishadiki, uchrashuv hisobi kelishilganligi yaqqol sezilib qoladi.
Kalchopoli
Butunjahon futboli tarixidagi eng katta, shov-shuvli voqealardan biri Italiyada, 2006 yilda kuzatilgan. To'g'rirog'i, korruptsiyaga aloqador ishlar tufayli «Yuventus» klubi ikkita chempionlik unvonidan mahrum qilinib, «V» seriyaga tushirib yuborildi. Jazoga shuningdek, «Milan», «Latsio», «Fiorentina» va «Redjina» klublari ham tortilishdi.
Germaniyalik vijdonsiz
2005 yil boshlarida Germaniya oddiygina bir hakamning qing'ir ishlaridan lol bo'lib qoldi. Chunki, Robert Xoytser ismli bu kimsa bukmekerlik idoralariga pul tikib, katta mablag' orttirib olish niyatida bir qator uchrashuvlar natijasiga ta'sir o'tkazib kelgan ekan. Masalan, u «Gamburg» va «Paderborn» jamoalari o'rtasidagi uchrashuvda o'z niyatini amalga oshirish uchun Emil Mpenzani asossiz ravishda maydondan chetlatib, yana ikkita penalti ham belgilagan. Muhimi, tergov yakuniga ko'ra Xoytser qilmishiga yarasha jazolandi: u 29 oy qamoqda o'tirdi.
Davomi InterFUTBOL gazetasi blogida.
— deya xabar beradi uff.uz nashri.