Serbiyalik ushbu yigit juda iqtidorli. Bejiz Evropaning bir qator etakchi klublari unga e'tibor qaratishmadi. Aslida kuzning oxirida ham ko'pchilik Marko haqida aytarli hech narsa bilmasdi. Ya'ni u tor doirada tanish edi, xolos. To'g'rirog'i, Serbiya super-ligasiga qiziqish bilan qaraydiganlar va yoshlar futboliga ixtisoslashgan mutaxassislargina Gruyichning qanday futbolchi ekanligini bilishardi. Lekin dekabr oyida «Tsrvena Zvezda»ning 19 yoshli markaziy yarim himoyachisi atrofida shunday keng ko'lamli «transfer urushi», mojaroli muhokamalar va parda ortidagi «o'yinlar» boshlanib ketdiki, buning natijasida yigitcha bir zumda butun «ko'hna qit'a»da taniqli iqtidor sifatida bo'y rostladi.
Serbiyalik ko'plab ajoyib yosh futbolchilar kabi Gruyich ham Yugoslaviya urushi ayni qizigan payt dunyoga kelgan. Marko tabiiyki, bolalik chog'idayoq sport olamining birinchi raqamli o'yiniga ko'ngil qo'yadi. Buning sababi tushunarli: uning otasi Serbiyada taniqli sport jurnalistlaridan biridir. Qisqasi, Goran Gruyich o'g'lining futbol maydonlarida javlon urishini orzu qiladi va ehtimolki, vaqtida uning shunchaki, Serbiya doirasida tanilishini o'ylagandir.
Yakunda shunday bo'lib chiqdiki, tug'ma qobiliyatga ega va sifatli ta'lim olgan Marko «Tsrvena Zvezda»ning kattalar jamoasida juda erta, ya'ni 17 yoshidayoq debyut qildi. To'g'ri, yosh xavbek «Zvezda»ning 10tacha o'yinida maydonga tushganidan so'ng uni birinchi liga klubi - «Kolubaru»ga ijara shartnomasi asosida yuborishdi. Alohida ta'kidlash kerak, Sarbiyaning ikkinchi divizioni 18 yoshli yigitcha uchun juda-juda shafqatsiz «olam» sanaladi. Zero, bu divizionda asosan ko'pni ko'rgan faxriylar va o'rtacha salohiyatga ega yoshlar to'p surishadi. Shuningdek, o'yinlarda qo'pollik darajasi anchagina yuqori bo'lib, kuchsiz xarakter egasi o'zini o'nglab ketishi mashaqqatdir. Gruyich esa ushbu sinovdan muvaffaqiyatli o'tdi. Ya'ni 5ta o'yinda 2ta gol urishdan tashqari, saviya bo'yicha Belgradga qaytish uchun to'la haqli ekanligini isbotladi.
Kuchli tomonlari
Universallik va serqirralik. 19 yoshli yarim himoyachining ko'zga ko'rinadigan xususiyatlari shu qadar ko'pki, maydonning markaziy qismida bemalol bir necha funktsiyalarni bajarishi mumkin. Birinchisi - u tabiatan jismoniy tomonlama kuchli va bu borada yanada kuchayish imkoniyatiga ega. Ikkinchisi - gavda bilan o'ynashda juda yaxshi va ayni payt Serbiya super-ligasidagi baquvvat o'yinchilar bilan tengma-teng kurash olib boryapti. Uchinchisi - havodagi kurashlarda benazir. Zero, 190 santimetrdan balandroq bo'yi har qanday to'p uchun intilishiga imkon beradi. Asosiysi, Marko to'pni egallashi hamono raqibning jarima maydoni tomon xavfli uzatmani amalga oshirishni paysalga solmaydi.
Kuchli va aniq zarba. Bu Markoning eng e'tiborli sifatlaridan biri. U gollaridan ko'pini uzoq masofalardan, ya'ni jarima maydoni tashqarisidan berilgan zarbalar orqali nishonlaydi. Ayniqsa, zarba aniqligini Gruyich uchun birinchi raqamli xususiyat sifatida e'tirof etish mumkin. Aynan shu xislatiga ko'ra, uni hujumkor futbolchilar qatorida zikr etish kerak.
Maydonni ko'rish qobiliyati. Gruyich o'yin mohiyatini juda yaxshi tushunadi va uning ravishini oldindan sezish qobiliyatiga ega. Deylik, hujum chizig'idagi jamoadoshining oldinga intilishini vaqtida payqaydi hamda uni diagonal uzatma hisobiga to'p bilan ta'minlaydi. Marko Serbiya super-ligasining joriy mavsumida 8ta golga assistentlik qilishga ulgurdi. 21ta o'yinda «Gol+pas» tizimi bo'yicha 5+8 ko'rinishidagi statistika - bu 19 yoshli markaziy yarim himoyachi uchun chakki natija emas. Endi maydonni ko'rish qobiliyatiga to'p bilan ishlash texnikasini qo'shing. Ha, Gruyich shu sifatlari o'laroq, bir-ikki raqibini engillik bilan aldab o'tishi va hujumda o'z jamoasiga son jihatidan ustunlik taqdim etishi mumkin. Harqalay, dribling san'ati va futbol intellekti bunga imkon beradi.
Chidamlilik. Gruyich 19 yoshidayoq aql bovar qilmas bardoshi bilan alohida ajralib turibdi. Misol uchun, u super-liga doirasidagi aksariyat o'yinlarda to'liq vaqt davomida tinimsiz harakatda bo'ldi. To'g'rirog'i, Markoni atigi 2ta o'yinda almashtirishdi. Yuqori mehnatkashlik xususiyatining yana bir isboti shuki, Marko ham himoya, ham hujumda birdek ter to'kadi. Ya'ni hujum payti oldingi chiziq vakillariga yaqindan yordam beradi, to'p yo'qotilgan pallada tezlik bilan orqaga qaytadi. Shuning barobarida yigitcha to'pni olib qo'yishda usta. Bunda yuqorida ta'kidlanganidek, gavdasi bilan harakatlanishni qoyillatadi. Shuningdek, zarurat tug'ilganida, «podkat» usulini qoida doirasida qo'llaydi.
Davomi InterFUTBOL gazetasi blogida.
— deya xabar beradi uff.uz nashri.