Yodingizda bo'lsa, 2015 yilgi mavsum yakunlanganidan keyin saytimiz orqali uning yakunlari haqida turli xil statistik, tahliliy maqolalarini yozib borgan edik. Bugun ham ushbu an'anamizni davom ettirgan holda o'tgan yilgi mavsumda jamoamiz sharafini himoya qilgan yana bitta futbolchi xususida to'xtalib o'tishni joiz topdik. Faoliyati davomida bir nechta jamoalarda to'p surgan Ilya Ilinni mamakatamizda tanimaydigan futbol muxlisi bo'lmasa kerak. Maydonda o'zining mehnatkashligi bilan boshqalardan ajralib turadigan 30 yoshli himoyachi o'tgan mavsumda jamoamizning etakchisiga aylandi, desak mubolag'a bo'lmaydi. Uning himoyadagi ishonchli o'yinlari “Qo'qon-1912”ning g'alabalariga zamin yaratdi. Ilin-Golban himoya juftligi Oliy liga jamoalariga haqiqiy bosh og'riq bo'ldi. Mavsum-2015da Ilya Ilin 27 ta uchrashuvda maydonga tushdi. Eng ko'p o'ynagan futbolchilar orasida u ikkinchi o'rinni oldi. Ilinni tom ma'noda mehnatkash o'yinchi deyish mumkin. U maydondagi tirishqoqligidan tashqari, mashg'ulotlarda tinmsiz mehnat qilishi orqali ham barchaning mehrini qozona olgan. Yangi mavsumda ham Ilya Ilindan mana shunday ishonchli o'yin kutib qolamiz.
— deya xabar beradi uff.uz nashri.