O'zbekiston U-23 himoyachisi Maksimilian Fomin kecha Iroqqa qarshi o'yindagi mag'lubiyatdan keyin Feysbukdagi o'z sahifasida muxlislarga nisbatan haqorat so'zlar ishlatilgan murojaatni qoldirdi. Murojaatda Fomin quyidagicha yozadi: “Biz qanchalik yomon futbolchilar ekanligimiz haqida kommentlarda yozayotganlar va postlar qoldirayotganlar, chakagangizni yoping! Siz o'zi kimsizlar? Hayotda hech narsaga erisholmagan, hech narsani ko'rmaganlarsiz. Qiladigan ishingiz monitorning u tarafida o'tirib, birovlarning ustidan mag'zava ag'darishdan iborat. Haqiqiy muxlis birinchi imkoniyat paydo bo'lishi bilan jamoasiga loy chaplaydiganlar emas, mag'lubiyatda ham, g'alabada ham oxirigacha jamoani qo'llab-quvvatlab, futbolchilar bilan  birga bo'ladiganlardir. Siz esa o'zingizni ablahlardek tutyapsizlar! Futbolni ozgina tushunganlaringizda edi, uning oddiy o'yin ekanini, bu o'yinda har doim ham o'ylagan narsangiz amalga oshavermasligini bilgan bo'lardingiz. Shu sababli biror narsa yozishdan oldin kallangiz bilan o'ylab ko'ring. Odamiylikni saqlab qoling!”
— deya xabar beradi uff.uz nashri.