Qatar poytaxti Doha shahrida davom etayotgan boks bo'yicha kattalar o'rtasidagi jahon chempionatida yarim finalchilar nomi ma'lum bo'ldi. Bu haqida O'zbekiston Milliy Olimpiya Qo'mitasi rasmiy sayti xabar berib o'tmoqda.
E'tiborlisi, yarim finalga yo'l olgan sportchilar orasidan olti nafar hamyurtimiz ham o'rin egallashdi. Bu o'z navbatida O'zbekiston boks maktabi nechog'lik rivojlanib borayotganligidan dalolat beradi.
Bu borada terma jamoamiz Kuba terma jamoasidan keyin ikkinchi o'rinda borishmoqda. Kubaliklarning etti nafar bokschisi yarim finalda ringga ko'tariladi. Umuman yarim finalga Kuba va O'zbekiston terma jamoalari bilan birga Rossiya va Ozarbayjondan – 4 nafardan, Irlandiyadan – 3 nafar, Xitoy, Ukraina va Qozog'istondan – 2 nafardan, Filippin, Jazoir, Hindiston, Belarus, Braziliya, Tailand, Marokash, Misr, Buyuk Britaniya va Frantsiyadan – 1 nafardan bokschi yarim finalga etib keldi.
Eslatib o'tamiz, kecha bo'lib o'tgan chorak final bahslarida hamyurtlarimizdan Murodjon Ahmadaliev (-56 kg) tailandlik raqibini, Elnur Abduraimov (-60 kg) mo'g'ilistonlik raqibini, Fazliddin G'oipnazarov (-64 kg) italiyalik raqibini, Bektemir Meliqo'ziev (-75 kg) Rossiya vakilini, Bahodir Jalolov (+91 kg) iordaniyalik raqibini va nihoyat Elshod Rasulov (-81 kg) qozog'istonlik Adilet Niyazimbetovni mag'lubiyatga uchratishdi.
Shu o'rinda ta'kidlash joizki, Elshod Rasulov 2013 yilgi Jahon chempionati kumush medal sovrindori Adilet Niyazimbetov bilan joriy yil Bangkok (Tailand)da bo'lib o'tgan Osiyo chempionatining final bahsida ro'baro kelishi kerak edi. Biroq, afsuski yarim finalda jarohat olgan Elshod hal qiluvchi final jangida ringga chiqa olmagan edi.
Yarim final bahslari 11-12 oktyabr kunlari o'tkaziladi. Janglarda ringga ko'tariladigan juftliklar bilan O'zbekiston Milliy Olimpiya Qo'mitasining rasmiy sayti bo'lgan Olympic.uz'da batafsil tanishib chiqishingiz mumkin.  Bokschilarimizga kim raqiblik qilishini ushbu havola orqali bilib olishingiz mumkin.
— deya xabar beradi uff.uz nashri.