Garchi «Oltin to'p»ning so'nggi yillardagi taqdiri haqida oldindan taxmin bildirish oson kechayotgan bo'lsada, jahonda nomzodlarga o'ziga xos tarzda ovoz berganlar ham uchradi.
To'plangan ochkolarni hisoblab chiqish - qiziqarli mashg'ulot. Xabaringiz bor, «Oltin to'p» sohiblarini uch toifa kishilar tanlab berishadi: terma jamoa sardori, bosh murabbiy hamda har bir mamlakatdan bir nafardan jurnalist. Hammasidan futbolchilarning kimga ovoz berishgani qiziqroq. Ro'yxatni astoydil kuzatsak, Vanuatu termasi sardori, mahalliy «Amikale» klubi hujumchisi Masauvakalo Fenedi e'tiborni tortadi. Buni qarangki, uning tanlovidan Messi, Ronaldu va Neymar o'rin olishmadi. Janob Fenedi boshqalardan farqli ravishda, Pol Pogba, Tomas Myuller hamda Aleksis Sanchesga ovoz bergan.
Umuman, bunday holatlar yana ko'p uchradi. Xususan, Fenedining geog­rafik jihatdan qo'shnisi - Yangi Kaledoniya termasi himoyachisi Jan-Bris Vadriako ham shunga o'xshash qaror qabul qildi. Mazkur mamlakat bosh jamoasi sardori Andres Ines­ta, Zlatan Ibragimovich va Karim Benzemani tanlagan. Shuningdek, Yangi Zelandiya, Qirg'iziston, Marokash hamda Malta termalari sardorlari ham kuchli uchlikka o'zlari xohlagan boshqa futbolchilarning nomini kiritishgan.
Messi, Krishtianu va Neymarni e'tibordan chetda qoldirganlar orasida ekzotik mamlakatlar termasi sardorlaridan tashqari Ronaldu ham bor! O'ziga-ku, ovoz berolmaydi. Lekin Messi va Neymarni tanlamaganini ham tushunish mumkin. Portugaliyalik yulduzning tanlovidan Karim Benzema, Xames Rodriges hamda Garet Beylning nomlari o'rin egallagan. Robert Levandovski (Noyer, Vidal, Myuller) hamda Diego Godin (Suares, Myuller, Levandovski) ham o'z qarashlariga ega. Kamerunlik Mbia, perulik Pisarro esa noodatiy tanlovchilar ro'yxatini yakunlab berishadi. Umumiy hisobda bunday sardorlar soni o'n kishini tashkil qildi.
Siz esa har yili bir xil futbolchilarga ovoz berilaveradi, deysiz!
Messi ham xuddi Ronaldu singari o'z jamoadoshlarining nomiga murojaat etdi - Suares, Neymar, Inesta. Qizig'i, ushbu tanlov deyarli Zlatan Ibragimovichniki bilan bir xil bo'ldi. Shunchaki, shvetsiyalik hujumchi Ines­taning o'rniga Messining nomini qayd etish barobarida, uni birinchi o'ringa qo'ydi. Mana sizga xolislik!
Neymar ham shundaylar qatorida - u Messi, Suares va... Rakitichga ovoz berdi!
Rossiyaliklar esa ko'pchilik qatorida bo'lishni ma'qul ko'rishdi. Messi va Krishtianuni hamma tanladi. Faqat Neymarni e'tibordan chetda qoldirishdi.
Roman Shirokovning tanlovidan Messi, Krishtianu va De Bryuyne o'rin egallashdi. Leonid Slutskiyga esa Messi, Krishtianu va Noyerning ishtiroki ma'qul kelibdi. Mashhur jurnalist, «SE»ning sobiq bosh muharriri Konstantin Kleshevning ro'yxatida Messi, Krishtianu va Levandovskining nomlariga ko'zingiz tushishi mumkin.
O'zbekiston termasi sardori Odil Ahmedov hamda bosh jamoamiz ustozi Samvel Babayan bir xil qarorga kelishgan. Ular futbolchilar nomini quyidagi ketma-ketlikda joylashtirishdi: Messi, Ronaldu, Neymar. Demak, ular g'olib nomini to'g'ri topishgan. PFL matbuot kotibi Grigoriy Rtveladzening tanlovi esa boshqacha tus oldi. U birinchi o'ringa Ronalduni qo'ygan bo'lsa, keyingi pog'onalarga Luis Suares hamda Tomas Myullerni munosib ko'rdi.
Yakunda murabbiylarning qay tariqa tanlangani haqida. Messi va Neymarning kimni e'tirof etishgani kundek ravshan. Avvallari Braziliya va Argentina bu qadar yakdil fikrga kelishmagandi. Har ikki futbolchi birinchi o'ringa «Barselona» ustozi Luis Enrikeni qo'yishgan. Ushbu mutaxassisning Messi bilan hamon kelishmayotgani haqidagi xabarlarni tarqatayotganlarga o'ziga xos javob bu.
Krishtianu Ronaldu o'z ovozini Karlo Anchelottiga berdi (birinchi o'rin), shuningdek, Joze Mourino hamda Pep Gvardiolani ham yoddan chiqarmagan.
Shirokov esa g'olibni to'g'ri topdi, lekin ikkinchi o'ringa Unai Emerini qo'ygani... Afsus, ular «Spartak»­da ko'rishmadilar-da...
Davomi InterFUTBOL gazetasi blogida.
— deya xabar beradi uff.uz nashri.