To'rt nafar qariya yig'ilib qolgan ekan. O'shanda bittasi ulfatlariga maqtanib qolibdi.
- Men 20 yoshimda qanday kuchga ega bo'lgan bo'lsam, hozir ham kuchim shunday.
Sheriklari hayron qolibdi:
- Yo'g'-e, bo'lishi mumkin emas.
- Ishonaveringlar.
- Xo'p, buni qanday isbotlaysan?
- Mana bu katta toshni ko'ryapsizlarmi?
- Ha…
- Men shu toshni 20 yoshimda ham ko'tara olmaganman, hozir ham ko'tara olmayman…
Maqolani lirik chekinish bilan boshlashga qaror qildim. Kecha olimpiyachilarimiz Olimpiadaga chiqish imkoniyatidan mahrum bo'lishdi. Ko'pchilikning asabi buzilgan, kimdir tanqid, yana kimdir haqorat qilyapti. Xuddi vakillarimiz Olimpiadaga muntazam tarzda yo'llanma olib kelishganu, bu safar qolib ketgandek. Olimpiyachilarimiz 20 yil oldin ham Olimpiadaga chiqa olishmagan, hozir ham chiqa olishmadi. Demak olimpiyachilarimiz 20 yil oldin qanday kuchga ega bo'lgan bo'lishsa, hozir ham shunday. 20 yildan buyon o'zgarish ko'rmadik. Ko'rishimiz ham dargumon. Nimaga?
Chunki bizda jahonning hech bir mamlakatida yo'q bo'lgan tizim ishlaydi. Ya'ni milliy terma jamoani boshqargan murabbiy, olimpiya termasini ham boshqaradi. Kapello, Lyov, Del Boske kabi mutaxxasislar ham bir vaqtning o'zida ikki jamoani boshqara olmasliklari mumkin, lekin bizni murabbiylar buni uddalashadi. Ha faqat boshqarishni uddalashadi, vazifani bajarishni emas. Vikipediyani titkilab ko'ring qani, yana boshqa qaerda bunday tizim borligini topa olarmikansiz?
Meni hayron qoldiragani, bizni futbol mutaxxasislarimizni bitta lavozim qoniqtirmasligi. To'g'ri, ikkita ishda ishlovchilar ko'p. Lekin ular maosh kam bo'lganligi uchun ham, yana boshqa ishda ishlashlariga to'g'ri keladi. Lekin murabbiylarning bir oylik maoshi, oddiy ishchilarning bir yillik maoshi bilan barobarku! Ularga nima etishmaydi? Bu savolga men javob topa olmadim. Balki siz bilarsiz bu savolni javobini.
Futbolda hamma narsa murabbiyga bog'liq ekanligini ushbu mavsumda Evropa kuchli beshlik chempionatlarida ko'rmoqdamiz. Rafa Benites kabi mashhur mutaxxassis ham “Real”ning yulduzlari bilan yaxshi natijaga erisha olmagan bir paytda, Klaudio Raneri o'zining kamtarona “Lester”i bilan “MYu”, “Manchester Siti”, “Arsenal”, “Liverpul” va “Chelsi” kabi grandlarni orqada qoldirib, APL peshqadamiga aylandi. Agar murabbiy to'g'ri taktika tanlay olsa, futbolchilardan unumli foydalana bilsa, natija ham u tomonda bo'ladi. Qatardagi musobaqa shuni ko'rsatdiki, Babayan hali kuchli murabbiy emas ekan. U taktika borasida ham, o'yinchilardan foydalanish borasida ham xatolikka yo'l qo'ydi. Natijada bu xato bizni yana 4 yil sabr qilishga majbur etdi.
Bir insonning xatosi tufayli 30 milliondan ortiq bo'lgan xalq jabr ko'radi. Demak, murabbiylik ma'suliyati og'ir. Babayanning ayni paytdagi holati Abramovnikini eslatib yubormoqda. Babayan ham Abramovning yo'lidan bordi. U ham dastlab Olimpiadani boy berdi, JCh saralash bosqichining keyingi bosqichida (agar chiqa olsak) birinchi jiddiy raqibga imkoniyatni boy berganidan keyin, u ham iste'foga chiqarilsa ajab emas. Keyin nima bo'ladi? Labay deya Qosimov keladi.
Davomi Furqat Yusupov blogida.
— deya xabar beradi uff.uz nashri.