Xabaringiz bordir, «Borussiya» (Dortmund) klubi va Gabon terma jamoasi hujumchisi Per-Emerik Obameyang 2015 yil yakunlari bo'yicha Afrikaning eng yaxshi futbolchisi sifatida e'tirof etildi. Shu orada gabonlik goleadorning «Arsenal»ga o'tishi haqidagi gap-so'zlar yanada avj oldi. Lekin yakunda Per-Emerikning o'zi hozircha hech qaerga ketish niyati yo'qligini alohida ta'kidladi. Soccer.ru saytining quyidagi maqolasi aynan 2015 yili dunyo futbolida etakchi hujumchilar darajasiga ko'tarilgan Afrika vakili haqida.
Yangi maskan
Per-Emerik Dortmunddan qo'nim topguniga qadar yuksak mahoratini yuzaga chiqarish yo'lida naq 5 yil ter to'kishga majbur bo'ldi. Avvaliga yosh iqtidor sohibining faoliyatidan sira qoniqmagan «Milan» uni ijara sharti asosida Frantsiyaga qaytardi. Shu tariqa hujumchi «Dijon», «Lill», «Monako» va «Sent-Eten» klublarida etarli tajriba to'plab, o'z mahoratini oshirdi. Lekin shunda ham «rossonerlar» ishonchini qozonolmadi. Ammo uning «Sent-Eten» klubi va Gabon terma jamoasidagi o'yinlariga Dortmund «Borussiya»si mutasaddilari munosib baho berishdi.
Xullas, ular Levandovskini uzoq ushlab turish qiyin ekanligini anglagan holda, Obameyangga «sovchi» qo'yishdi. O'z qadrini topolmay turgan hujumchi esa taklifga darrov rozilik bildirdi. Buni qarangki, o'shanda 13 mln. evroga xarid qilingan Obameyang mana, 3 yildan sal kamroq vaqtdan keyin 60 «limon»ga baholanmoqda. To'g'ri, futbolchi saviyasini har doim ham pul bilan o'lchash noto'g'ri. Ayniqsa, Per-Emerikka o'xshagan futbolchilar iqtidorini. Zero, ular faqat Yurgen Klopp yoki Tomas Tuxel kabi talabchan, shu bilan birga adolatli murabbiylar qo'l ostida o'z mahoratlarini to'la namoyish eta oladilar. E'tibor bering, Obameyang Germaniyadagi 2,5 mavsum davomida ajoyib sermahsullik (47ta gol) qayd etdi.
Farqni qarang: u Dortmundga ko'chib o'tishidan avvalgi 5 yil ichida hammasi bo'lib 49ta gol urgandi. Ko'rinib turibdiki, futbolchi yangi jamoada yaxshi ildiz otib, gurkirab rivojlanmoqda. Demak, uning uchun «Borussiya» qadrdor jamoaga, Dortmund esa muqaddas maskanga aylanib ulgurdi. Yoshligidan komikslar va superqahramonlar haqidagi filmlarni yoqtiradigan futbolchi o'zining suyukli personaji - qimmatbaho avtomobillar ishqibozi Betmenning taniqli belgilari bilan bezatilgan mashinada shahar bo'ylab sayr qiladi. Oddiy aytganda, Obameyang uchun «Borussiya»da barcha sharoitlar yaratilgan.
Va'daga vafo
Parijda dunyoga kelgan va frantsuz klublari akademiyalarida tahsil olgan Obameyang vaqtida Italiya yoshlar terma jamoasi taklifini rad etib, Frantsiya sharafini himoya qilishni ma'qul ko'rgandi. Lekin keyinchalik «uchranglilar» rahbariyati unga qayta e'tibor bermay qo'ydi. Shundan so'ng hujumchi o'z avlodlari vatani - Gabon terma jamoasida o'ynashga qaror qildi. Ehtimol, hujumchi o'shanda biroz sabr qilganida, Frantsiya milliy jamoasidan ham taklif olardi va joriy yil Evro-2016da mezbon sifatida maydonga tusharmidi? Lekin Per-Emerik biror-bir qarorni qabul qilishni hech qachon paysalga solgan emas, barchasini o'z o'rnida, o'sha zahoti hal qilishga odatlangan. To'g'ri, Benzemaning mojarolarga o'ralashib qolgani tufayli Evropa chempionati mezbonining oldingi chizig'ida muammolar yuzaga keldi.
Obameyang deylik, Jiru va Martial kabi iqtidorli hujumchilar bilan bemalol raqobatlasha olardi. Shuni alohida aytish joiz, Per-Emerik o'z taqdiri va bugungi mavqeidan norozi emas - u «Milan»dan ketgach, qaysidir grandning chaqiruvini kutib o'tirmadi, o'rtamiyona jamoalarda o'ynagan holda, bosqichma-bosqich olg'a intildi. Mana, nihoyat, «Borussiya» darajasiga ko'tarildi. Shu o'rinda Dortmund klubining yuksak malakasi va sabr-qanoatiga qoyil qolmaslikning iloji yo'q. Jamoada Gyundogan, Roys va Mxitaryan kabi futbolchilarning yangi muhitga moslashib olishlarini sabr bilan kutishdi, ularga imkon boricha yordam berishdi. Obameyang ham shunday e'tibor o'laroq, ya'ni klubdagi qulay sharoit va murabbiyning sa'y-harakatlari bilan yuksak saviyaga ko'tarildi.
Eng e'tiborli jihati, jamoa bosh murabbiyi Per-Emerikdan ayrilish katta yo'qotish bo'lmasligini ochiq-oydin e'tirof etmoqda. Chunki transferga rozilik bildirilsa, tabiiyki, inglizlar anchagina ko'p haq to'laydilar. To'g'ri, hujumchining o'zi hozircha mish-mishlarni rad etmoqda: «Men «Arsenal»ga o'tmayman». Aytishlaricha, Per-Emerik o'tgan yili o'zining eng yaqin do'sti va jamoadoshi Marko Roysga jamoani undan avval tark etmaslikka va'da bergan ekan. Endilikda taqdir taqozosiga ko'ra, u ikki yo'ldan birini tanlash zaruratiga duch kelishi mumkin: «Borussiya»ga yirik moddiy manfaat keltirgan holda, nomdorroq grand safidan joy olish yoki Roysga bergan va'dasiga vafo qilish.
Davomi InterFUTBOL gazetasi blogida.
— deya xabar beradi uff.uz nashri.