Osiyoning besh karra eng yaxshi hakami bo'lgan Ravshan Ermatov RedPen internet nashriga intervyu berdi. Quyida ana shu suhbat bilan tanishishingiz mumkin.
— Yangi yil arafasida ikkita mukofot oldingiz. Dastlab 2015 yilning eng yaxshi hakami bo'ldingiz. Keyin O'zbekiston Respublikasi Prezidentining Farmoniga asosan «Buyuk xizmatlari uchun» ordeni bilan taqdirlandingiz. Mukofotni olishingizni bilganingizdan so'ng o'zingizni qanday his qildingiz?
— Bu unutilmas lahzalar. O'shanda Olimpiya qo'mitasida Oybek Qosimov bilan suhbatlashib o'tirgandim. Shu payt futbol federatsiyasidan qo'ng'iroq qilib, bu ajo-yib yangilikni aytishdi. Avvaliga ishongim kelmadi... Bunaqa yangi yil sovg'asini hali olmagandim. Prezidentimizning qo'llaridan  mukofot olganimni hech qachon unutolmayman.
— Global Soccer Awards taqdimotining videokonferentsiyasida taniqli hakam Nikola Ritstsolining aytishicha, FIFA barcha hakamlarni yig'ib, JCh-2014 final uchrashuvini boshqaradigan brigadani aytishidan oldin u sizga qaragan ekan. Chunki Ritstsoli va boshqa hakamlar brigadangizning finalni boshqarishiga ishongan ekan. Biroq finalni aynan italiyalik hakamga ishonib topshirishgan. Bu mavzuda uning o'zi bilan gaplashganmisiz?
— Albatta. Ritstsoli aytganidek, hakamlar korpusida ko'pchilik finalga bizning brigadamizni tayinlashlariga ishongan. Ammo yakunda omad italiyaliklarga kulib boqdi. Ritstsoli o'sha paytda o'zimni qanday tutishimni ko'rmoqchi bo'lganini aytgandi.
Oldingi finallarni boshqargan hamkasblarimning qanday holatga tushishganini bilardim. 2006 yili argentinalik hamkasbimiz Orasio Elisondo xursandchiligidan yig'lagan. 2010 yili esa Xovard Uebb sakrab yuborgandi. Tasavvur qiling. Hammaning ehtirosi har xil bo'ladi. Ritstsolining aytishicha, bir zumda butun umri ko'z oldidan o'tgan va o'n daqiqa mobaynida bo'layotgan voqelikka ishonmay turgan. Shundan so'ng menga «Ravshan, to'g'risini aytsam, finalni sen boshqarasan, deb o'ylagandim.
Sen bunga munosibsan. Lekin omad bizga kulib boqdi», degandi. Unga men Braziliyada qolgan to'rtta brigadaning barchasi finalni boshqarishga munosibligi va uni tribunadan turib qo'llashimni aytgandim. Albatta, barchamiz finalni boshqarishni juda istagandik. Chunki hakamlar uchun bundan ortiq narsaning o'zi yo'q. Ya'ni, o'z kasbingizda Everestni zabt etgandek bo'lasiz. Ammo o'sha paytda qanday holatga tushishimni bilmayman.
— Lekin buni hali bilib olishimiz mumkin.
— Ha. Shunga umid qilaman.
— Sizdan O'zbekiston haqida tez-tez so'rab turishadimi?
— Haligacha mamlakatimiz haqida tasavvurga ega bo'lmagan insonlar uchrab turadi. Ammo ularning soni tobora kamaymoqda. Ularga tariximiz, nomdor ajdodlarimiz va mamlakatimizning hozirgi holati haqida gapirib beraman. Shundan so'ng ularning ko'pchiligi yurtimizga tashrif buyurib, barchasini o'z ko'zi bilan ko'rishni istab qoladi.
Davomi InterFUTBOL gazetasi blogida.
— deya xabar beradi uff.uz nashri.