Yangi mavsumga jidiy hozirlik ko'rayotgan futbolchilarimiz yakshanba kuni Qibray stadionida Namanganning “Navbahor” jamoasi bilan nazorat uchrashuvini o'tkazishdi.

Mazkur bellashuvda Ro'ziqul Berdiev ixtiyoridagi barcha futbolchilarga imkoniyat berdi. Uchrashuv esa ancha murosasiz kechdi. Birinchi bo'limning so'nggi daqiqalarida namanganliklar o'ng burchakka yaqin joyda o'yin qoidasini buzishdi. Artur Gevorkyanning jarimadan uzatib bergan to'pni jamoamiz safida ko'rikdan o'tayotgan himoyachi Ildar Mamatkazin boshi bilan urib, hisobni ochdi.

Ikkinchi bo'limda tomonlar bir martadan muvaffaqiyat qozonishdi. Ikkinchi qirq besh daqiqalikda dastlab Ilhom Shomurodov o'z uslubida gol urdi. Qanotdan uzatilgan to'pni Ilhom bosh bilan darvozaga yo'naltirgach, “Navbahor” posboni qiyinchilik bilan to'pni qaytarishga erishdi. Ammo darvozabondan qaytgan to'pni Shomurodovning o'zi himoyachi va darvozabondan ildamroq harakat qilib oradagi farqni ikkitaga oshirdi. Uchrashuvning so'nggi daqiqalari o'tib borayotgan bir vaqtda zaxiradan maydonga tushgan Akbarsho Rashidxonov uzoq masofadan yo'llangan aniq zarbasi bilan hisobni qisqartirdi-2:1.

Mazkur bellashuvda jamoamiz a'zolari quyidagi tarkibda harakat qildi: Sanjar Quvvatov, Ildar Mamatkazin, Maqsud Karimov, Erkin Boydullaev, Azizjon G'aniev, Sharof Muhiddinov, Shuhrat Muhammadiev, Bahrom Abdurahimov, Artur Gevorkyan, Ilhom Shomurodov, Zohir Qo'ziboev.

Zaxiradan maydonga tushganlar: Eldorbek Suyunov, Doniyor Narzullaev, Bobur Abduholiqov, Dilshod Xushbakov, Najmiddin Normurodov, Islom Rashidxonov.

Mazkur bellashuvdan keyin futbochilarimizga uch kunlik qisqa ta'til elon qilindi. Jamoamiz a'zolari 20 yanvar kuni Qarshidagi qarorgohda to'planishadi va mashg'ulotlarni davom ettirishadi. “Nasaf” navbatdagi nazorat uchrashuvini 25 yanvar kuni Toshkentda Tojikiston chempioni Dushanbe shahrining “Istiqlol” jamoasi bilan o'tkazadi.
— deya xabar beradi uff.uz nashri.