«Liverpul» va Angliya terma jamoasining sobiq yarim himoyachisi Stiven Jerrard The Telegraph muxbiri bilan suhbatda o'zining kelajak rejalari bilan o'rtoqlashdi. Shuningdek, Angliya futboli mutasaddilarini faxriy futbolchilarga nisbatan e'tiborliroq bo'lishga, ularni futbolda imkon qadar uzoq vaqt ushlab qolishga da'vat etdi. APLda to'p surib yurgan paytlarida murabbiylik maktabini tugatib olmaganidan afsusda ekanligini ma'lum qildi.
U o'zining so'nggi mavsumini boshlayotgan futbolchiga umuman o'xshamasdi. Shu kunlarda Los-Anjelesga yo'l olish tadorigini ko'rayotgan Stiv bundan rosa bir yil muqaddam «Liverpul»ni tark etishga qaror qilgandi. Yangi yilning dastlabki kunlarida ham u o'z muxlislariga ajoyib yangilikni taqdim etdi. «Bu mening faoliyatimdagi so'nggi mavsum ekanligiga 100 foiz kafolat berolmayman», - dedi Jerard Liverpul markazidagi xususiy Vincents restoranida. - Aniq variantlar hozircha yo'q. «Liverpul»dagilar qandaydir yumush topib berishni va'da qilishmoqda. Ammo bu - shunchaki quruq gaplar».
Yarim himoyachining fikricha, «oltin avlod» vakillarining aksariyati u bilan bir xil vaziyatda. G'ayrat-shijoat va yangi g'oyalarga ega, lekin shu bilan birga, tushkun kayfiyat girdobida. «Ularga shunday takliflar berish kerakki, rad etishga imkon qolmasin. Axir mamlakat uchun 100ta, klubida esa 700ga yaqin uchrashuv o'tkazgan futbolchini assotsiatsiya qanday qilib osonlikcha qo'yib yuborishi mumkin? Ularga nimadir taklif qilishsa bo'ladi-ku. Ko'pgina jamoalar bunday ko'ngilsiz holatlarga yo'l qo'ymaydilar. «MYu» Rayan Giggzni o'zida olib qoldi, «Barselona» esa Xosep Gvardiolani. Bu jamoalardagi qoida shunday: «Faoliyating yakuniga etgach, qandaydir ish bilan shug'ullanasan».
«Murabbiylik sirlarini 21-22 yoshlik paytimdan boshlab o'rganishga kirishmaganimdan afsusdaman. Bo'sh vaqtlarimni «Ofis» va «Soprano oilasi»ga sarfladim. Buning o'rniga tahsil olganimda, ayni payt professional litsenziya qo'limda bo'lardi. Bilaman, aksariyat kasbdoshlarim faoliyatining oxirida bunday yumushlar bilan band bo'lishni istashmaydi. Lekin bu to'g'ri emas. Nahotki, 600tadan ko'proq bellashuvlarda orttirilgan boy tajriba hech kimga keragi bo'lmasa?».
«Futbol assotsiatsiyasi vakillari bilan uchrashib, terma jamoada talab darajasida to'p surgan futbolchilarni imkon qadar ko'proq ushlab qolishlariga da'vat etdim. Vaholanki, ular futbolni rivojlantirish bobida ko'proq manfaat keltiradilar».
«Murabbiylik kurslarini shunday tashkil etish kerakki, salohiyatlilar yoshligidan boshlab tahsil olishlari mumkin bo'lsin. Futbol mashg'ulotlari tushlikka qadar davom etadi, to'g'rimi? Demak, tushlikdan so'ng murabbiylikdan saboq olishsa, chakki bo'lmasdi. Natijada, faoliyati yakunlangan futbolchi to'ppa-to'g'ri murabbiylikka o'tib ketaveradi. Yangi sohani ilk bosqichidan boshlab o'rgatadigan zerikarli kurslarda tahsil olishdan xalos bo'ladi».
Davomi InterFUTBOL gazetasi blogida.
— deya xabar beradi uff.uz nashri.