“Andijon” jamoasi o'z qarorgohida olib borgan ikkinchi o'quv-mashg'ulot yig'inini o'tgan hafta yakunlaganini xabar qilib o'tgandik. Rejaga ko'ra, “burgutlar” 18 yanvar kuni Toshkentga yo'l olib, tayyorgarlikni poytaxtda davom ettirishi kerak edi. Bu yig'inni ikki haftaga mo'ljallangandi. Ammo ayrim sabablarga ko'ra jamoaning tayyorgarlik rejalariga o'zgarishlar kiritildi. “Burgutlar” yana bir hafta Andijonda shug'ullanib keyin Toshkentga jo'nab ketishmoqchi.
Ikki kunlik dam olishdan so'ng 19 yanvar kuni futbolchilar klub qarorgohiga yig'ilishdi. 16 yanvar kuni “Neftchi” o'rinbosarlariga qarshi o'tkazilgan nazorat bahsida jamoa etakchilari Anvar Berdiev, Ibrohim Otaxonov, Davron Tursunov, Iqbol Boboxonov, Javlon Guseynov, Shukur Jumaboev ishtirok etishmagandi. Qisqa ta'tildan keyin ular yana tarkibga qaytib mashg'ulotlarni boshlashdi. Mashg'ulotlarda ko'plab yangi o'yinchilar qatnashayotgani va ularning aksariyatiga murabbiylar javob berib yuborishganini xabar qilgandik. “Andijon”ning yig'inida ishtirok etgan Alisher To'xtasinov ayni paytda jamoa ixtiyorida emas.
Ma'lumotlarga qaraganda, bu yarim himoyachi hozirda “So'g'diyona” klubida o'zini sinab ko'rmoqda. To'xtasinov kuni kecha jizzaxliklarning nazorat uchrashuvida ishtirok etdi. Eslatib o'tamiz, Alisher To'xtasinov o'tgan yili birinchi liga vakili “UzDongJu” jamoasi sharafini himoya qilgandi. Undan tashqari darvozabon Eldor Isaboev ham “Andijon”ni tark etgan ko'rinadi. Chunki bu posbon ancha paytdan beri mashg'ulotlarda qatnashayotgani yo'q. Isaboev o'tgan yili andijonliklar tarkibida oliy liga 2 ta va kubok bahslarida 3 bor maydonga tushgandi.
19 yanvar kuni “Andijon” klubi lagerida yangi o'yinchi paydo bo'ldi. Tajribali yarim himoyachi Mirzakamol Kamolov “burgutlar” safiga qo'shildi. Bu futbolchi uchun “Andijon” begona jamoa emas. Muxlislarga ya'shi ma'lumki, Kamolov 2008-2010 va 2014 yilgi mavsumlarda ham andijonliklar safida to'p surgan. Shuni aytib o'tish kerakki, futbolchi hozircha faoliyatidagi eng yaxshi damlarni aynan shu jamoada o'tkazgan.
O'z vaqtida Kamolov “Andijon” mazmunli o'yinlar namoyish etgan holda sezilarli darajada o'sishga erishib, keyinchalik “Nasaf”ga yo'l olgandi. Ko'rib turganingizdek, bu uning “Andijon”ga uchinchi qaytishidir. Yarim himoyachi o'tgan mavsumni G'uzorning “Sho'rtan” klubida o'tkazib, 26 ta o'yinda ikkita gol urishga muvaffaq bo'lgan.
Kamolovni “Andijon” safiga qo'shilganiga endi uch kun bo'ldi va uni jamoada qolish qolmasligi yig'in davomida ma'lum bo'ladi. “Burgutlar” tarkibiga shu kunlarda yana yangi o'yinchilarni qo'lishi kutilmoqda. Elmurod ERMATOV, Andijon

— deya xabar beradi uff.uz nashri.