Joriy mavsum «Shalke» klubi uchun o'ta beqaror kechmoqda, 1-davrani 7-o'rinda yakunlagan jamoa peshqadamdan 19 ochkoga ortda qolmoqda. Demak, chempionlikka umid qilmasa ham bo'laveradi. Lekin jamoada maqtanishga arziydigan jihatlar ham yo'q emas - «Shalke»da noyob iqtidor sohiblarini tarbiyalash an'ana tusiga kirgan. Ha, Rur havzasi o'zining tabiiy boyliklari bilan dong taratgan bo'lsa, «Shalke» o'z «javohirlari» bilan maqtanishga haqli.
Myuller, Roys, Ozil va Noyer kabi yorqin yulduzlar faoliyat yuritayotgan bir davrda «Shalke»ning 19 yoshli tarbiyalanuvchisi nemis futboli tarixidagi eng qimmat o'yinchiga aylanishini tasavvur qilish mumkinmi? Agarda ingliz klublari andakkina saxovatni darig' tutmasalar, ha! Lekin boshqa tomondan, Leroy Sane etakchiligidagi bir qator yoshlarning, «Rur javohirlari» sifatida e'tirof etilayotgani mubolag'adek tuyuladi. Xo'sh, bundesligadagi hozirgi vaziyat qanday? Aksariyat mutaxassislarning fikricha, joriy mavsumda «Shaxtyor» vakillari Duglas Kosta va Genrix Mxitaryan boshqalardan ko'ra yaxshiroq o'ynamoqdalar. Ammo futbolchilarning yoshini inobatga olgan holda baho berilsa, «Shalke»dagi yosh iqtidor sohiblaridek mahoratli yoshlarni boshqa hech qaysi jamoa­dan topib bo'lmaydi. Tengsiz mahorat egalarining «Shalke»da uzoq qolib ketmasliklari hozirning o'zidayoq ma'lum - taklif ham mahoratga mos bo'lsa, bas.
Yoaxim Lyovning chempion jamoasi tarkibida «Shalke»ning ikki vakili - jamoa sardori Xevedes va iqtidorli Draksler to'p surishgandi. Keyinchalik Yulianning goh «Real», goh «Yuventus»ga yo'l olishi taxmin qilingandi. Biroq 22 yoshli futbolchi xorijga oshiqmadi va hozirda «Volfsburg» sharafini himoya qilmoqda. Lekin «Shalke»ning yosh yulduzlariga xaridorlar soni tobora ortib bormoqda. Chunki jamoaning har bir a'zosi Leroy Sane kabi etuk o'yinni namoyish etmoqda. Yaqinda 20 yoshni qarshilagan bu futbolchi Martialdan ham kichikroq. Shunday ekan, Manchesterning bir nomdor jamoasi Antoni uchun kattagina mablag'dan voz kechganida, ikkinchisi undan qolishmaydigan vunderkindni o'z safiga qo'shib olishiga nima xalal berishi mumkin?
Ma'lumki, «shaharliklar»ning moliyaviy imkoniyatlari «MYu»nikidan kam emas. Bu yoqda Ronaldu va Messi asta-sekinlik bilan bo'lsada faxriylar marrasiga yaqinlashib borishmoqda, Neymar, Pogba, Azar va de Bryuyne barcha grandlarning talabini qondira olmaydilar. Demak, yangi yosh yulduzlarni qo'lga kiritish yo'lidagi harakatlar yanada faollashadi. Shartli Sterling, Martial, Sane yoki Neveshlarning baholari ko'tarilib ketishiga shubha yo'q.
Hozir deyarli barcha grandlar bir paytlardagi «Arsenal» kabi yosh iqtidor sohiblarini murg'aklik davridayoq sotib olishga urinmoqdalar. Qolaversa, Arsen Vengerdan farqli o'laroq, bu yo'lda pulni ayamayaptilar. Shunday ekan, Angliyaning qaysidir jamoasi Sane uchun xuddi Mangalya yoki Sterlingga taklif etilganidek saxovat ko'rsatsa, ajablanmaymiz. Albatta, Mayer va Goretskaning mahorati Leroynikidan kam emas. Lekin bu futbolchilar allaqachon mutaxassislar e'tiborini tortib ulgurishgan. Sane esa to'satdan chaqnagan yulduz. O'tgan yili u hech qanday yulduzlik alomatlarini ko'rsata olmagandi. Bu yil esa birdaniga porladi. Ana shu nogahoniy yorqinlik ko'pchilikni o'ziga rom etadi.
To'g'ri, buyuk sportchi bo'lish Sanening taqdiriga bitilgan. Uning otasi - Sulaymon Sane 90-yillarda Senegal terma jamoasining eng yorqin yulduzlaridan biri edi. Uzoq yillar davomida Germaniyada to'p surdi, keyin germaniyalik sobiq gimnastikachi Regina Veber bilan turmush qurdi. Shu tariqa sport yulduzlarining 3 farzandi «Shalke» maktabida o'qishdi. Leroy esa asosiy tarkibdan joy olishga ulgurdi. Joriy mavsumni o'ta sermahsul o'tkazayotgani bois, etakchi o'rinlarga ko'tarilib oldi.
Davomi InterFUTBOL gazetasi blogida.
— deya xabar beradi uff.uz nashri.