O'zbekiston olimpiya terma jamoasining Yamanga qarshi o'tkazadigan o'yini qanday kechishi uch kun oldin, Iroqqa boy berilgan uchrashuv tugagani xamono aniq bo'lib ulgurgandi. Aftidan, bu narsa murabbiylar shtabiga ham tegishli, shekilli.
Boisi, hali Yamanga qarshi kechgan o'yin o'tkazilmasidan termaning 8 nafar futbolchisi Toshkentga qaytarib yuborilgani haqida xabarlar paydo bo'ldi. Albatta, bu tasdiqlanmagan va Doxadagi muxlislar orasida yurgan gaplar edi. Agarda ushbu o'yindan so'ng baribir, terma jamoamizning uyga qaytishini inobatga olsak, bu qarorga hayron qolish ham shart bo'lmasa kerak. Axir delegatsiyaning hamma a'zolarini Toshkentga qaytarishning o'zi bo'ladimi? Bu yoqda oyning oxiriga qadar qolishni mo'ljallab turgan muxlislar ham ko'ch-ko'ronini yig'ishtirgani uchun samolyot chiptalari tanqislashib turgan bo'lsa...
19 yanvar (seshanba)
O'ZBEKISTON-YaMAN-3:1 (1:0)
Doxa. Suhaim Bin Hamad stadioni. 227 tomoshabin.
Hakamlar: Ma Ning, Vang Dexin (Xitoy), Su Min Yu (Xitoy Taypeyi).
Gollar: Javohir Sohibov (18), Igor Sergeev (68), Jaloliddin Masharipov (90}3) - Ahmad al Sarori (82).
O'zbekiston: Abdumavlon Abdujalilov, Akrom Komilov, Vladimir Kozak, Javlon Mirabdullaev, Jamshid Boltaboev, Otabek Shukurov, Javohir Sohibov, Jaloliddin Masharipov, Doston Hamdamov (Jamshid Iskanderov, 67), Eldor Shomurodov (Jasur Hakimov, 78), Igor Sergeev.
Yaman: Salim al Harsh, Fada Alavi (Volid al Hubayshi, 83), Abdulvosi al Matari (Xolid Muhammad, 85), Ahmad al Hifi (Bashir al Manifi, 67), Ala Mahdi, Ammar Hamsan, Osama Anbar, Muhammad al Sarori, Abdulloh Ahmad Alos, Muhammad Ali Boshqan, Ahmad al Sarori.
Shunga monand o'yin atrofidagi xayajon ham u qadar kuchli bo'lmadi. Terma jamoamiz ilk daqiqalardan faol bo'lishga intildi, Yaman ham shunga yarasha qarshilik ko'rsata boshladi. Biroq bosim yuqori bo'lmagan o'yinda bizning azamatlar durust uynay olarkanlar, buni 18-daqiqada hisobni ochgan Javohir Sohibov isbotlab berdi. Ammo yarim himoyachi golini xursand qiyofada nishonlamadi. Jamoadoshlari ham katta ishtiyoq bilan uni tabriklamadilar. Sababi malum - bu uchrashuv deyarli o'rtoqlik maqomida. Unda yutding nima-yu yutqazding nima, baribir, farqi yo'q - hech narsa o'zgarmaydi.
Shunga mos ravishda o'yinning keyingi borishi o'rtoqlik o'yiniga xos tarzda rivojlana boshladi. Biznikilar hujum qilish, yamanliklar esa qarshi xujumda o'ynashga harakat qila boshladilar. Xullas, hamma qo'lidan kelgan ishni qilardi. Bu orada himoyamiz ham o'zining borligini eslatib turdi - 23-daqiqada Vladimir Kozak oddiy vaziyatda raqibni o'tkazib yuborishiga bir bahya qoldi. Baxtimizga yamanliklar Janubiy Koreya yoki Iroq kabi uddaburon va olg'ir emas ekanlar.
Umuman olganda, birinchi bo'limda O'zbekiston terma jamoasi u qadar yomon o'yin namoyish etgani yo'q - Jamshid Boltaboev faol bo'ldi, Jaloliddin Masharipovda gol urish imkoniyati tug'ildi, Eldor Shomurodov yo'llagan zarba darvoza to'sini yonidan o'tib ketdi. Ammo har doimgi muammo - vaziyatlardan foydalana olmaslik yana pand berdi. Boz ustiga, agar bo'lim so'ngida Javlon Mirabdullaev to'pni qo'li bilan qaytargan vaziyatda hakam penalti belgilaganida tanaffusga boshqacha natija bilan chiqib ketish ham mumkin edi. Baxtimizga referi bizni ayadi. Aftidan, Javlon bu borada ancha omadli, shekilli. Boisi, Iroqqa qarshi kechgan avvalgi o'yinda ham Mirabdullaev qo'l bilan uynaganida hakam ko'rmay qolgan edi.
Nima bo'lganda ham terma jamoamiz birinchi bo'limni g'olib sifatida yakunladi. Musobaqa boshidan buyon hali bunaqasi bo'lmagandi. O'sishmi? Balki shundaydir. Ammo endi bundan  kimga naf?
Ikkinchi bo'lim bizga yangi kashfiyotni taqdim etdi - maydonda Igor Sergeev bor ekan. U jamoamizning ajoyib tarzda tashkil etgan hujumini shu qadar yomon zarba evaziga (aslida, buni zarba deb ham bo'lmasdi) yo'qqa chiqardiki, biz jamoamiz tarkibida shunday hujumchi borligini darhol esladik. Igor ushbu musobaqada aynan shunday o'yini bilan yodimizda qolmoqda. U avvaldan biz bilgan Igorga aslo o'xshamadi...
Ushbu foydalanilmagan vaziyatdan so'ng o'yinning borishi birinchi bo'limdagidan ko'p ham farq qilmadi. Terma jamoamiz goh u va goh bu qanotdan hujum uyushtirdi, ammo ancha vaqtgacha bir ish chiqara olmadi. Urinishlar 68-daqiqaga kelib samara berdi. O'sha Igor Sergeev katta sahnaga chiqdi. Samvel Babayan ushbu uchrashuvda zaxira o'rindig'ida qolgan Jamshid Iskanderovni maydonga tushirdi. Yarim himoyachi ham o'zining gullagan davrlarini eslab qoldi chog'i, Eldor Shomurodovga ajoyib uzatmani amalga oshirdi. «Bunyodkor» vakili esa raqibini dog'da qoldirib, noqulay vaziyatda tursada, chap oyog'i bilan to'pni Sergeevga oshirib berdi. Igorning bu safar bosh bilan bergan zarbasi aniq chiqdi.
Samvel Babayan shogirdlarida shundan so'ng ham gol urish uchun qulay imkoniyatlar bo'ldi. Jamshid Iskanderov o'z uslubida Jaloliddin Masharipovni qulay vaziyatga chiqarib yubordi, ammo u yaxshi zarba bera olmadi. Keyin Jaloliddinning o'zi ajoyib dribling evaziga xavfli vaziyatni yuzaga keltira oldi. Biroq bu urinish ham besamar yakunlandi. Yaman esa shuncha hujumga birgina aniq zarba bilan javob qaytardi. Bitta, ammo juda aniq va juda chiroyli zarba bilan. Yaman terma jamoasi tarkibida javob to'pi muallifi bo'lgan Ahmadning bu goli Osiyo chempionatining eng chiroyli goli bo'lib qolishi ham hech gap emas. Shubhasiz, bu gol musobaqaning bezagi bo'lib qoladi va hali uzoq vaqtlar turli roliklarda aylantirilishi tayin. Har qancha og'ir bo'lmasin, buni tan olishga majburmiz.
Ammo Yaman Ahmadning goli evaziga hisobni qisqartirgan bo'lsada, bundan ortig'iga kuchi etmasdi. Bizning jamoamiz baribir, saviya jihatidan kuchliroq edi. Bunisini endi Jaloliddin Masharipov uchinchi golni chiroyli uslubda urib, isbotlab berdi. Bu gol o'yinning mantiqiy yakuni ham bo'ldi.
Shu o'rinda sharhimiz yakunida O'zbekiston olimpiya terma jamoasini bevosita maydonda turib qo'llab-quvvatlagan muxlislar haqida ikki og'iz fikr bildirib o'tsak. Bu ishqibozlar katta umidlar bilan Qatarga kelgan edilar. Ammo safarning uchinchi kunidayoq hammaning hafsalasi pir bo'lishga ulgurdi. Bunday vaqtda asablar taranglashib, hamma narsaga qo'l siltab yuborish hech gap emas. Biroq muxlislar shunday vaqtda ham termani tashlab qo'ymadilar va stadionga keldilar. Ular qay darajada katta ishtiyoq bilan jamoamizga ishqibozlik qilganlarini o'zingiz ham translyatsiya vaqtida ko'rgan bo'lsangiz kerak. Shu o'rinda bir gap - ana shu yigitlardagi bor ishtiyoqning jilla qursa yarmi terma jamoa futbolchilarida bo'lganida, balki Rio-2016 bizga bu qadar erta begona bo'lmasmidi...
Davomi InterFUTBOL gazetasi blogida.
— deya xabar beradi uff.uz nashri.