Fevral oyida Toshkentda bo'lib o'tadigan Osiyo chempionatiga tayyorgarlik ko'rayotgan futzal bo'yicha O'zbekiston terma jamoasi musobaqa oldilan Vetnam bilan o'rtoqlik uchrashuvi o'tkazish borasida kelishib oldi.
Vetnam futzal terma jamoasiga qarshi o'yin 1 fevral kuni Toshkentda o'tkaziladi.
Avvalroq, O'zbekiston futzal terma jamoasi 22-24 yavnar kunlari Qozog'istonning Olmaota shahrida o'zining navbatdagi yig'inini o'tkazishi va Qozog'iston futzal terma jamoasiga qarshi 22 hamda 23 yanvar kunlari ikkita o'rtoqlik uchrashuvida maydonga tushishi haqida ma'lum qilgan edik.
Jamoa Qozog'iston yig'inidan qaytgach, 26 yanvar kunidan musobaqa oldidan so'nggi yig'inga kiradi. Vetnam jamoasi bilan o'yindan so'ng, Osiyo chempionati oldidan yana bir o'rtoqlik uchrashuvi o'tkazish rejalashtirilgan.
Eslatib o'tamiz, futzal bo'yicha O'zbekiston terma jamoasi 2016 yilning 10 — 21 fevral kunlari bo'lib o'tadigan Osiyo chempionatiga tayyorgarlik jarayonini olib bormoqda. Qit'a birinchiligi final bosqichi uchun tashlangan qur'a natijasiga ko'ra O'zbekiston terma jamoasi "A" guruhidan o'rin olgan. Guruhda Xose Mariya Mendez jamoasiga Saudiya Arabistoni, Qirg'iziston hamda Livan jamoalari raqib bo'ladi.
Ta'kidlash kerakki, Toshkentda bo'lib o'tadigan ushbu musobaqada eng yuqori 5 o'rinini egallagan jamoalar 2016 yilning 10 sentyabridan 1 oktyabrigacha Kolumbiyada bo'lib o'tadigan Jahon chempionatiga yo'llanmani qo'lga kiritadi.
— deya xabar beradi uff.uz nashri.