O'zbekiston Milliy olimpiya qo'mitasi (MOQ) 1992 yil 21-yanvar kuni tashkil topgan va o'tgan davr mobaynida mamlakatimizda sport va Olimpiya harakatini rivojlantirish ishida faol bo'lib kelmoqda.
O'zbekiston Milliy olimpiya qo'mitasi 1993 yil sentyabr oyida Xalqaro olimpiya qo'mitasi (XOQ) tomonidan rasman tan olingach, yurtimiz sportchilari mustaqil O'zbekiston nomidan to'rt yillikning eng nufuzli musobaqasi qishki va yozgi Olimpiada o'yinlarida ishtirok etish xuquqiga ega bo'ldilar.
Albatta, bunday yutuqlarga buyuk Istiqlol tufayli erishdik. Mustaqillik sharofati bilan ozod va obod yurtimiz xalqaro olimpiya harakatining eng faol a'zosiga, olimpiya o'yinlarining teng huquqli ishtirokchisiga aylandi.
O'tgan davr mobaynida Davlatimiz va xukumatimiz tomonidan mamlakatimizda olimpiya harakatini rivojlantirish borasida qator ishlar amalga oshirildiki, bu o'z navbatida xalqaro sport tashkilotlari tomonidan yuksak e'tirofga sazovor bo'lmoqda. O'zbekiston Respublikasi Prezidenti Islom Karimovning Xalqaro olimpiya qo'mitasi, Osiyo olimpiya kengashi, Milliy olimpiya qo'mitalari assotsiatsiyasining oliy nishonlari bilan taqdirlanishi ham yuqoridagi fikrimiz tasdig'idir. Bugungi kunda ushbu mukofotlar Muhtaram Prezidentimiz tashabbuslari bilan poytaxtimizda bunyod etilgan Olimpiya shon-shuhrati muzeyining eng noyob eksponatlari qatoridan o'rin egallagan.
O'zbekiston Milliy olimpiya qo'mitasi 24 yildirki yurtimizda jismoniy tarbiya va sportni rivojlantirish orqali jamiyatda sog'lom turmush tarzini qaror toptirish, Olimpiya harakati va olimpizm g'oyalarini keng targ'ib etish yo'lida faol ish olib bormoqda. Har yili sportchi va murabbiylar bilim va tajribasini yanada yuksaltirish maqsadida MOQ tashabbusi bilan xalqaro seminarlar, ilmiy-amaliy konferentsiyalar, mintaqaviy forumlar tashkil etilmoqda. Bu ham o'z navbatida xalqaro sport maydonlarida qo'lga kiritilayotgan muvaffaqiyatlar salmog'ini yil sayin yuksalishida alohida ahamiyat kasb etmoqda.
Mamlakatimiz sportchilari uchun Davlatimiz tomonidan qaratilayotgan alohida e'tibor va yaratilgan shart-sharoitlar sport olamining eng yirik musobaqasida qo'lga kiritilayotgan muvaffaqiyatlarga ham zamin yaratmoqda. Istiqlol yillari 5 bor (1996 yil Atlanta (AQSh), 2000 yil Sidney (Avstraliya), 2004 yil Afina (Gretsiya), 2008 yil Pekin (Xitoy) va 2012 yil London (B.Britaniya) shaharlarida bo'lib o'tgan) yozgi va 6 marotaba (1994 yil Lillixammer (Norvegiya), 1998 yil Nagano (Yaponiya), 2002 yil Solt-Leyk-Siti (AQSh), 2006 yil Turin (Italiya), 2010 yil Vankuver (Kanada), 2014 yili Sochi (Rossiya) shaharlarida o'tkazilgan) qishki Olimpiya o'yinlarida Vatanimiz sharafini himoya qilgan mardonavor sportchilarimiz jami 6 ta oltin, 5 ta kumush va 10 ta bronza medaliga sazovor bo'lib, Prezidentimiz ta'rifi bilan aytganda, Istiqlol timsollariga aylandilar.
Vatanimizning, xalqimizning bu munosib farzandlari yaratilgan barcha shart-sharoitlardan samarali foydalanib, el-yurt mehr-muhabbatidan ruhlanib, kuch-qudrat olib, Olimpiya o'yinlarida beqiyos iste'dodlari, eng yuksak mahoratlari, cheksiz matonatlarini namoyish etib, millionlab yoshlarga o'rnak bo'lmoqdalar, ularni o'zlari kabi sport bilan shug'ullanishga, bo'lajak chempionlar saflarini to'ldirishga da'vat etmoqdalar.
Shu o'rinda ta'kidlash joizki, so'nggi uch yil O'zbekiston Milliy olimpiya qo'mitasi hayotida tub burilish yili bo'ldi, desak mubolag'a qilmagan bo'lamiz. Davlatimiz rahbarining 2013 yil 25 fevralda “O'zbekiston sportchilarini 2016 yil Rio-de-Janeyro shahri (Braziliya)da o'tkaziladigan XXXI yozgi Olimpiada va XV Paralimpiya o'yinlariga munosib tayyorlash to'g'risida”gi qarori qabul qilinib, mamlakatimiz sportchilarini to'rt yillikning navbatdagi eng yirik sport musobaqalariga har tomonlama puxta hozirlik ko'rishlari uchun barcha zarur shart-sharoitlarni yaratish borasida aniq chora-tadbirlar ishlab chiqildi. Ushbu qarorni hayotga tadbiq etilishi xalqaro maydondagi muvaffaqiyatlarimiz salmog'ini yanada yuksalishida asosiy omil bo'lmoqda. Buning yorqin isboti sifatida sportchilarimiz tomonidan 2013-2015 yillarda dunyo sport arenalarida erishgan muvaffaqiyatlarini ko'rsatib o'tish joiz. Mazkur yirik musobaqalarda O'zbekiston sportchilari hech kimdan kam emasliklari va hech qachon kam bo'lmasliklarini amalda yana bir bora isbotladilar.
Davlatimiz rahbarining mazkur qarori o'z ahamiyati va unda belgilab berilgan vazifalarning ko'lamiga ko'ra xalqaro sport maydonlarida qo'lga kiritilayotgan muvaffaqiyatlarimiz salmog'ini yanada yuksaltirish hamda mamlakatimizda olimpiya harakatini rivojlantirishda yangi bosqichni boshlab berdi. Sportchilarimizni to'rt yillikning navbatdagi yirik sport anjumaniga munosib hozirlik ko'rishlarida dasturilamal bo'layotgan ushbu hujjat Yurtboshimiz tomonidan jismoniy tarbiya va sport ravnaqi yo'lida hamda sportchilarga ko'rsatilayotgan doimiy e'tibor va g'amxo'rlikning yana bir amaliy ifodasidir.
Muhtaram Prezidentimizning qarori ijrosini ta'minlash maqsadida O'zbekiston sportchilarini 2016 yilda Rio-de-Janeyro shahrida (Braziliya) bo'lib o'tadigan XXXI yozgi Olimpiada va XV Paralimpiya o'yinlariga munosib tayyorgarlik ko'rishini tashkil etish va takomillashtirish bo'yicha Respublika komissiyasining 8 bor selektor yig'ilishi o'tkazildi.
Davlatimiz rahbarining qarori ijrosi doirasida 2013 yil 2 aprelda O'zbekiston Respublikasi Vazirlar Mahkamasining “O'zbekiston Milliy olimpiya qo'mitasi huzuridagi O'zbekiston olimpiadachilarini qo'llab-quvvatlash jamg'armasi faoliyatini tashkil etish to'g'risida” qarori qabul qilindi. Mazkur jamg'arma mablag'lari Respublika sport federatsiyalarining moddiy-texnik bazalarini yanada mustahkamlashga yo'naltirilmoqda. Shu bilan birga, Olimpiya va Paralimpiya o'yinlari dasturiga kiritilgan sport turlari bo'yicha O'zbekiston sportchi va murabbiylariga stipendiya to'lash tartibi to'g'risidagi nizom tasdiqlanib, xalqaro sport maydonlarida yurtimiz sharafini munosib himoya qilayotgan sportchi va murabbiylar har oyda qo'shimcha tarzda beriladigan stipendiyalar bilan rag'batlantirib borilmoqda. Bundan tashqari jamg'arma mablag'lari hisobiga sportimiz faxriylari, shuningdek, yurtimizda faoliyat ko'rsatayotgan terma jamoalarning maslahatchi murabbiylariga ham oylik maoshlar ushbu jamg'arma mablag'lari hisobidan qoplanmoqda.
O'zbekiston Milliy olimpiya qo'mitasining o'tgan qisqa vaqt ichida erishgan yutuqlaridan yana biri Xalqaro olimpiya qo'mitasi, Osiyo olimpiya kengashi, Milliy olimpiya qo'mitalari assotsiatsiyasi va qator xalqaro sport federatsiyalari hamda tashkilotlari bilan o'zaro aloqalarni yangi bosqichga olib chiqqanligi bo'ldi. Birgina 2013-2015 yillarda mamlakatimizga Xalqaro olimpiya qo'mitasi prezidenti Tomas Bax, Milliy olimpiya qo'mitalari assotsiatsiyasi rahbari, Osiyo olimpiya kengashi prezidenti Shayx Ahmad al-Fahd al-Saboh, Osiyo Paralimpiya qo'mitasining o'sha paytdagi rahbari Dato Abu Zaynal Abu Zarin, shuningdek, Olimpiada o'yinlari dasturiga kiritilgan sportning qator turlari bo'yicha xalqaro federatsiyalar rahbarlari, Osiyo-Tinch okeani teleradio eshittiruvchilar uyushmasi Bosh kotibi Javad Mottagi, Jahon dopingga qarshi kurash agentligining Osiyo-Okeaniya mintaqasi bo'yicha rahbari Kazuxiro Xayashi va Markaziy Osiyo davlatlari bo'yicha dopingga qarshi kurash tashkiloti raisi Maira Bakasheva kabi qator xalqaro sport tashkilotlarining rahbarlari yurtimizga tashrif buyurib, O'zbekistonda olimpiya xarakatini rivojlantirish borasida amalga oshirilayotgan sa'y-harakatlarga yuqori baho berdilar
2014 yili Janubiy Koreyaning Incheon shahrida o'tkazilgan XVII yozgi Osiyo o'yinlari arafasida Osiyo olimpiya kengashining 33-Assambleyasi bo'lib o'tdi va ushbu yig'ilishda O'zbekiston Milliy olimpiya qo'mitasining raisi, senator Mirabror Usmanovga Osiyo olimpiya kengashining eng yuksak mukofotini tantanali suratda topshirilishi ham O'zbekistonda olimpiya harakatini rivojlantirish borasida olib borilayotgan ishlarga, hamyurtlarimizning Osiyo qit'asida sport sohasini yanada yuksalishiga qo'shayotgan hissalariga berilgan munosib baho bo'ldi.
Bugungi kunda poytaxtimiz markazida qad rostlagan O'zbekiston Milliy olimpiya qo'mitasining yangi binosi Xalqaro olimpiya qo'mitasi rahbari Tomas Bax ta'rifi bilan aytganda “dunyoda eng ko'rkam va mahobatli Olimpiya qo'mitasi”dir.
Ushbu binoda Respublika sport tibbiyoti ilmiy-amaliy markazi ham tashkil etilgan bo'lib, Olimpiya o'yinlari dasturiga kiritilgan sport turlari bo'yicha terma jamoa a'zolari ana shu markazda malakali mutaxassislar ko'rigidan o'tmoqdalar. Markazda nafaqat mamlakatimiz balki xorijdan taklif etilgan etakchi shifokorlar ham faoliyat olib borishyapti. Bu erda 585 turdagi eng so'nggi tibbiy uskunalar o'rnatiladi.
Ma'lumki, yosh nihol parvarishsiz ko'kka bo'y cho'za olmaganidek, sportchi ham murabbiysiz, uning zarur ko'rsatmalarisiz yuqori natijaga erisha olmaydi. Shu ma'noda yurtimizda faoliyat ko'rsatayotgan murabbiylarning bilim va ko'nikmalarini oshirish maqsadida o'tgan davr mobaynida o'ndan ziyod xalqaro o'quv va ilmiy-amaliy seminarlar tashkil qilinganligini ta'kidlash joiz. Mazkur seminarlarga Respublikamizning barcha hududlarida faoliyat ko'rsatayotgan murabbiylar jalb etilib, ular Xalqaro sport federatsiyalari hamda tashkilotlarining eng etuk mutaxassislari boshchiligida nazariy va amaliy bilimlarini yanada mustahkamladilar.
Prezidentimiz Islom Karimov tomonidan belgilab berilgan yuksak maqsadimiz – jismoniy va ma'naviy etuk, milliy va umuminsoniy qadriyatlar ruhida tarbiya topgan avlodni voyaga etkazish yo'lida sport eng muhim va samarali vositaga aylangan. Zero, tinchlik elchisi deya ta'rif berilgan sport salomatlik, barkamollik, go'zallik, qat'iyat, mardlik, g'urur va iftixor kabi tushuncha va fazilatlar omili sifatida ham e'tirof etilgan. O'tgan davr mobaynida ezgu maqsadga erishish, farzandlarimizning o'z aql-zakovati va iste'dodini to'la namoyon etishi, ularni bugungi va ertangi hayotimizning hal qiluvchi kuchiga aylantirish yo'lida zalvorli ishlar amalga oshirildi.
O'zbekiston ommaviy sportni rivojlantirish orqali xalqimiz salomatligini mustahkamlash va xalqaro maydonlarda Vatanimiz sha'nini munosib himoya qilishga qodir sportchilarni tarbiyalash yo'lidan bormoqda. Ommaviy sport taraqqiyotida ta'lim sohasidagi uch bosqichli uzluksiz sport tizimi – “Umid nihollari”, “Barkamol avlod” va Universiada musobaqalari muhim ahamiyat kasb etmoqda. Ushbu bellashuvlar orqali farzandlarimiz irodali, hayot sinovlariga bardoshli, vatanparvar, jismonan etuk insonlar bo'lib voyaga etmoqda. Mamlakatimiz o'quvchi va talaba yoshlarini qamrab olgan mazkur sport anjumanlarida ishtirok etayotgan yoshlarimiz orasidan ko'plab mahoratli sportchilar etishib chiqmoqda. Olimpiada va Osiyo o'yinlari, jahon va qit'a chempionatlarida sovrinli o'rinlarni qo'lga kiritayotgan vakillarimiz safida “Umid nihollari”, “Barkamol avlod” va Universiadalarda kashf qilingan sportchilar ko'pchilikni tashkil etadi.
Ma'lumki, 2015 yilgi sport mavsumi mamlakatimiz olimpiyachilari uchun yanada mas'uliyatli musobaqalarga boy bo'ldi. O'z oldiga hamisha yuqori maqsadlarni qo'yadigan hamyurtlarimiz sportning qator turlarida 2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining yo'llanmalari uchun bahslarda ishtirok etdilar. E'tiborlisi, mazkur musobaqalarda Vatanmiz sharafini himoya qilgan sportchilarimiz Davlatimiz va hukumatimiz tomonidan qaratilayotgan alohida e'tibor va g'amxo'rliklarga munosib bo'lishga, yaratilgan shart-sharoitlardan samarali foydalanib, xalqimiz, Prezidentimiz ishonchlarini oqlash yo'lida bor kuch va imkoniyatlarini safarbar qildilar.
Buning samarasi o'laroq, mamlakatimiz sportchilari bugungi kunga qadar o'tkazilgan litsenzion musobaqalarda “Rio-2016” o'yinlariga jami 51 ta yo'llanmani (shundan 24tasi paralimpiyachilarimizga tegishli) naqd qilib qo'ydilar.
Jumladan, bugungi kunga kelib engil atletika sport turida – 8 ta, boks, og'ir atletika hamda baydarka va kanoeda eshkak eshish sport turlarida – 5 tadan, suzish, taekvondo, erkin va yunon-rim kurashlarida – 1 tadan yo'llanmaga egamiz. Bundan tashqari mamlakatimiz paralimpiyachilari engil atletika sport turida – 10 ta, dzyudo sport turida – 8 ta, suzish sport turida – 4 ta, o'q otish hamda pauerlifting sport turlarida – 1 tadan yo'llanmani naqd qilib qo'yganlar.
Agarda 2011 yil yakunlariga kelib mamlakatimiz sportchilari tomonidan “London-2012” Olimpiada o'yinlariga 23 ta, Paralimpiya o'yinlariga esa 6 ta yo'llanmaga ega bo'lganligimizni inobatga oladigan bo'lsak, Olimpiada va Paralimpiya o'yinlariga yo'llanmalarni qo'lga kiritish borasida ham sezilarli darajada o'sishga erishilganligi yaqqol namoyon bo'ladi.
Yana bir jihat. 2015 yilgi litsenzion musobaqalarda yo'llanmalar asosan Jahon chempionatlarida o'ynalganligini inobatga olsak, mardonavor sportchilarimiz erishgan natijalari nechoqlik yuqori ekanligidan dalolat beradi.
2016 yilgi sport mavsumi ham mas'uliyatli musobaqalarga boy bo'ladi. Umid qilamizki, mazkur musobaqalarda ham yurtdoshlarimiz O'zbekiston yoshlari hech kimdan kam emasligi va hech qachon kam bo'lmasligini amalda yana bir bora isbotlaydilar.
Fursatdan foydalanib mamlakatimizning barcha sport jamoatchiligini, sportchi va murabbiylarini, shuningdek, yurtimizda Olimpiya harakatini rivojlantirish borasida yaqindan ko'mak berayotgan hamkorlar va homiy tashkilotlarni O'zbekiston Milliy olimpiya qo'mitasi tashkil topgan kun bilan samimiy muborakbod etamiz. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.