Yaqinda ham Jamshid Boltaboevning jarohati tufayli futbolchilik faoliyatini yakunlashi mumkinligi haqida xabarlar tarqalgandi. 19 yoshli o'yinchining futboldan ketishi - ko'ngilsiz holat. Ammo Jamshid iroda kuchini namoyish etdi va uzoq muddat jarohat bilan kurashgach, nihoyat, safga qaytdi.
Afsuski, bu qaytishi omadli chiqmadi - O'zbekiston olimpiya termasi koreyslarga yutqazgan o'yinda Jamshid qizil kartochka olib, maydonni erta tark etdi. Boz ustiga, guruhdagi 2-o'yinda Boltaboevsiz maydonga tushgan jamoamiz Iroq termasidan ham mag'lubiyatga uchradi va «pley-off»ga chiqishdan umid uzdi. Shunday ekan, futbolchining kayfiyati g'oyat tushib ketgani aniq. Jamshid bilan Doxadagi suhbatimiz aynan o'sha yoqimsiz vaziyat haqida boshlandi.
- Aslida raqibga jarohat etkazish yoki biror joyini sindirish uchun tashlanmagandim. Shunchaki, o'yin vaziyatida raqibga qarshilik ko'rsatdim. Qo'pollik bexosdan bo'ldi. Ammo bu meni oqlamasligini yaxshi bilaman, chunki qizil kartochka olib, jamoamni qiyin holatda qoldirdim. Buning uchun hammadan uzr so'rayman. Xususan, muxlislar meni to'g'ri tushunishlarini istayman. Bilasiz, jarohat tufayli uzoq vaqt o'ynay olmadim va bu o'yinda o'zimni ko'rsatishni juda-juda istagandim.
- Osiyo chempionatidagi vazifa bajarilmadi. Sizningcha, nima uchun shunday bo'ldi?
- Bilmadim. Afsuski, ko'ngilsiz natijada mening ham aybim bor. Balki o'sha qizil kartochkani olmaganimda, guruhdan chiqarmidik... Bu haqda bir narsa deyishim qiyin. Lekin futbolchilarimiz oxirigacha kurashishdi. Hayot davom etadi, nasib qilsa, kelgusi musobaqalarda yaxshi natijalar qayd etib, muxlislar ishonchini oqlaymiz.
- Suhbat mavzusini o'zgartirsak. Yaqinda tarqalgan xabarlarda ham jarohatingiz og'irligi va faoliyatingizni yakunlashingiz mumkinligi aytilgandi. Bunday xavf darhaqiqat, mavjudmidi?
- Ha, qaysidir vaqtda o'zim ham bundan qo'rqib qolgandim. Aslida jarohat u qadar og'ir emasdi: tizza paylari shikastlangandi. Bunday operatsiya­dan so'ng bir oyda safga qaytish mumkin ekan. Ammo Germaniyadagi jarrohlik amaliyoti yaxshi chiqmadi va bir oy deyarli bir yilga cho'zildi.
- Nima, nemis jarrohlari operatsiyani muvaffaqiyatli qilolmadilarmi?
- Ha, shunday. Umuman, Germaniya tibbiyotini maqtashadi, ammo menga kelganda, ancha e'tiborsizlik qilishgan, shekilli. Kamiga qaytayotganimda muolajalarni ham yozib berishmadi. Faqat, bir haftadan so'ng ichiladigan dorilar va suriladigan maz retseptini internet orqali jo'natishdi. Ammo bu vositalar umuman yordam bermadi. Operatsiya vaqti nima qilishganini bilmayman, narkoz ta'sirida bo'lganman. Xullas, nemislar xatosi tufayli yaqin bir yil qiynaldim. Eng yomoni - faoliyatimni yakunlashim ham hech gap emasdi.
- Qiziq, sizni qaerda davolab, oyoqqa turg'azishdi? Qachon yana futbol o'ynashingiz mumkinligini bildingiz?
- O'zimizda! Og'riq davom etavergach, Toshkent Davlat meditsina institutida tekshiruvdan o'tdim. O'sha vaqt­lar biroz yugursam tizzam shishib ketardi. Ko'rikdan so'ng jarroh Murod Irismetov qayta operatsiya qilish shartligini aytdi. Rozi bo'ldim. Xayriyatki, operatsiyadan so'ng asta-sekin o'zimga keldim. Og'riqlar yo'qoldi, tizzam ham shishmay qoldi. Ammo maydonga ko'nikish uchun ancha vaqt ketdi.
- Samvel Babayanning aytishicha, futbol o'ynashdan ham cho'chib qolgan ekansiz...
- Uzoq vaqt og'riq bilan kurashgandan keyin shunaqa bo'ladi, chog'i. Hamma ham takroriy jarohatdan qo'rqadi. Ayniqsa, nemis shifokorlari gaplaridan cho'chigandim. Ular shifokorlar tavsiyasi bo'yicha yurmasam, futboldan ketishimga to'g'ri kelishini aytishdi. Ammo o'sha tavsiyani berishmagani meni hayron qoldirdi. Toshkentga qaytgach, og'riq davom etavergach, klubdagilar Germaniya muassasi bilan aloqaga chiqishdi va qo'shimcha muolaja so'rashdi. Faqat, shundan keyin nemislardan tavsiyalar keldi. Ammo kech bo'lgandi, shekilli, qandaydir foydasi sezilmadi.
Davomi InterFUTBOL gazetasi blogida.
— deya xabar beradi uff.uz nashri.