2016 yilning 22-24 yanvar kunlari Kuba poytaxti Gavana shahrida dzyudo kurashi bo'yicha Gran-Pri turkumiga kiruvchi yirik xalqaro turnir o'tkaziladi.
“Rio-2016” Olimpiada o'yinlarining reyting ochkolari o'ynaladigan mazkur nufuzli musobaqada dunyoning 69 davlatidan kelgan 418 nafar sportchi (shundan 165 nafar xotin-qizlar) 14 vazn toifasida (7 vazn toifasida erkaklar – 7 vazn toifasida xotin-qizlar) g'oliblik uchun bellashadilar.
Ushbu xalqaro turnirda Vatanimiz sharafini jami 11 nafar sportchimiz himoya qiladi. Bular – Sharofiddin Lutfullaev (-60 kg), Diyorbek O'rozboev (-60 kg), Mirali Sharipov (-73 kg), Sharofiddin Boltaboev (-73 kg), Shahzod Sobirov (-81 kg), Sherali Jo'raev (-90 kg), Davronbek Sattorov (-90 kg), Ramziddin Saidov (-100 kg), Soib Qurbonov (-100 kg), Elyor Masharipov (+100 kg) va Gulnoza Matniyozova (-70 kg).
Polvonlarimiz bo'lajak nufuzli musobaqaga 5 yanvardan poytaxtimizda terma jamoamiz bosh murabbiyi Andrey Shturbabin boshchiligida qizg'in hozirlik ko'rdilar. Hamyurtlarimizga Kuba tatamilarida ham omad va zafarlar tilab qolamiz. Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.