"Barselona" yarim himoyachisi Xaver Maskerano darhaqiqat soliq to'lash borasida anglashilmovchilikka yo'l qo'ygani va bu borada soliq qo'mitasi bilan kelishuvga erishganini aytib o'tdi. Yarim himoyachi bu ishi uchun qamalmaydi.
"Vaziyatga oydinlik kiritishni istayman. Bugun Ispaniya moliya vaziri bilan gaplashdim va hammasini kelishib oldik. Sud ishi tugadi va hammasi ortda qoldi.
"Barselona"ga o'tganimdan so'ng obro'li ispan firmasiga murojaat qildim va soliq bo'yicha maslahat oldim. Firma professional sifatida tan olingan va obro'li edi. Ular menga ma'lum tizimdan foydalanishni maslahat berishdi va bu qonun doirasida ekanini ta'kidlashdi. Ularning xizmatidan 2010 yildan to 2014 yilga qadar foydalanganman.
Ammo keyin boshqa idoraga murojaat qilishga qaror qildim. Hali menga qarshi ish boshlamaslaridan ilgari vaziyatni tushunib etgandim. Yangi firmadagilar menga vaziyatni o'nglash uchun barcha soliqlarni to'lashni maslahat berishdi.
Endi hammasi ortda qoldi. Men o'z majburiyatlarimni bajardim va o'zimni xotirjam his qilmoqdaman. Men professional sportchiman va soliq borasida chuqur bilimim yo'q. Shu sababli boshqalarga ishonib qolgan ekanman.
Men butun faoliyatim davomida halol ishlab kelganman, jamoadoshlarim, klub va o'zim o'ynagan mamlakatni hurmat qilganman. Soliq bilan bog'liq ko'ngilsizlik esa meni yanada tajribali va kuchliroq qildi. Endi menga noto'g'ri maslahat bergan firmaga qarshi ish boshlash imkonini o'zimda saqlab qolaman", - deydi Maskerano.
— deya xabar beradi uff.uz nashri.