Ma'lumki, yaqinda Toshkentda OFKning futbol murabbiylari uchun o'quv-seminar kurslari bo'lib o'tdi. Ushbu o'quv «B» litsenziyasi uchun o'tkazilib, unda 19 nafar ishtirokchi murabbiylikning navbatdagi pog'onasi yo'lida tahsil olgan edi.
O'quv mashg'ulotlarini OFK instruktori Islom Ahmedov olib borgan, Shavkat Imomov koordinator vazifasini bajargandi. Biz ushbu o'quv kursi yakunlari haqida Islom Ahmedovdan intervyu oldik.
- Islom aka, o'quv kurslari qanday o'tdi? Ishtirokchilarning o'quv jarayoniga yondoshuvidan ko'nglingiz to'ldimi?
- Albatta, ko'ng­lim to'ldi. Garchi bunday holat kamdan-kam uchrasada, bu safar ishtirokchilar kurslarga o'zgacha ishtiyoq bilan yondoshishdi. O'quv jarayoni juda ham qiziqarli ruhda o'tdi. Oliy va birinchi liga murabbiylari, yoshlar va o'smirlar bilan ishlayotgan mutaxassislar jam bo'lgan o'quv kurs­larida o'ylagan rejalarimizni to'laligicha amalga oshirdik. Bu galgi o'quv kurslariga bir nechta yangiliklar kiritilgandi. Ham nazariy, ham amaliy mashg'ulotlarda ishtirokchilar bu yangiliklarni tezda o'zlashtirib olishdi. Ushbu holat ham meni xursand qildi.
- Ishtirokchilar orasidan kimlarni alohida ko'rsatgan bo'lardingiz?
- Bu galgi o'quvlarda Hamidjon Aktamov, Sobirxon Ag'zamov, Ulug'bek Baqoev, Bek Bekov, Xislatjon Chilmatov, Anton Devyashin, Komil Jo'raev, Rafael Fabarisov, Aleksandr Xvostunov, Bahromjon Haydarov, Nodirjon Boltaev, Nodirjon Mardonov, Muhsin Nizomiddinov, Olim Shokirov, Sunnatilla Shoymardonov, Baxtiyor Turdiqulov, Olimxon Tursunxo'jaev, Anvar O'rinov, Vadim Valitskiy, jami 19 nafar murabbiy tahsil oldi. Ularning hammasi ham kurslarda katta ishtiyoq bilan mehnat qilishdi. Ayniqsa, «Olmaliq« klubidan kelgan Rafael Fabarisov, «Bunyodkor»dan Aleksandr Xvostunov, hozirda futbolchilik faoliyatini davom ettirayotgan Ulug'bek Baqoev, «Qizilqum» vitse-prezidenti Hamidjon Aktamov, «Neftchi» klubidan Bahrom Haydarovni alohida ta'kidlagan bo'lardim.
Futbolchi yilning istalgan vaqtida maydonga tushib, to'liq kuch bilan o'ynashga tayyor turishi kerak. Zamonaviy futbolning talabi ham shu. O'quv kurslarida bo'lajak murabbiylardan ayni jihatga e'tiborliroq bo'lishlarini talab qildik. Masalan, kelasi yilning yanvar oyida Qatarda 23 yoshgacha bo'lgan futbolchilar ishtirokidagi Osiyo chempionati o'tkziladi. Fevral oyida OChL bahslari boshlanadi. Martdan to noyabrgacha milliy chempionat va kubok o'yinlari bo'lib o'tadi. Ko'ryapsizmi, futbolchi yil davomida maydonga tushishi kerak. Shuni inobatga olgan holda tayyorgarlik jarayoniga o'zgarishlar kiritilishi shart. Kurs yakunidagi imtihonlarni ham shu asosida qabul qildik.
- «V» o'quv kurslari «A» va «PRO» litsenziyasi uchun o'tkaziladigan kurslardan nimasi bilan farqlanadi?
- «V» murabbiylik toifasi uchun o'tkaziladigan kurslar uch haftaga mo'ljallangan. Bu murabbiylik litsenziyasini olmasdan turib, «A» toifasi uchun o'qib bo'lmaydi. «V» guvohnomasiga ega murabbiylar oliy va birinchi ligada bosh murabbiy yordamchisi, yoshlar ligasi hamda bosh-qa barcha yosh toifasidagi jamoalarda bosh murabbiy lavozimida ishlashlari mumkin.
- Avvalgi yillarda tashkil etilgan kurslar bilan taqqoslaganda, o'quv jarayoniga qanday yangiliklar kiritildi?
- Asosiy yangilik o'quv-mashg'ulot jarayonini yangicha uslubda tashkil etishga qaratildi. Futbolda texnika, taktika, jismoniy va ruhiy tayyorgarlik birdek muhim ekanligi ma'lum. Texnika - bu to'p bilan to'g'ri muomala qilish, degani. Taktika - raqibga qarshi munosib qarshilik ko'rsatish, to'g'ri taktika tanlashdir. Jismonan tayyor bo'lish esa texnika va taktika uyg'unligini o'yin paytida ko'rsata bilishga bog'liq. Ruhiy tayyorgarlikka ortiqcha ta'rif berish shart emas. Lekin bu o'quv kursimizda biz psixologik tayyorgarlikka katta e'tibor qaratmadik. Kuniga ikki soat davom etgan kurslarda o'yin epizodlarini ham tahlil qildik. Murabbiy umumiy guruh mashg'ulotlari chog'ida ayrim futbolchilarga alohida yondoshishi ham kerak. O'sha imkoniyatini to'liq namoyish etib bera olmayotgan o'yinchilarga to'g'ri so'z topa olish ham bir mahorat. Mash-g'ulotlarda shu jihatlarni ham murabbiylarga tushuntirdik.
- Endigi rejalar qanday?
- Kuni kecha Qarshida murabbiylar uchun o'quv kurslari boshlandi. Unda asosan vohaning uch klubi - «Nasaf», «Sho'rtan» hamda «Mash'al» jamoalarining murabbiylari ishtirok etishyapti. Maqsad - murabbiylarni yangi o'quv metodlari ­bilan tanishtirish, ularning malakasini yanada oshirishdan iborat. Bunday o'quv kurslarini qolgan viloyatlarda ham tashkil etish kerak, deb o'ylayman.
Ulug'bek Baqoev (o'quv kursi ishtirokchisi):
- Ochig'i, murabbiylik sohasi menga juda ham yoqib qoldi. Kurslarda tahsil olish jarayonida murabbiylik kasbiga mehrim yanada oshdi. Lekin oson kasb emasligi, murabbiylarga qanchalik qiyin ekanligini tushunib etdim. Katta ehtimol bilan bu yil futbolchilik faoliyatimdagi so'nggisi bo'ladi. Ammo hali bir qarorga kelmadim. Menimcha, kelasi yildan murabbiylik faoliyatini boshlasam kerak. Navbati bilan «A», keyin «PRO» murabbiylik guvohnomalari uchun tahsilni davom ettiraman.
Aleksandr Xvostunov (o'quv kursi ishtirokchisi):
- Futbolsiz hayotimni tasavvur qila olmayman. Shu sababli, futbolchilik faoliyatimdan so'ng murabbiy bo'lish istagi paydo bo'lgandi. Mana, «V» litsenziyasi uchun tashkil etilgan o'quv kurslarida ishtirok etdik. Nazariy va amaliy mashg'ulotlar juda ham yuqori saviyada, qiziqarli o'tdi. Yangiliklardan voqif bo'ldik. O'ylaymanki, o'rganganlarimizni sekin-asta amaliyotga tatbiq etib boramiz.
Manba: "InterFUTBOL" gazetasi
— deya xabar beradi uff.uz nashri.