Qatar poytaxti Doha shahrida davom etayotgan boks bo'yicha kattalar o'rtasidagi jahon chempionatida kecha beshta vazn toifasida yarim final janglari o'tkazildi.  Bu haqida O'zbekiston Milliy Olimpiya Qo'mitasi rasmiy saytida xabar qoldirilgan.
E'tiborlisi, dastlabki kuni bo'lib o'tgan yarim final uchrashuvlarida ringga ko'tarilgan uch nafar hamyurtimiz ham raqiblari ustidan ishonchli g'alabalarni qo'lga kiritib, jahon chempionatining oltin medallari uchun kurash olib boradigan bo'ldilar.
Jumladan, og'irlik vazni 56 kg.gacha bo'lgan bokschilar musobaqasida Vatanimiz sharafini himoya qilayotgan Murodjon Ahmadaliev hindistonlik Shiva Tapani 3:0 hisobida enggan bo'lsa, yana bir hamyurtimiz Fazliddin G'oipnazarov (-64 kg) Tailand vakili Vuttichay Masukni 3:0 hisobida mag'lub etdi.
Kechagi yarim final janglarida ringga chiqqan terma jamoamizning yana bir a'zosi, O'smirlar Olimpiada o'yinlari g'olibi, Osiyo chempioni Bektemir Meliqo'ziev irlandiyalik Maykl Oreylidan 2:1 hisobida ustun keldi va u ham jahon chempionatining oltin medallari uchun kurash olib boradigan bo'ldi.
Shu o'rinda ta'kidlash joizki, dastlabki kungi yarim final janglaridan so'ng O'zbekiston, Rossiya va Kuba davlatidan uch nafardan bokschi raqiblari ustidan g'alabaga erishib, finalga chiqdilar. Yana bir finalchi irlandiyalik Maykl Konlon bo'ldi.
Bugun -52 kg, -60 kg, -69 kg, -81 kg. va +91 kg vazn toifalarida yarim final janglari o'tkaziladi. Bugungi bahslarda hamyurtlarimizdan Elnur Abduraimov (-60 kg), Elshod Rasulov (-81 kg) va Bahodir Jalolov (+91 kg) final yo'llanmasi uchun bahs yuritadilar.
Bugun o'tkaziladigan yarim final janglarida ringga ko'tariladigan juftliklar bilan O'zbekiston Milliy Olimpiya Qo'mitasining rasmiy sayti bo'lgan Olympic.uz'da tanishib olishingiz mumkin.
— deya xabar beradi uff.uz nashri.