Mana, 2016 yilning dastlabki oyi ham sekin-asta o'z poyoniga etib bormoqda. Odatga yanvar oyi yangi mavsumga tayyorlanish uchun eng qulay payt sanaladi. Aynan shu oyda barcha jamoalar o'z safini mahoratli o'yinchilar bilan to'ldirishga, imkon qadar nazorat uchrashuvlarini tashkil etishga harakat qiladi. Chunki, fevral oyida turli musobaqalar o'tkaziladi va futbolchilarni sinovdan o'tkazish uchun unchalik qulay payt emas. O'tgan mavsumdan ko'ngli to'lmagan futbolchilar ham yangi yilning birinchi oyidan boshlab murabbiylar ishonchini oqlashga intilishadi. Bugungi maqolamizda yangi mavsumda o'zini ko'rsatishi kutilayotgan bir qator futbolchilar haqida so'z yuritamiz. Ruslan Matniyazov o'tgan mavsumda asosan o'rinbosarlar safida maydonga tushdi. Lekin Xorazm futbol maktabi tarbiyalanuvchi sanalgan 28 yoshli posbon asosiy tarkibda maydonga tushgan o'yinlarning birida haqiqiy qahramonlik ko'rsatgandi. Ha, o'sha “Paxtakor” bilan Qo'qonda bo'lib o'tgan bahsda Ruslan Matniyazov o'zining nimalarga qodir ekanligini namoyish etgandi. “Sherlar” ikki ochko yo'qotishiga aynan shu darvozabon sababchi bo'lgandi. Yangi mavsum oldidan Ruslan ham boshqa jamoadoshlari kabi mashg'ulotlarda tinimsiz mehnat qilmoqda. Ayni damda jamoamizda darvozabonlar orasida kuchli raqobat vujudga kelgan bo'lsa-da, Matniyazov asosiy tarkibga kirish uchun bor mahoratini ishga solishga tayyor. O'tgan mavsumning ikkinchi yarmini jamoamizda ijaraga asosida o'tkazgan Oybek Nurboev Toshkentdagi yig'inda “Qo'qon-1912” bilan shartnoma imzolagani haqida xabar bergandik. Qoraqalpog'iston futbol maktabi tarbiyalanuvchisi sanalgan 27 yoshli himoyachi o'tgan yili jamoamiz safida unchalik ko'p o'yin o'tkazgani yo'q. Lekin yangi mavsumdan uning umidlari katta. Oybek Nurboev ham 2016 yilda bor mahoratini namoyish etishga tayyor. Ma'ruf Zokirjonov o'tgan yili asosan o'rinbosarlarimiz safida to'p surdi. Aytish joizki, Zokirjonov va Matniyazovlar o'rinbosarlarimizning ettinchi o'rinni olishida katta hissa qushishgan. 23 yoshga qadam qo'ygan Zokirjonov 2016 yilgi chempionatda o'zini ko'rsatishga va muxlislar mehrini qozonishga bel bog'lagan. 2016 yilgi mavsum biz tilga olib o'tgan futbolchilar uchun omadli kelishini tilab qolamiz.
— deya xabar beradi uff.uz nashri.