Qatardagi Osiyo chempionatini yoritish uchun «Sport» telekanalidan jurnalist Davron Fayziev safarga yo'l oldi va voqealar jarayoni bilan muxlislarni baholiqudrat tanishtirib bordi. U bilan birga ishlar ekanmiz, tabiiyki, musobaqa va uning atrofidagi tafsilotlarni ko'p bora muhokama qildik.
Ushbu intervyuni olish fikri ham mana shunday suhbatlar davomida paydo bo'ldi. Hamkasbimizga tig'iz ish tartibiga qaramay, «Interfutbol» nashriga intervyu bergani uchun minnatdorchilik bildiramiz.
- Davron, Qatar safari davomida bu erda olib borilayotgan ishlar bilan yaqindan tanishdingiz. Siz ko'plab mamlakatlarda bo'lgansiz va Osiyo futbolidan birmuncha xabardorsiz. O'zaro taqqoslagan holda Qatar haqida qanday fikr bildira olasiz?
- Qatarda olib borilayotgan ishlar qay darajada keng ko'lamda ekanini aytish uchun boshqa mamlakatlar bilan taqqoslash ham shart emas. Men hali bunchalik katta hajmdagi ishni ko'rmaganman. Bu erda barpo etilayotgan inshootlar va infratuzilmani boshqa hech bir davlatda uchratmaganman. Qatarning 2022 yilgi jahon chempionatiga jiddiy tayyorgarlik ko'rayotgani bir qarashdayoq ma'lum.
- Shu o'rinda bir savol - Qatar 2022 yilgi mundial uchun shuncha bino va stadionlar qurmoqda. Ammo musobaqadan so'ng ular kerak bo'lmay qolishi ehtimoli juda katta. Bitta JCh uchun shuncha qurilish qilish shartmidi?
- Bu savolingizga faqat bitta javob bo'lsa kerak - Qatar bunday masalalar haqida mutlaqo o'ylagani yo'q. Ular uchun xarajatdan ko'ra mamlakat obro'yi va e'tibori oshishi muhimroq. O'zingiz ham guvoh bo'ldingiz, kecha «Al-Sadd»ga tegishli gandbol stadionini borib ko'rdik. Shu qadar katta gandbol arenasi Evropa va Amerikada ham bo'lmasa kerak. Bu inshootdan o'tgan yili gandbol bo'yicha bo'lib o'tgan jahon chempionatida foydalanishgan edi. Ammo hozir o'sha binoga muxlislar tushyaptimi? Qiyin masala. To'g'ri, u erda hozir ham qaysidir gandbol jamoasi o'ynashi turgan gap, ammo unga ko'p muxlis tushishiga shubha qilaman. Biroq qatarliklar bunday narsalar haqida ko'p ham qayg'uradiganga o'xshamayaptilar. Ular uchun mamlakat obro'yining oshishi va sayyohlar tashrifining ortishi muhimroq. JCh stadionlarining qismati ham xuddi shunday bo'lsa kerak. Biz hozir ko'rib turgan ishlar hali hech narsa emas. Jahon chempionatiga qadar yana olti yil vaqt bor va bu muddatda yanada kattaroq inshootlar qurilishi turgan gap. Ishonchim komilki, mundialni yoritish uchun kelsak, bu erlarni tanimay qolsak kerak.
- Shu o'rinda qatarliklar haqida nima deya olasiz? Ularning tashkilotchilik ishi qay darajada samarali, deb o'ylaysiz?
- Avvalo, bir narsani aytib o'tishni istar edim, aftidan, biz hali asl qatarlikni ko'rmadik, shekilli. Chunki tashkilotchilik ishlarida asosan xorijlik mutaxassislar faoliyat olib bormoqdalar. Shunday ekan, bu borada bir narsa deya olmayman. Ammo bu erdagi tashkilotchilik ishida faoliyat yuritayotgan insonlar shubhasiz, o'z ishining ustalari. Bunga bir necha bor guvoh bo'ldik.
- Qatarga kelgach, sizni hayron qoldirgan biror jihat bo'ldimi? O'tgan bir haftalik faoliyat davomida nimani alohida ta'kidlab o'tgan bo'lardingiz?
- Meni hayron qoldirgan jihat, bu - albatta, Qatarning iqlimi! Shu vaqtga qadar bu erda dahshatli issiq hukm surishi haqida shu qadar ko'p gapirildiki, hatto qishda ham jazirama bo'lishini kutgan ekanman. Yo'q, qishda bu er hatto biroz sovuqroq ham bo'larkan. Yaxshiyamki, issiq kiyimlarni tashlab kelmagan ekanmiz, aks holda, shamollab qolishimiz hech gap emas edi. Shunday ekan, nimadir bo'lib FIFA 2022 yilgi jahon chempionatini Qatarda o'tkazish fikridan qaytib qolmasa, bu er eng ideal joy bo'lar edi. Faqat buning uchun mundialni qishda o'tkazish shartligini ham aytib o'tish lozim.
Davomi InterFUTBOL gazetasi blogida.
— deya xabar beradi uff.uz nashri.